Naalakkersuisoq: Innuttaasut nunap allanngutsaaliorneqarnissaa ernummatigissanngilaat
Oqartussaasut sumiiffinni najugaqartunit atuisunillu qanittumik akuutitsinissaq ilisimasaannillu katersuinissaq maanna aallartippaat.
Kommune Qeqertaliup Qeqqatalu Kommuniata 2020-miilli nunap ilarujussuata siunissami allanngutsaaliuganngornissaa sulissutigaat.
Assiliisoq: Naalakkersuisut
Kitaani nunap ilaanik allanngutsaaliuinissamik suliniut annertuumik suliaqarfiusoq maanna aallartinneqarpoq. Naalakkersuisut ilisimatitsipput nunap immikkoortuani innuttaasut ilisimasaat sumiiffimmillu atuinerannut paasissutissat katersornissaat siunertaasoq.
Kommunip ilaani nunamik allanngutsaaliuinissamik pilersitsinissaq Siumup Kommune Qeqertalimmi gruppiata sapaatip akunnerata siuliani akerleralugu naluunaarutigereeraalu taama pisoqarpoq.
Innuttaasut sumiiffimmilu atuisut ilisimasaat suliniarnermi atorneqarumaartut, sumiiffiullu nalinginnaasumik atorneqartuaannarnissaa avatangiisinullu naalakkersuisup Kalistat Lundip (IA) oqaatigaa:
- Kipineqanngisaannassaaq
- Uteqqikkusuppara sumiiffimmi innuttaasut nunami angalasarnerminnik ingerlatsiinnarsinnaanertik ilisimassammassuk. Nunami allanngutsaaliukkami eqqissisimaarniarunik nukissanillu katersiniarunik – imaluunniit umimmanniarunik aavarniarunilluunniit.
- Sumiiffimmik atuisut nunanik nuannarisaminnik ornitaqartarnertik ingerlatiinnarsinnaavaat. Taamatut pinngortitamut atassuteqarneq kipineqanngisaannassaaq, Kalistat Lund oqarpoq.
Qeqertalimmi borgmesteri Ane Hansen aamma eqqissisaavoq:
- Mittarfiit nutaat, aammalu nunap allanngutsaaliukkap nutaap, kommunimit aqunneqartussap atuutilernerini ukiuni tulliuttuni takornarissanik amerlanerusunik Kommune Qeqertalimmut pileritsatsitsisoqarsinnaassasoq naatsorsuutigaara. Tamanna najukkatsinni aningaasaqarnermut nukittorsaataassaaq, aammalu najukkatsinni takornariaqarnermit maannakkut ingerlasumi inuussutissarsiornermut suliatsinnillu iluanaarutissanik pissaganartunik pissarsinissamut periarfissaavoq, oqarpoq Ane Hansen, nangillunilu:
Killigititassat malittarisassiassallu suli aalajangiunneqanngillat
- Naak takornariaqarneq annertusigaluartoq innuttaasut sumiiffimmi suli piniarsinnaapput, aammalu aallaqqaataaniit aqutsisinnaassallutik. Ilisimasanik katersuinermi kommunimi innuttaasut tusarneqarnissaat, taamaallunilu immikkut ittut inatsisiliornissamut akuutinneqarnissaat qulakkeerneqassaaq.
Ilisimasanik katersuisoqareerpat, aamma innuttaasunik ataatsimiisitsisoqareerpat suliassaqarfimmut killigititassat malittarisassiassallu aatsaat aalajangiunneqartussaapput Naalakkersuisut nalunaarummi allapput.
