Naalakkersuisut kaammattuipput: Nuna tamakkerlugu ullumi erfalasuleritsi
Naalakkersuisut siulittaasuat kaammattuivoq Erfalasorput ullumikkut amuneqassasoq. Piffissami kingullermi pisut aallaavigalugit, inuiattut ataatsimoornerput takutinniarlugu Erfalasulernissaq kaammattuutigineqarpoq.
Foto: Knud Fl. Larsen
Donald Trump Jr.-ip piffissami qanittumi Nuummut tikeraarnerata kingorna nunarput nunanit allanit ukkatarineqangaatsiarpoq.
USA-milu politikerit nunarput isigaat, Donald Trumpip nunarput pisiarerusullugu tigorusullugulu oqareernerata kingorna.
Ataatsimoornerpullu takutissagipput, Naalakkersuisut siulittaasuata, Múte B. Egedep kaammattuutigaa:
- Nunarput pillugu piffissami kingullermi pisut aallaavigalugit, inuiattut ataatsimoornissarput aatsaat taamak pingaartigaaq. Ataatsimoornerpullu takutinniarlugu kaammattuutigaara, tallimanngornermi 24. Januar 2025, Erfalasorput amusinnaagit - Nunarput pillugu ataatsimoorta, Naalakkersuisut siulittaasuat Facebookimini allappoq.
