Naalakkersuisut Naviairip sumiiffissaa pillugu Danmarki isumaqatiginngikkaa
Naviairip timmisartunik nakkutilliivissaa nutaaq Nuup avataani inissinneqarsinnaanersoq misissuivigineqaqqissasoq Naalakkersuisut piumasaraat.
Nakkutilliivik Qaqortumi inissinneqarsinnaanersoq Naalakkersuisut misissuiffigitikkusukkaat Hans Peter Poulsenip (S) danskit naalakkersuisui nalunaarfigai.
Assi: Leiff Josefsen
Danskit naalakkersuisuisa Kalaallit
Nunaata silaannaanik nakkutilliivissamik pilersitsinissartik ukioq
manna siusinnerusukkut unitsikkallarpaat.
Allaqatigiinnerat
Sermitsiap suliamut atatillugu allakkat pingasut pissarsiarai.
Naalakkersuisup Hans Peter Poulsenip angallannermut ministeri Thomas Danielsen decembarip 15-iani allaffigaa.
Kangerlussuup Narsarsuullu inissiivigineqarsinnaannginnerat Naalakkersuisut tusaatissatut tigullugu Naviairip nakkutilliivissaa Nuup avataanut inissinneqarsinnaanersoq periarfissarsiornissaa Naalakkersuisut kissaatigigaat Naalakkersuisoq ilaatigut allappoq.
8. februaari: Thomas Danielsen Hans Peter Poulsenimut allappoq.
Angallannermut ministeri ilaatigut ima allappoq: "Naatsumik oqaatigalugu Naviair isumaqarpoq naliliinerup allanngortinneqarnissaa inerniliussamut ataatsimut allannguutaassanngitsoq. Nakkutilliivik Nuummi inissinneqartariaqarpoq. Kalaallit Nunaata ilarujussuani angallannermut teknikkikkut periarfissat killeqarneri ilaatigut tamatumunnga peqquteqarpoq."
Maajip 28-at: Nakkutilliivissat Qaqortumi inissisimanissaanik periarfissat misissorneqassasut, aamma naalagaaffiup misissuineq akilissagaa naalakkersuisoq angallannermut ministerimut allappoq.
Kalaallit Nunaat qulaallugu silaannaap
nakkutigineqarnera Canadamit Islandimillu maanna aqunneqarpoq,
2031-mili kunngeqarfimmit akisussaaffigineqalernissaa
sulissutigineqarpoq. Nakkutilliineq Naviairimit
ingerlanneqartussaavoq, Kalaallit Nunaannilu
aningaasarsiarissaarfiusunik suliffinnik pilersitsinissaa
naatsorsuutigineqarpoq.
Naalakkersuisut nakkutilliivik Nuummi
inissinneqassanersut allamiissanersorluunniit
isumaqatigiinngissutigimmassuk Danmarkimi naalakkersuisut suliniut
unitsippaat. Nakkutilliiviup inissarisinnaasaanik allanik
misissuinerit kiap akilertassanerai aamma isumaqatigiinngissutaavoq.
Tamanna attaveqaasersuutinut
naalakkersuisup Hans Peter Poulsenip (S) aamma Danmarkimi
angallannermut ministerip Thomas Danielsenip attaveqatigiinneranni
Sermitsiap pissarsiarisimasaani atuarneqarsinnaavoq.
Periarfissat allat misissorneqarput
Angallannermut ministeri allakkami ukioq manna februaarip arfineq-pingajuanni ullulerneqartumi allappoq "sumiiffissap toqqarneqarnissaa suliniutip aningaasaqarneranut nalorninartunullu allattorsimaffianut aalajangiisuulluinnarpoq.“ Sumiiffik isumaqatigiinngissutaammat ministerip suliniut unitsippaa.
Kangerlussuup Narsarsuullu nakkutilliiffiup inissisimaffigisinnaasaatut periarfissatut misissorneqarnissaat Naalakkersuisut siusinnerusukkut piumasarinikuuaat.
Naviairip sumiiffiit taakku misissuiffigereerlugit itigartippai Nuullu innersuussutigeqqillugulu. Naviairillu nalilersuinermini kingullermi timmisartunut nakkutilliivik Nuummi inissinneqarnissaa inerniliutigeqqippaa.
Tamannali Naalakkersuisunit naammagineqanngilaq, taakkualu suli kissaatigaat nakkutilliivissaq Nuup avataani inissisimassasoq.
Nakkutilliivik Qaqortumi inissinneqarsinnaanersoq Naalakkersuisut maanna misissortikkusuppaat. Tamanna naalakkersuisup Hans Peter Poulsenip maajip 28-ani allagaani atuarneqarsinnaavoq.
Naalakkersuisut: Misissuinerit amerlanerusut naalagaaffiup akilertariaqarpai
Allakkamini Hans Peter Poulsenip Qaqortup inissisimavissatut misissorneqartariaqarneranut pissutaasut arlallit eqqaavai, aamma Naalakkersuisut isumaqartut misissuinerit amerlanerusut Naalagaaffiup akilertariaqarai.
Angallannermut ministerip Thomas Danielsenip siusinnerusukkut oqaatiginikuuaa nakkutilliiviup sumi inissinneqarsinnaaneranik misissuisitseqqinnissat Naalakkersuisut namminneq aningaasaliivigisariaqaraat.
Tamanna qaammatip matuma naanerani ataatsimeeqatigiumallugu Naalakkersuisoq angallannermut ministerimut piumasaqarpoq.
Nuup mittarfiata illutaa iluaqutissartaqarlunilu suleqatigiinnermut sunniuteqarnissaa, pingaartumik timmisartuussinermi Greenland Airportimit aammali timmisartortitseqatigiiffinnik soorlu Air Greenlandimik suleqateqarnerup nukittorsarneqarneratigut iluaqutitaqassasoq Naviairip siusinnerusukkut ilisimatitsissutiginikuuaa.
Naalakkersuisut qitiusumik nakkutilliivik Nuup avataani inissinneqarnissaa kissaatigaat, ilaatigut "ingerlatsiviit inuiaqatigiinnut pingaarutillit nunatsinni siammarlugit inissinneqassasut suna tamaat Nuummi katersuutsinnagu," Hans Peter Poulsen siusinnerusukkut taama oqarnikuuvoq.
