Naalakkersuisut EU-mit aningaasaliissutigineqartut milliardikkaat isumalluarfigigaat
EU-mi missingersuutinut siunnersuummi suli qulakkeerisoqanngilaq, Vivian Motzfeldtilli isumaqatigiinniarnerit malinnaaffiginissaat qilanaaraa.
Naalakkersuisut EU-mik suleqateqarnertik annertusarlugulu pitsanngorsarniarpaat, taamaattumillu EU-Kommissionip Kalaallit Nunaannut tapiissutit marloriaatinngortinnissaannut siunnersuutaa isumalluarfigineqarpoq.
Assi: Oscar Scott Carl
EU-Kommissionip Kalaallit Nunaannut tapiissutit piffissami 2028-miit 2034-mut marloriaatinngortinnissaat siunnersuutigaa.
Ukiuni arfineq-marlut ingerlaneranni aningaasaaliissutissat, EU-mi nunat ilaasortat Europa-Parlamentillu missingersuusiaq akuersissutigissappassuk, 4 milliardit koruuningajannik naleqassapput.
Tamannalu Namminersorlutik Oqartussani nuannaarutigineqarpoq.
- Europa-Kommissionip ukiunut arlalinnut aggersunut missingersuutissatut siunnersuutaa, Kalaallillu Nunaannut aningaasaliissutit marloriaatinngortinnissaannik Kommissionip siunnerfeqarnera iluarisimaartupilussuvarput.
- EU ukiut kingulliit 40-t ingerlaneranni Kalaallit Nunaannut pingaarutilimmik aalaakkaasumillu suleqatiginnittuuvoq, piffissamilu Kalaallit Nunaanut ilungersunartumi annertuumik ikorfartuisimalluni, nunanut allanut tunngasunut naalakkersuisoq Vivian Motzfeldt (s) tusagassiorfinnut nalunaarummi oqarpoq.
Suleqatigiinnermut pitsanngorsaaneq
Aningaasat Kalaallit Nunaata EU-mik suleqateqarneranik ineriartortitsinissamut atorneqassapput, soorlu ilinniartitaanermut, aatsitassanut qaqutigoortunut, nukissiuutinut ataavartunut, digitalinngorsaanermut piujuartitsisumillu takornariartitsinermut tunngasuni.
- EU-mik suleqateqarnitta nukittorsarlugulu annertusarnissaa Naalakkersuisut erseqqissumik oqariartuutigaat. Missingersuutissatullu siunnersuutigineqartukkut immikkoortuni EU-mut Kalaallillu Nunaannut immikkoortuni nalituunik iluaqutaasussanullu suleqatigiinnitsinnik nukittorsaanissamut pitsaasunik pingaarutilinnillu periarfissaqarpoq, Vivian Motzfeldt oqarpoq.
Piffissami 2021-miit 2027-mut missingersuutit 1,7 milliardingajaapput, taamaattumik siunnersuut nutaaq marloriaammik amerlanerusunik aningaasaliissuteqarnissamik siunnersuutaavoq.
EU-Komissionip aningaasanut missingersuutaanut tulliuttumut isumaqatiginninniarnerni EU-Kommissionip siunnersuutaa maanna ilanngunneqassaaq, tassa suli aalajangiisoqanngilaq.
- Ukiut aggersut marlussuit Bruxellesimi annertuunik isumaqatiginninniarnernik ingerlatsiviussapput, taakkulu Naalakkersuisut Kalaallillu Nunaata EU-mi Sinniisoqarfianit qanimut malinnaaffigineqassapput. Taamaammat Kommissionip missingersuutinut siunnersuutaa pitsaasoq isumaqatiginninniarnissani pingaarutilerujussuarmik pitsaasumillu aallarniisuussaaq.
EU-mi nunat ilaasortat Europa-Parlamentimillu akuerineqareerpat ukiunut arlalinnut missingersuutit tulliuttut 2028-miit atuutilissapput.
