Naalakkersuisup inatsiseqarnermut tunngasut pitsanngorsarneqarnerat pingaartikkaa
Kalaallit Nunaanni inatsisinik atuutsitsinermut suliassaqarfik 850 millionit koruuninik aningaasaliiffigineqarpoq, Naaja H. Nathanielsenillu qallunaat naalakkersuisuisa kalaallit kissaataat paasisinnaammassuk qujamasuutigaa. Eqqartuussisoqarfinni oqaatsit atorneqartut aamma sukataarunniarpai.
Foto: Morten Okkels
Danmarkimi naalakkersuisut Kalaallit Nunaanni inatsiseqarnermut tunngasut ukiuni sisamani 850 millionit koruunit atorlugit pitsanngorsaaviginiarpaat.
Inatsisinik atortitsinermut ministerip Peter Hummelgaardip (S) inatsisinik atuutsinneqarnerannut naalakkersuisoq Naaja H. Nathanielsen (IA) peqatigalugu Nuummi suliniutit pilersaarutigineqartut ataasinngornermi unnukkut saqqummiuppai.
– Naalakkersuisut aningaasat kalaallit kissaataannik piviusunngortitsisussat amerlineqangaatsiarnissaat qujamasuutigaat. Ajunngitsumik sunniutaat maanna malugileraarpavut, oqarpoq.
Politiit, unnerluussisut, eqqartuussiviit pineqaatissinneqarsimasunullu inissiisarfiit naalagaaffiup ataaniimmata Danmarkimi naalakkersuisuisa suli akisussaaffigaat. Naalakkersuisut Inatsisartuillu politikkikkut kissaataat tusaaneqarnissaat taamaammat pingaaruteqarluinnartoq, taanna erseqqissaavoq.
– Taamaattumik ukiuni kingullerni kalaallit siunnersuutaat sinaakkutillu nutarterneqarnissaat pillugu kissaataat tusarnaarneqarmata nuannaarutigeqaara. Sulinermi atugassarititanut inatsisinullu tunngatillugu. Pisariaqartinneqarput, sivisuumillu taamaattoqarsimalluni, oqarpoq.
Nunami tamarmi atuuttoq
Politiit ukiumut 31-nik nutaanik sulisutaarnissaat, pinaveersaartitsineq aamma eqqugaasut sanngiinnerusut immikkut pingaartinneqarnissaat Naaja H. Nathanielsenip pingaartitaasa ilagaat.
Politiit amerlanerusunik suliaqarsinnaanngorlutillu, sullissinerup naapertuilluanngitsumik sivitsortoornissaraluanut sulisussat taakkua iluaqutigissavaat, tamarmillu Nuummi politeeqarfittaamiissanatik.
– Sulisut amerlinerat nunami tamarmik malugineqassasoq Naalakkersuisunit pingaartinneqarpoq, naqissusiivoq.
Pineqaatissinneqarsimasunut inissisarfinniissinnaasut nunami tamarmi agguataarlugu 70-inik aamma amerlineqassapput.
Oqaatsit atorneqartut naligiinnerusut
Naalakkersuisut naalagaaffimmik siunissami oqaloqateqarnermi kalaallisut oqaaseqarnerup inissisimaffia sammiuassavaat, Naaja H. Nathanielsen nangilluni oqarpoq.
– Qallunaatut oqaluttut ikiliartuinnassapput, tamannalu inatsisinik atuutsitsinermut sulisussarsiornermut ilinniartitsinermullu sunniuteqassallunilu ulluinnarnilu sulinermut sunniuteqassaaq. Taanna pillugu qanimut oqaloqatigiinnermut nangissavarput, oqarpoq.
Aamma atorfimmi atugassarititaasut pingaartinneqarput. Sulisunut uniformillit uniformeqanngitsullu assigiimmik atugaqarnissaat pingaartinneqartuassaaq, oqarpoq.
