Naalakkersuisut qangatut akuerineqartut
Inatsisartut inissitsiterlutik ippassaq ataatsimiinnerannit assit takukkit.
Inatsisartut qinigaaqqammersut kalaallisoorlutik seqinnarissuup ataani Annaassisitta Oqaluffianut ingerlaaqatigiipput.
Naalakkersuisut siulittaasuat Jens-Frederik Nielsen (D) aamma Inatsisartuni sivisunerpaamik ilaasortaq Hans Enoksen (N) saarliupput.
Politikerit amerlasuut qungujulapput innuttaasunullui takkuttunut ilaat aalateralutik.
Marsip aqqarngani qinersisoqareernerata kingorna Inatsisartut siullermeerlutik ataatsimiinneranut atatillugu ingerlaaqatigiittoqarpoq. Naalakkersuisunngortut akuersissutigineqartussaapput.
Inatsisartunut ilaasortanngortussat ataasiakkaat qinigaasinnaanerat aalajangiiffiginiarlugu nalunaaquttap-akunnera ataaseq affarlu matoqqasumik ataatsimeeqqaarput - ataatsimiinnerat ima sivisutigaaq perusuersarniarlutik unilaartariaqarlutik.
Tamatuma kingorna Kim Kielsen Inatsisartut siulittaasuattut qinerneqarpoq. Atuuffik taanna 2022-mi apriilimiit 2023-mi septembarimi aalisarnermut piniarnermullu naalakkersuisunngornissami tungaanut issiaffiginikuuaa.
Taasiniarlutik nikuittut
Inatsisartunut siulittaasoq akuersissutigineqareermat Naalakkersuisut nutaat akuersissutigineqartussanngorput.
NAALAKKERSUISUT NUTAAT
Naalakkersuisut siulittaasuat: Jens-Frederik Nielsen (D)
Aningaasaqarnermut akileraartarnermullu Naalakkersuisoq: Múte B. Egede
Nunanut allanut ilisimatusarnermullu Naalakkersuisoq: Vivian Motzfeldt (S)
Ilinniartitaanermut, kultureqarnermut, timersornermut ilageeqarnermullu Naalakkersuisoq: Nivi Olsen (D)
Inuussutissarsiornermut, aatsitassanut, nukissiuutinut, inatsisit atuutsinneqarnerannut naligiissitaanermullu Naalakkersuisoq: Naaja H Nathanielsen (IA)
Peqqissutsimut Inuit innarluutillillu pillugit Naalakkersuisoq: Anna Wangenheim (D)
Meeqqanut, inuusuttunut ilaqutariinnullu Naalakkersuisoq: Maasi Pedersen (IA)
Aalisarnermut, Piniarnermut, Nunalerinermut imminullu pilersornermut avatangiisinullu Naalakkersuisoq: Peter Borg
Isumaginninnermut, suliffeqarnermut nunamullu namminermut Naalakkersuisoq: Bentiaraq Ottosen (A)
Ineqarnermut, attaveqaasersuutinut isorliunerusunullu Naalakkersuisoq: Aqqaluaq B. Egede (IA)
Anna Wangenheimip naalakkersuisoqatigiit sinnerlugit Jens-Frederik Nielsen innersuuppaa.
Kim Kielsenip Inatsisartunut ilaasortat qangatut nikuillutik taaseqqullugit qinnuigai.
Jens-Frederik Nielsenip Naalakkersuisunut siulittaasunngornissaanut inuit 22-t akuersiniarlutik nikuipput. Illuatungiliuttut arfineq-pingasut isumaqataanatillu akerliunnginnertik nikuillutik aamma taasissutigaat.
Jens-Frederik Nielsen qiimaqaaq.
Assi: Hanna Hviid
Naalakkersuisunut ilaasortat akuerineqartussanngormata aamma taama pisoqarpoq. Taamaalilluni Jens-Frederik Nielsen Naalakkersuisunullu ilaasortat sinnerit akuersissutigineqarput.
Tamatuma kingorna Kim Kielsenip ataatsimiinneq unikkallartippaa. Inatsisartut Naalakkersuisunngortullu nikuikaapput pilluaqqusaarlutillu.
Allaaserisap qulaani assit takukkit.
