Ukioq ataaseq qaangiutereerpoq nalunaaquttap ingerlaarfiata allanngortinneqarneraniit, Naalakkersuisullu siulittaasuata Múte B. Egedep innuttaasut qisuariaataat assigiinngitsut maluginiarsimavai.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Ukioq ataaseq qaangiutereerpoq nalunaaquttap ingerlaarfiata allanngortinneqarneraniit, Naalakkersuisullu siulittaasuata Múte B. Egedep innuttaasut qisuariaataat assigiinngitsut maluginiarsimavai.
– Akerliusoqarpoq illuatungaanili aamma iluarinnittoqarluni. Siammasissumik oqallisigineqangaatsiartoq aamma paasinarpoq ulluinnarni inuunitsinni nalunaaqutaq isumalerujussuummat, Múte B. Egede oqarpoq.
Múte B. Egede aamma Danmarkip angallannermut ministeria Trine Bramsen piffissamik aqutsineq pillugu oqartussaaffik maajimi 2022-mi atsioqatigiissutigaat. Taamaalilluni Kalaallit Nunaat piffissamik aqutsineq akisussaaffigilerpaa.
Nalilersorneqassasoq
Nalunaaquttap ingerlaarfiata allanngortinneqarnerata kinguneranik isornartorsiutit inuit attaveqaqatigiiffianni takussaapput. Isornartorsiortuni nuisimasut ilagaat Qupanuk Olsen, taassuma nalunaaquttap uterteqqinnissaa anguniarlugu atsiornernik katersivoq. Qupanuk Olsenip atsiornernik katersai aammalu innuttaasut oqaaseqaataat nalunaaquttap ingerlaarfia kingumut uterteqqinnissaanut Naalakkersuisunut Inatsisartunullu ingerlateqqissamavai.
– Atsiornerit tigunikuuagut. Suli atsiornerit tigunagit Naalakkersuisuninngaanniit aalajangernikuuvugut nalilersuisoqartariaqartoq, taamaammat atsiornernik katersisimasoq aamma nalunaarfigineqarnikuuvoq. Qujaffiginikuuarput aamma naalakkersuisut qanoq iliulersaarneranik nalilersuilernitsinnik tunngasunik anngussivigalugu, Múte B. Egede oqarpoq.
Isornartorsiuisut ilagaat Parti Naleraq. Nalunaaquttap aalajangersarneqarnera inatsisartut ukiaanerani 2022-mi ataatsimiinnermi eqqartorneqarmat isornartorsiuutitik saqqummiuppaat. Isornartorsiutaannut ilaapput aningaasarsiorneq qitiutillugu innuttaasullu peqqissusaat eqqarsaatiginagit inatsit saqqummiunneqarsimasoq, Naalakkersuisulli siulittaasua isumaqataanngilaq.
– Taamatut siunertaqanngilagut, taamanikkut tusarniutigileratsiguli isigisarput aallaavigaarput pitsaasutullu isigisagut. Taamaammat aamma inatsisilioriaatsit allat assigalugit tusarniutigivarput inuiaqatigiinnnut isummersortoqarnissaanik aamma periarfissaq tassaniitinneqarluni.
Nunatsinni aasaanerani nalunaaquttamut tunngatillugu Justus Hansenip paragraf 37 atorlugu nuna tamakkerlugu assigiimmik nalunaaqutaqarnissaa pillugu apeqquteqarpoq, taamanimiilli siunnersuut toqqammavigalugu Inatsisartut inatsisaat piviusunngorsimavoq. Inuttaasulli ilaat isumaqarput aasaanerani ukianeranilu nalunaaquttamik nikisitsisarneq nunatsinnut naleqqutinngitsoq taamaammallu nikisitsisarneq atorunnaarnissaat piumasaqaatigalugu, Naalakkersuisulli Siulittaasuata EU utaqqeqqaarniarpaa, Inatsisartut aalajangernerat taama imaqarmat.
EU-mi Inatsisartut amerlanerussuteqarlutik marsimi 2019-imi aalajangerput EU-mi nunat ataasiakkaat 2020-mi aalajangertariaqaraat aasaanerani ukiukkullu nalunaaquttamik nikisitsisarneq 2021-mi atorunnaarsinneqartariaqarnersoq. Tamannali suli piviusunngunngilaq, ministerådimi Europa-Parlamenti isumaqatiginngimmassuk.
– Nalunaaquttamik allannguineq apeqquserneqarmat paasinarpoq, taamaammat aamma nunat allat utaqqinissaat pingaaruteqarpoq, atorunnaarsinneqassanersoq nalilersulerutsigu EU-p aalajangernera naliliinitsinni aamma ilaasussaammat, Múte B. Egede oqarpoq.
Aasaanerani nalunaaqutaq pillugu Namminersorlutik Oqartussat nalunaarutaat pillugu Naalakkersuisut martsip 27-ani ataatsimiipput, ataatsimiinnermilu aalajangerneqarpoq Naalakkersuisut Siulittaasuata Naalakkersuisoqarfia allanngortitsisinnaasoq aammalu aalajangersarnerit kingusinnerusukkut misisuiffigineqassassut.
