KL

DK

Naalakkersuisut siulittaasuata spiralilersuisimaneq inuiannik toqoraanertut taavaa

1960-ikkunni 1970-ikkunnilu niviarsiaqqat arnallu kalaallit tusintilikkaat spiralilersorneqarput.

Múte B. Egede isumaqarpoq, spiralilersuisimaneq oqallisaaqisoq tassaasimasoq inuiannik toqoraaneq.
Ritzaus Bureau
Saqqummersinneqarpoq

Spiralilersuisimaneq, tassanilu kalaallit niviarsiaqqat arnallu 1960-ikkunni 1970-ikkunnilu akuersitinneqarnatik danskinit nakorsanit spiralilersorneqarsimanerat, tassaavoq inuiannik toqoraaneq.

Naalakkersuisut Siulittaasuat Múte B. Egede (IA) DR-imi aallakaatitassiami "Deadline"-mi apersorneqarluni taamak oqarpoq.

- Tassa toqqaannartumik inuiannik toqoraanerusoq, danskit naalagaaffiata inuiannut kalaallinut ingerlassimasaa. Maanna tamanna oqaatigisinnaanngorparput, taanna oqarpoq.

Suliap misissorneqarnera maanna ingerlanneqarpoq, taamatuttaaq arnat 143-it danskit naalagaaffiat unnerluutigivaat.

Arnat taakk katillugit 43 millionit koruuninik naalagaaffimmit taarsiiffigineqarnissaminnik piumasaqarput inuttut pisinnaatitaaffimminnik unioqqutsitsisoqarnera tunngavigalugu.

Múte B. Egede DR-imut ilanngullugu oqarpoq, arnat eqqugaasut utoqqatserfigineqarnissaat tunngavissaqartoq.

Spiralilersuinermi niviarsiaqqat arnallu 4.500-it missaannik amerlassusillit eqqugaaasimapput, taakkunannga allaat niviarsiaqqat 13-inik ukiullit spiralilerneqarsimallutik - amerlasuut akuersiteqqaarnagit tamanna pisimalluni. Spirali tassaavoq naartunaveersaartitsiniutitut atorneqartartoq.

Misissuineq ingerlanneqarpoq

Arnat amerliartortut kingusinnerusukkut tusagassiuutitigut saqqummiussisarput spiralilerneqarsimallutik namminneq ilisimanngisaminnik.

Juuni 2022 aallarnerfigalugu eqqugaasimasut psykologimut imaluunniit psykoterapeutimut katsorsartissinnaanngorput akeqanngitsumik.

Spiralilersuisimaneq pillugu misissuinermi danskit naalakkersuisuisa aammalu nunatsinni Naalakkersuisut peqatigiillutik isumaqatigiissutigisimavaat 2025-imilu taanna naammassineqassasoq naatsorsuutigineqarpoq.

Misissuinermi qulaajarneqarpoq, politikkikkut aalajangiinerit suut tunngavigalugit spiralilersuineq aallartinneqarsimanersoq, taamatuttaaq qanoq iliorluni spiralilersuineq Kalaallit Nunaanni ingerlanneqarsimanersoq qulaajarneqarpoq, kiisalu Danmarkimi efterskolini niviarsiaqqanik pinngitsaaliilluni naartunaveersaasersuisimaneq ilanngullugu qulaajarneqarpoq.

Naalakkersuisut namminneq aamma misissuinermik aallartitsisimapput, 1992-ip kingorna pisimasut pillugit. Taanna aamma tulliuttumi ukioq naammassineqarnissaa naatsorsuutigineqarpoq, KNR allappoq.

Ilaatigut DR-ip podcastiani "Spiralkampagnen"-imi kiisalu allaaserisani arlalinni saqqummiunneqartarpoq. Tassani erserpoq, spiralilersuisimaneq tassaasimasoq naalagaaffiup periuserisimasaa Kalaallit Nunaanni innuttaasut amerliartornerisa annikillisarneqarnissaanik siulertaqarluni iliuusaasimasoq.

/ritzau/

folkedrab spiralkampagnen danmark samfund inuiaqatigiit múte b. egede

ATORFIIT Se alle jobs

Powered by Labrador CMS