Naalakkersuisut erseqqissaapput: FKU Nunatsinni atorneqarneq ajorpoq
Danmarkimi meeqqanik angerlarsimaffiup avataanut inissiiniarnermi suliani, angajoqqaat piginnaanerinik misissuutit (FKU) kalaallinut naleqqussarnissaannik suliaq unitsinneqassasoq Naalakkersuisut aalajangerput. Tamanna isornartorsiorneqarpoq, ilaatigut qallunaat misissuutaat Kalaallit Nunaanni aamma unitsinneqassasut kissaatigineqarluni. Misissuutit FKU-t Kalaallit Nunaanni atorneqarneq ajortut Naalakkersuisut maanna erseqqissaatigaat.
Assi: Mads Claus Rasmussen/Ritzau Scanpix
Danmarkimi angajoqqaat piginnaasaannik misissuutit (FKU) kalaallinut naleqqussarneqarnissaannik ineriartortitsinermik Naalakkersuisut unitsitsiniarlutik aalajangernerat isornartorsiorneqangaatsiarpoq. Qallunaat misissuutaat aallaavigalugit Nunatsinni misissuutit atorneqartarnerat unitseqqullugit ilaatigut aamma isornartorsiuisoqarluni.
Isornartorsiuineq tamanna pissutigalugu Naalakkersuisut maanna erseqqissaateqarput. Tassa Danmarkimi FKU-mik misissuutit atorneqartartut Kalaallit Nunaanni angerlarsimaffiup avataanut inissiinermut tunngatillugu atorneqarneq ajortut.
- FKU-mik misissuissutit aamma tarnip pissusaanik misissuinerit Nunatsinni atorneqartannginnerat pingaaruteqarpoq erseqqissaatigissallugu.
- Tamanna aamma misissuissutinut FKU-mut assersuunneqarsinnaasunut atuuppoq. Nunatsinni inissiinerit tamavimmik isumaginninnikkut misissuinerinnarnik tunngaveqartinneqarput. Isumaginninnikkut misissuinermut ilaatinneqarput suliap eqikkarneqarnera misissoqqissaarneralu aammalu suliatigut naliliineq oqartussanit susassaqartunit aamma sulianik suliaqartartunit ingerlanneqartoq, tusagassiorfinnut nalunaarummi allassimavoq.
Kulturimut naleqqussakkat sulissutigineqartut
Meeqqat angerlarsimaffiup avataanut inissinneqarnissaannut suliani, qallunaat angajoqqaat kulturiat apeqqutaatinnagit piginnaasaannut misissuutit atortagaat, Nunatsinni atorneqarneq ajortut Naalakkersuisut erseqqissaqqippaat.
Meeqqanut kalaallinik angajoqqaalinnut suliani FKU-mik misissuisarnerup atorneqarnera isornartorsiorneqartarsimavoq, tassa kulturikkut tunuliaqutaq oqaatsillu misissuinerup inernerini ilanngunneqarneq ajormata.
Kulturimut naleqqunnerusumik misissuisoqartarnissaa sulissutiginiarneqartoq Naalakkersuisut erseqqissaapput:
- VISO-p ataani immikkoortortap immikkut ittup, FKU-mik misissuinerni Danmarkimi kommuninut siunissami ikiuisussap, periaaserineqartup kulturikkut naleqqussarneqarnissaa qulakkeertussaavaa, sulianik suliaqartartunik kalaallisut oqaasilinnik kulturikkullu paasisimasalinnik atuisoqarnissaa apeqqutaatillugu.
- Immikkoortortamik tamatuminnga pilersitsisoqarnera Naalakkersuisut annertuumik tapersersorpaat, suliani innuttaasunut kalaallinut tunngasuni suliatigut pitsaassutsip kulturikkullu paasisimasaqassutsip qulakkeerneqartussaanerat pineqarmat.
Naalakkersuisut isumaginninnermi kulturikkut oqaatsitigullu naleqquttumik sakkussaqarnissaa eqqumaffigaat, tamatumunngalu tunngatillugu ineriartorneq malinnaaffigiuaritsik Naalakkersuisut allapput.
