Naalakkersuisut siulersuisuni ilaasortaatitatik taarseraat

Ingerlatseqatigiiffimmi isornartorsiorneqaqisumi Greenland Airports Mittarfeqarfiit A/S-imi ullumi immikkut ittumik ataatsimeersuartoqarpoq.

Siulersuisuni ilaasortat Naalakkersuisunit toqqarneqarnikut maanna tamarmik taarserneqarput.

Taamaalilluni Kjeld Zacho Jørgensen siulersuisuni siulittaasutut tunuarpoq.

Jens Wittrup Willumsen siulersuisuni siulittaasunngorpoq.

Anni Thøgersen, Anette Grønkjær Lings aamma Kristoffer Plenge-Brandt siulersuisunut aamma ilaasortanngorput.

Jens Wittrup Willumsen silaannakkut angallanneq pillugu misilittagaqarpoq. Air Greenlandip siulersuisuini 2011-miit 2016-imut siulittaasuuvoq, maannalu Billundip mittarfiani siulersuisuni siulittaasup tulliatut atorfeqarluni.

Greenland Airportsimi danskit naalagaaffiat aamma marlunnik siulersuisunut ilaasortaqarpoq. Taakkua nikinngillat tassaappullu Merete Eldrup aamma Marlene Haugaard.

Ingerlatsinermi ajornartoornerit akuerineqarsinnaanngitsut

Naalakkersuisut siulittaasuat Jens-Frederik Nielsen (D) oqalugiarpoq. Siulersuisuni ilaasortat taarserneqarnissaannut aalajangerniarnini eqqarsaatigeqqissaarsimallugu oqarpoq.

Greenland Airportsimili ingerlatsinermi ajornartoornerit pisariaqanngitsut akuerineqarsinnaanngitsullu pisimasut oqarpoq.

- Qaqortumi Ilulissanilu assigusunik unammilligassaqartoqannginnissaa pingaaruteqarpoq, Jens-Frederik Nielsen oqarpoq.

Illoqarfinni taakkunani marlunni mittarfiit nutaat aappaagu ammarneqassapput.

Ingerlatseqatigiiffiit kalaallit innuttaasui pillugit pilersinneqarnikuusut siulittaasup erseqqissarpaa.

Pisortat tamarmik Kalaallit Nunaanni najugaqassasut aamma tikkuarpaa.

Nuummi pisunit ajunnginnerussasoq

Siulersuisuni siulittaasunngorlaaq Jens Wittrup Willumsen kingorna oqalugiarpoq.

Nuummi mittarfiup ammarneqarnera inuiaqatigiinnut tamanut sunniuteqartoq, mittarfillu suli unammilligassaqarfiusoq oqarpoq.

- Ilulissani Qaqortumilu mittarfissat atulersinneqarnissaat Nuummi pisunit ajunnginnerujussuussapput, oqarpoq.

Nuummi mittarfissuup nutaap ingerlanneqarneranut atatillugu Greenland Airports annertuumik isornartorsiorneqareersorlu ataatsimeersuartoqarpoq. 

Greenland Airportsimi ajornartorsiuterpassuit nalaanneqaqattaartut pissutigalugit Jens-Frederik Nielsenip siulersuisunut kinguneqartitsisoqarnissaa ilimasaarutiginikuuaa.

Naalakkersuisut suliffeqarfimmi Namminersorlutik Oqartussanit pigineqartumi siulersuisunik toqqaasarput.

Ataatsimeersuarnermi “Siulersuisunut qinersineq” aamma “allat” oqaluuserisassani allassimapput.