Naammagittaalliortoqaraluartoq: Politikerip oqaaserisimasani aalajangiusimagaa
Rasmus Jarlov Aki-Matilda Høegh-Dam pillugu oqaaserisimasami tunuartinnissaannut pissutissaqanngitsoq isumaqarpoq. Politikkikkut oqallinnermi naammagittarsinnaasariaqarpoq, oqarpoq.
Rasmus Jarlov, Nuummi uani tikeraartoq, Folketingimi naggataarutaasumik oqallinnermi folketingimut ilaasortaq Aki-Matilda Høegh-Damilu (S) isumaqatigiinngissuteqarput.
Assiliisoq: Anders Rytoft
Folketingimut ilaasortap Aki-Matilda Høegh-Damip (S) folketingimut ilaasortaqatini Rasmus Jarlov Det Konservative Folkepartimeersoq pillugu Folketingip siulittaasoqarfianut naammagittaalliuuteqarniarluni tallimanngormat nalunaarutigaa.
Rasmus Jarlovip Folketingimi sapaatip-akunnerani matumani naggataarutaasumik oqallinnermi inuiaassusaa pillugu oqaaseqarnermigut killissani qaangeraa Aki-Matilda Høegh-Dam isumaqarpoq.
Rasmus Jarlov Sermitsiamut oqarpoq oqaaserisimasani aalajangiusimallugu:
- Politikkikkut oqallinnermi peqataagaanni naammagittarsinnaasariaqarpoq. Isornartorsiorneqarneq akuerisinnaasariaqarpoq, taamattoqartillugu akissuteqarluni, eqqunngitsuliortoqarsorigaannilu naqqiilluni.
- Tupaallatigissavarali siulittaasoqarfiup malittarisassat ilisimaneqartut saniatigut Folketingimi qanoq oqarsinnaaninnik paasitissappaga.
Kinaassutsimik apeqqusiinngitsoq
Aki-Matilda Høegh-Damip Rasmus Jarlovip Folketingimi oqaasii ilaatigut uku ajuallaatigai: "..siorna aasakkut Kalaallit Nunaanniikkama nunnaarutigeqisannik Fru Damip ilaqutai naapippakka. Ilaqutariit tamarmik Nuummi katersortarfimmi uannut apersuiartornerini oqaloqatigilluaqattaarpakka, taamaammat ilaqutariit taakku qallunaajulluinnartut nalunngilara.“
Apeqqut: Illit ilaqutai qallunaajunerarlugit oqaaseqarsimanerit aallaavigalugu inuiaassusini qallunaajutinniarneqartutut misiginera naapertuilluarsoraajuk? Folketingimi oqallinnermi inuttut nammineq atukkat pillugit Folketingimi oqallinneq naapertuilluarnerua?
- Aap, taama isumaqarpunga. Ajoraluartumik qallunaajuneq mitaatiginertut isigimmagu ajuusaarutigaara. Taamatut isumaqanngilanga. Assortornianngilara kalaaliusutut imminut isiginera, tamannalu kinaassuserigaa.
- Kinaassusianik arsaarniarnianngilara. Kisiannili ilumoorpoq qallunaatut oqallorittorujussuummat. Oqaaserisani qallunaatut uteqqittariaqartarneri sakkortusoq qassiiliutigerujussuarpaa, Rasmus Jarlov oqarpoq.
Nutserisoqarnissamut siunnersuut taperseraa
Apeqqut: Ajornartorsiulli tassaavoq oqallinneq inuiaassusaanut saatsinneqarnera — tamassuma ajornartorsiutitaqarnera takusinnaaviuk?
- Naamik, taamaaliorsinnaanngilanga, Rasmus Jarlov oqarpoq.
Aki-Matilda Høegh-Damip Folketingimi kalaallisut oqalussinnaalernissamik kissaateqarnera anguniagaqarneralu Rasmus Jarlovip taperserlugu naqissuserpaa:
- Kalaallisut oqalussinnaanissaa tapersersortarpara sulilu tapersersorlugu.
- Aamma pitsaanerusumik nutserisoqarnissamik periarfissaqartinneqarsinnaanissaa takorusukkaluarpara. Tamanna folketingimit akilerneqartariaqarpoq, taanna siunissamilu allat Folketingimi kalaallisut oqalussinnaasariaqarmata, tassaammat qallunaat folketingimi ilaasortat Kalaallit Nunaat pillugu aalajangiisartut, taamaattumik isumaqarpunga kalaallisut oqaluttoqarsinnaasariaqartoq, Rasmus Jarlov oqarpoq.
