Naammagittaalliuutinik aalajangiisarfik: Allattorsimaffiit naammaginanngitsumik suliarineqartarnerat isornartorsiorneqarpoq

Kalaallit Nunaanni Tarnimikkut Nappaatillit Maalaarutaannik Aalajangiisartut, naammagittaalliuutinik pinngitsaaliilluni unitsitsinermut aamma pinngitsaaliilluni nakorsaasersuinermut tunngasunik sulianik katillugit aqqaneq-marlunnik 2024-mi aalajangiiffigisaqarsimapput.

Kalaallit Nunaanni Tarnimikkut Nappaatillit Maalaarutaannik Aalajangiisartut 2024-mut ukiumoortumik nalunaarusiaani tamanna atuarneqarsinnaavoq, taannalu nakorsaaneqarfiup nittartakkamini saqqummiuppaa.

- Aalajangiinerni aqqaneq marlunni pinngitsaaliissummik iliuuserisaq Aalajangiisartut akueraat, ilisimatitsissutigineqarpoq.

Tassa naammagittaalliuutit aqqaneq-marluk tarnimikkut napparsimasut uninngaviannit katsorsarneqartunit naammagittaalliuutigineqartut misissoreerlugit, sulisut iliuuserisimasaat pisussaaffiit malillugit ingerlasimasut nalilerneqarput.

Marluk isornartorsiorneqartut

Taamaakkaluartoq suliani marlunni maalaarutinik aalajangiisartut isornartorsiuipput. Suliani taakkunani marlunni napparsimasup allattorsimaffianut nalunaarsuinerit pineqarput:

- Aalajangiisartut suliami ataatsimi nakorsaanerup allagai napparsimasup qanoq inneranik nassuiaatitaqanngimmata, amigaateqarnerarlugit isornartorsiuipput. Naggataagut suliami ataatsimi nakorsaanissamut pilersaarusiortoqarsimannginnera, Aalajangiisartunit isornartorsiorneqarpoq.

Tamatuma saniatigut Aalajangiisartut suliami ataatsimi, allattugaatinut nalunaarsuinermut unitsitaanermullu atatillugu pappiaqqanik misissuinermi peqqissaarneroqqusipput.

Maalaarutinik aalajangiisartut aamma erseqqissaapput ilisimalluarlugu tarnimikkut napparsimasut uninngavianni sulisunik amigaateqarneq ajornartorsiutaasoq:

- Allaffissornikkut pissutsit suli pitsaasumik ingerlanngillat taamatuttaaq immikkoortortami ilinniagaqassutsikkut unammilligassat annertuut iliuuseqarfiginissaannut suliassanullu tarnimikkut nappaatillit pillugit inatsimmut attuumassutilinnut ilinniarsimasunik pisarialinnik atorfinitsitsiniarnermut atatillugu, annertoqisunik unammilligassaqarnera, taamaalillutillu akuttunngitsunik taartaasartunit tamakkiisumik piginnaaneqanngitsunit isumagineqartarnerat, Aalajangiisartunit maluginiarneqarluni.