Meeqqat inuusuttullu aamma innarluutillit pillugit aqutsisoqarfiit Naalakkersuisunit ukiup aappaa avillugu qaangiuttoq tiguneqareersullu, Kommune Kujallermi innuttaasunut sulianik nakkutilliineq suli tunngaviusumik amigaateqarpoq.
Tamanna siunnersuisarfimmit BDO-mit nalunaarusiami juunip 12-ianni 2026-meersumi Sermitsiap pissarsiarisaani atuarneqarsinnaavoq.
Nalunaarusiaq meeqqat inuusuttullu pillugit naalakkersuisoqarfimmit taamanikkut suliarineqarpoq. Meeqqat inuusuttullu pillugit aqutsisoqarfik Meeqqanut, Inuusuttunut, Inatsisinik Atuutsitsinermut Naligiissitaanermullu Naalakkersuisoqarfimmit ullumikkut akisussaaffigineqarpoq.
- Suliffeqarfik amerlasuunik "aqutsisoqarluni“ aaqqissuussaasutut ippoq, taamaalillunilu aqutsisut kikkuunerat erseqqissumik akisussaaffilerneqanngilaq, BDO allappoq.
Sulianik nakkutilliineq aamma isornartorsiorneqarpoq:
- Allakkanik misissuinitsinni apersuinermilu paasivarput isumaginninnikkut oqartussat sulinerat, aamma aningaasatigut nakkutilliineq, aqutsisunit iluamik ullumikkut nakkutigineqanngitsoq, BDO allappoq.
Suliat misissuiffigineqartut amerlanersaanni uppernarsaatit ingerlaavartut amigaataasut, siunnersortinit paasineqarpoq. Innuttaasunullu suliassaniik suliaqarnermi qanoq iliortoqartarnersoq takujuminaatsinneqarluni.
Kommuni isumaginninnikkut annertuumik ajornartorsiuteqarnini pissutigalugu ikiorneqarnissaminik pisariaqartitsilluni saaffiginninnera aallaavigalugu, Naalakkersuisut akisussaaffik 7. november 2024-mi tiguaat. Naalakkersuisoqarfik Isumaginninnermik Aqutsisoqarfik suleqatigalugu akisussaaffimmik taamanerniilli tigusisuuvoq.
BDO-p misissuinerata takutippaa ajornartorsiutit tunngaviusut arlallit suli atuuttut. Kommunip suliassaqarfinnik namminersorlutik oqartussanit tigusinissamut piareersarnissaanut nalunaarusiaq tunngaviliissaaq.
Matumani allassimavoq siunnersortinit misissuinerit inassuteqaatillu piaarnerpaamik suliarineqassasut, immikkullu isumasioqatigiinnermi illuatungeriit tamanna oqaloqatigiissutigissagaat.
ATORUNNAARALLARTITSINEQ SUUA?
Meeqqanut tapiissutit pillugit aqutsisoqarfik aamma innarluutilinnut aqutsisoqarfik Kommune Kujallermit oqartussaaffigineqartut Naalakkersuisunit oqartussaaffigineqalissasut, Naalakkersuisut 7. november 2024-mi aalajangerput. Tamanna suliassaqarfinnik atorunnaarallartitsinermik taaneqartarpoq.
Tassa imaappoq, Namminersorlutik Oqartussat suliassaqarfinni taakkunani marlunni oqartussaasutut akisussaaffiit tigugallarpaat. Tassa kommunip suliassanik suliarinninneranut aalajangiisarneranilu Naalakkersuisut akisussaasunngorallarput.
Kommuni Kujallermi isumaginnittoqarfimmi sulisut suliamut peqataapput, kommunillu nammineq sulisui allaffiilu aamma suliamut peqataallutik.
Sulisut sulianut arsaarinninnermut suliassaqarfimmi eqqugaasut Naalakkersuisut malittarisassiaat malillugit sulissapput, kommunilli suliassamut tamatumunnga aningaasartuutit suli aningaasartuutigissavai.
Aaqqissuussaq BDO-p juunimi 2026-mi eqqartugaani, kommune pineqarpoq. Kommunilli sulisui suliassaqarfinni aalajangersimasuni Naalakkersuisut peqqussutaat malillugit taamaallaat sulisarput. Namminersorlutik Oqartussat naapertorlugit Isumaginninnermut Aqutsisoqarfik ingerlatsinermut sulisunillu aqutsinermut akisussaasuuvoq.
