Naalagaaffinngornissaq pillugu kalaallit politikkerit Folketingimi pikkunartumik oqallinnerat

Maluginiaruk: Aaja Chemnitzip Aki-Matilda Høegh-Dam kukkusumik paasissutissiisorimmagu taama pisoqartoq erseqqissaatigineqarpoq.

Pingasunngormat Folketingimi ukiup ataatsimiiffiusup naanerani oqallittoqangaatsiarpoq.

Kalaallit ilaasortat oqalugiartussanngormata, Kalaallit Nunaata naalagaaffinngornissaanik aallartitsisoqareernersoq aallartitsisoqannginnersorluunniit oqallisigineqarpoq.

Aaja Chemnitzip (IA) SF peqatigalugu oqaaseqaammini Aki-Matilda Høegh-Damimit (S) eqqunngitsumik paasissutissiisutut pasillerneqarmat taama pisoqarpoq. Siumumi politikerip Aaja Chemnitzip Folketingimi eqqunngitsumik paasissutissiisimanerarmani qisuariarpoq.

Namminersorneq pillugu inatsimmi § 21-p atuutsinneqarnissaanik siunertaqartumik ataatsimiititaliarsuarmik pilersitsinissamik aalajangiiffigisassatut siunnersuut, sapaatip-akunnerani matumani Inatsisartuni akuersissutigineqartoq, oqallinnermi pingaarnertut oqaluuserineqarpoq. Tamannali qanoq ingerlanersoq nalunaarusiarineqartassasoq, Inatsisartut aalajangiineranni aamma piumasarineqarpoq. Immikkoortoq 21-mi Kalaallit Nunaata nunatut namminersortutut periarfissai sammineqarput.

Chemnitz: aqagu taasititsisoqarnavianngilaq

„Siornatigut paragraf 21-p atuutsinneqarnissaa pillugu oqaatigineqartut eqqunngitsut“ Aaja Chemnitzip oqaluttarfimmit oqarmat, Aki-Matilda Høegh-Damip mamiallaatigaa.

Siumut nammineq allannguutissatut siunnersuuteqartoq Aaja Chemnitzip oqaatigaa, ukiakkut ataatsimiinnermi saqqummiunneqartussamik nalunaarusiortoqassasoq tassani aamma allassimammat:

- Imaanngilaq aqagu taasititsisoqassasoq, Aaja Chemnitz oqarpoq.

Aki-Matilda Høegh-Damip tamanna isumaqatiginngilaa:

- Naalagaaffimmik pilersitsinissaq aallartittoq Inatsisartuni Inuit Ataqatigiinnilu arlaleriarluni oqaatigineqarsimavoq. Siullermik kalaallit namminiilivinniarnerlutik aalajangertariaqartut aalajangertoqarpoq, sapaatip-akunneranilu matumani taama pisoqarpoq.

- Folketingimi IA-p allatut oqarnera tupigusuutigaara, Aki-Matilda Høegh-Dam Aaja Chemnitzimut oqarpoq.

Apeqqutip taama pingaaruteqartigisup eqqorluartumik samminissaa pingaaruteqartoq, Aaja Chemnitz oqarpoq:

- Oqqateqatigiittarianngitsugut isumaqarpunga. Namminiilivinnerlu pillugu oqallinnermi paasissutissat pitsaanerpaamik tunngaveqarnissaat pingaaruteqartoq isumaqarpunga, politikkeri oqarpoq.

Aki-Matilda Høegh-Damip nalunaarut tamanna naammaginngilaa, tunngaveqanngitsuunerarpaalu.

Aalajangiussaq imaappoq

Paragraf 21-p atuutsinneqarnissaa siunertaasoq, tamannali sioqqullugu nalunaarusiortoqassasoq piumasaqaatigineqartoq, aalajangiiffigisassatut siunnersuummi allassimavoq.

Aalajangiiffigisassatut siunnersuut imatut nipeqarpoq:

Ataatsimiititaliami amerlanerussuteqartut Inuit Ataqatigiit Siumullu immikkoortumut 75-imut immikkoortumullu 123-mut ima allannguutissatut siunnersuuteqarput:

"Namminersorneq pillugu inatsimmi § 21-p atuutsinneqarnissaa siunertaralugu ataatsimiititaliamik pilersitseqqullugit, tunngavissanillu matuma kinguliani allassimasunik imalimmik nassuiaammik naatsumik saqqummiusseqqullugit Naalakkersuisut Inatsisartunit matumuuna peqquneqarput: Aalajangersakkap suliniutiginerani alloriarnerit tamaasa pillugit naatsumik paasissutissiissuteqartarnissaq. Suliniutip ingerlateqqinneqarnissaanut suliakkiut, tassunga ilanngullugu piffissalersuutaasinnaasut ataatsimiititaliallu katitigaasinnaanera.

Inatsimmut tunngaviusussamut missingiutip pigineqareersup suliniummut atatillugu nalilerneqarnera. Kalaallit Nunaata namminiilivinnissaa naalagaaffinngornissaalu pillugit innuttaasunik isumasiuilluni taasisitsineq qanoq tunngavissaqarluni ingerlanneqarsinnaanersoq pillugu naliliineq. Nassuiaat 2024-mi ukiakkut ataatsimiinnerup aallartinnginnerani Inatsisartunut saqqummiunneqassaaq."