Naalakkersuisut peqqissutsimut tunngatillugu isumaqatigiinniarneq aallartikkaat
Peqqissutsimut tunngatillugu isumaqatigiissut innuttaasut peqqinnissaqarfimmi periarfissaannut neqeroorfigineqarnissaannullu sinaakkutaasussaq ukiuni arlalinni politikkikkut oqaluuserineqarpoq. Naalakkersuisut Inatsisartuni partiinik peqqissutsimut tunngatillugu isumaqatigiinniarnissamut oqaloqateqarnerit maanna aallartippaat.
Arkivfoto: Leiff Josefsen
Kalaallit Nunaanni peqqinnissaqarfik ukiuni qulikkuutaani tatineqaqqavoq, maannalu Naalakkersuisut Inatsisartuni partiit peqqinnissaq pillugu isumaqatigiissummik nutaamik annertusisamillu pilersitsinissaq pillugu oqaloqatigileruttorpaat. Pilersaarusiornikkut siunissaq ungasissoq eqqarsaatigalugu pisariaqartunik allannguutissanut aqqutissiuisussamik pilersitsinissaq siunertarineqarpoq.
Maanna killiffik periarfissaajunnaartoq Naalakkersuisut isumaqarput. Isumaginninnermi aningaasaqarnermullu tunngatillugu aamma taanna oqaatigineqartarpoq.
Peqqissutsimut tunngatillugu isumaqatigiissusiorneq naalakkersuisooqatigiiffiusumi matumani siusissukkut suliaralugu aallartinneqarpoq. Taanna suliatigut tunngasunik workshoppertitsisarnikkut, peqqissutsimut ilisimasallit aamma suliaqartut attuumassutillit qitiusumik ajornartorsiutinut aamma peqqinnissaqarfimmut periarfissanik naleqartunik isummersoqataaffiulluni. Innuttaasut nunami angalalluni ataatsimiisinneqartarnerini isummersuuterpassuit katersorneqarsimasut isumaqatigiinniarnerni pingaarutilittut tunngavissatut aamma ilaatinneqassapput.
Aalajangiinerit ajornakusoortut pisariaqartulli
Peqqissutsimut Inunnullu Innarluutilinnut Naalakkersuisoq Anna Wangenheim (D) oqarpoq:
- Peqqinnissaqarfik inuiaqatigiinni pingaarutilittut inissisimasuuvoq. Qanga aaqqissugaaneq kisiat tunngavigalugu siunissaq pilersissinnaannginnatsigu nassuerutigisariaqarparput. Maanna aalajangiinerit ajornakusoortut pisariaqartinneqartulli aalajangiunnissaannut piffissanngorpoq, ataatsimoorlutalu taamaaliussaagut. Partiit innuttaasullu peqatigalugit peqqinnissaqarfik naapertuilluarnerusoq, piujuartitsinerusoq aamma nutaaliaasoq pilersissavarput
Naalakkersuisut politikkikkut ataatsimoorussamik isumaqatigiissutip ukiup naanerani saqqummiussinnaanissaa naatsorsuutigaat.