Tamakkiisumik paasissutissanik amigaateqarneq inatsisitigut isumannaatsuunissamut tatisivoq Suliassanut tunngatillugu paasissutissanik naammattunik peqartoqannginnera ajornartorsiummi qitiuvoq. Siuariartortoqarnera kinguariartortoqarneraluunniit taamaasilluni takujuminaatsinneqarpoq.
Suliassat unittooqqasut naammassiniarlugit aqutsisoqarfiup tiguneqarnerata kingorna aaqqissuussisoqarpoq. BDO naapertorlugu suliassat suli naammassineqarsimanngitsut Qaqortumi oqartussaqarfimmut annerusumik attuumassuteqarput.
Isumaginninnermut Aqutsisoqarfik suliassanik suliaqartoq, taamatullu ilinniarnertuunut siunnersortinik atorfinitsitsisoqartartoq, siunnersortit maluginiarpaat. Aammattaaq taakku tikkuarpaat sulianik isumaginnittunik amigaateqartoqartillugu, sulianut tunngatillugu naammassinninniarneq ajornakusoortartoq.
- Innarluutillit pillugit suliat amerlassusaat eqqoqqissaartumik naatsorsorneqarsimanngillat, BDO-mi ilisimatitsissutigineqarpoq.
Aamma siunnersortit uparuarpaat innarluutilinnut tunngasunik allattuiffik, Winformatik, uppernarsaatinik katersuinermut malinnaaviginninnermullu naammattumik ikiorsiissutaanngitsoq.
- Taamaattumik suliaminnik ingerlatsisut uppernarsaatinik qulakkeerinninnissaat paasiuminartumillu paasissutissiinissaat ajornakusoortarnera pissutaalluni suliamillu aqutsinermut atortorissaarutit pisariaqartut iluamik atorneqanngikkaangata, inatsisitigut isumannaattuunermik tatineqarput, BDO allappoq.
Teami suli pisariaqartinneqartoq Paasissutissat tamakkua amigaataanerat aningaasaqarnermut sunniuteqarpoq, innuttaasummi qanoq ikiorserneqartarnersut qanorlu tamanna naleqartarnersoq paasiuminaatsinneqarpoq.
Taamatuttaaq suliat suliarineqartut qassiunersut ilisimaneqannginnera pissutaalluni, sulisut qanoq amerlatigisut pisariaqartinneqarnersut paasiuminaatsinneqarpoq. Sulisut amerlassusaat allanngorartuartut atorfiillu amerlasuut inuttassarsiuinneqanngitsut, Nalunaarusiami allassimavoq.
– Isumaginninnermut Aqutsisoqarfimmit Team Kujallermut tapersersuinissaq pisariaqartinneqartoq suli annertuvoq, aamma sulisussarsiorneq annertusarneqartariaqarpoq, BDO allappoq.
Team Kujalleq tassaavoq naalakkersuisoqarfiup Isumaginninnermullu Aqutsisoqarfiup Kommune Kujallermi sulianik suliaqarneq pitsanngorsarniarniarlugu suleqatigiissitaat.
Aqutsisutut akisussaaffiit pillugit ajornartorsiutit ilaatigut tassaapput pisortatut atorfiit assigiinngitsut sulisunut, missingersuutinut suliamullu tunngatillugu qanoq akisussaaffeqarnersut paasiuminaatsinneqarnerat.
BDO-P SULIAANUT TUNNGASUT
BDO-p nalunaarusiaa marloriarluni saqqummersinneqarpoq, Sermitsiallu nalunaarusiap aappaa kisiat maannamut pissarsiarisinnaavaa.
BDO-p inerniliussaani allakkat, apersuinerit 20-t meeqqanullu tunngasunik suliat 15-it innarluutilinnullu tunngasunik suliat 15-it misissuinermik aallaaveqarpoq.
Paasissutissanik katersineq misissueqqissaarnerlu 2025-mi novembarimiit 2026-mi maajip aallartinneranut atuuppoq.
Nalunaarusiaq naalakkersuisoqarfimmit suliarineqarpoq, BDO-llu allagaatai Isumaginninnermit Aqutsisoqarfimminngaanneerput.
BDO naapertorlugu misissuinerit taakkua isumasioqatigiisitsinnermi saqqummiunneqarput, tassanilu kommunit namminersorlutillu oqartussat aqutsisoqatigiivi peqataapput.
BDO-p nalunaarusiaani innersuussutigineqarpoq akisussaaffiup Kommune Kujallermut utertinneqarnissaa sioqqullugu suut naammassineqaqqaartariaqarnersut.
Paatsuuineq pissutigalugu aqutsisut akisussaaffimmik pisariaqartumik naammattumik tigusisinnaanngitsut, BDO-p naliliivoq.
Taamaattumik innuttaasut neqeroorutigineqartut atorluarsinnaanngilaat.
BDO-p nalunaarusiaani siunnersuutigineqarpoq tunniussinissaq sioqqullugu anguniakkat minnerpaamik anguneqareersimasariaqartut ilaat pingaarutillit arlallit naalakkersuisoqarfimmut qitiusumik akisussaaffigineqartariaqartut. Tamanna Sermitsiap kingusinnerusukkut allaaserisami sammissavaa.
Tamarmilli ajortuinnaanngillat Nalunaarusiami aamma siuariarnerit allaatigineqarput, soorlu meeqqat angerlarsimaffimmut inissinneqartut qassiunersut paasiuminarnerulersimaneri, Isumaginnittoqarfik aaqqissuusseqqinnermut peqataanera, sulisunullu malittarisassaliortoqartoq eqqaaneqarpoq.
Sulisut piginnaanngorsarneqarnissaat aamma sulissutigineqarpoq. Sulisorpassuit ilinniagaqannginneri, ilinniaqqinnissarlu pisariaqarluinnartoq., nalunaarusiami erseqqissarneqarpoq.
BDO naapertorlugu sulisut pikkorissarlugit piginnaanngorsarniarneqartarput, suliniutilli tamatuma malinnaaffigineqarnissaa BDO-p kissaatigaa.
Suliat ataqatigiissaarineqartariaqarput, aamma ulluinnarni sulianut tunngatillugu, siunnersuutit malinneqarnerannik nakkutilliisoqartariaqarpoq. Sulisut pikkorissarnermi paasisatik atortarnerat pillugu malittarisassat malinneqarnerannik nakkutilliineq amigaataavoq, nalunaarusiami allassimavoq.
Naalakkersuisoqarfik aqutsisoqarfimmut innersuussivoq Sermitsiap Meeqqanut, Inuusuttunut, Inatsisinik Atuutsitsinermut Naligiissitaanermullu Naalakkersuisoqarfik aamma Isumaginninnermut Aqutsisoqarfik oqaaseqaqqullugit sapaatip-akunneri marluk ingerlanneranni saaffigisarpai.
Sermitsiap ilaatigut piumasaraa kommunini najukkanilu assigiinngitsutigut qanoq 2024-miit ullumikkumut ineriartortoqarsimanersoq, erseqqissaatigineqassasoq.
Apeqqut tamanna akineqanngilaq. Naalakkersuisoqarfiup akissut Isumaginninnermut Aqutsisoqarfimmit Kommune Kujallermiillu ataatsimoorlutik Sermitsiamut nassiunneqarsimasoq taperserpaa. Sulianik isumaginnittut ilinniartinneqarnissaat pineqarpoq, Narsami sualuppoq, tamannalu allaaserisami tulliuttumi atorneqassaaq. Pisorli sukumiinerusumik allaaserineqanngilaq.
Isumaginninnermut Aqutsisoqarfiup kommunillu paasivaat Kalaallit Nunaanni, ingammik nunaqarfinni mikinerusuni, isumaginninnermi sulisussarsiorneq unamminartuusoq. “Aamma Kujallermi taamaappoq, tassani sulisut piffissap ingerlanerani allanngorartuarput, atorfiillu inuttassarsiuunneqartarlutik.“
Akissut naapertorlugu "suliassat immikkut ilungersunarsinnaasut qullersanut ataatsimiititaliamulluunniit pineqartumut ingerlateqqinneqartarmata“, sulianik isumaginnittut ataasiakkaat aalajangiinernut pingaaruteqarnerpaanut kisimiillutik aalajangiineq ajorput.
Aammattaaq aqutsisut nakkutilliinerannik akisussaaffiinillu, uppernarsaatinik, sulianik ataqatigiissaarinermik, aaqqissuusseqqinnermik, aningaasaqarnermik tunniussinissamik allarpassuarnillu ajornartorsiutit, naalakkersuisoqarfiup aqutsisoqarfiulluunniit BDO-p nalunaarusiaa allaaserisamilu matumani ajornartorsiutit sammineqartut oqaaseqarfigerusunngilaat.
Kommune Kujallermi allaffeqarfiit aamma periarfissinneqarput nalunaarusiami pisut pillugit oqaaseqarnissaannut, allaaserisalli naammassinissaanut piffissaliussaq sioqqullugu kommune, akissuteqanngilaq.
Kommune Kujallermi sumiiffiit taakku pillugit oqaaseqartoqarusuppat Sermitsiamit tusarusuppavut.
