Naatsorsueqqissaartarfiup ilimagisaa suli taamaattoq

Nunatsinni inunngorsimasut 2050-imi 20 procentinik ikileriarsimassapput. Tamanna Naatsorsueqqissaartarfiup innuttaasunik naatsorsuinerani nutaami takuneqarsinnaavoq.

Kalaallit Nunaanni inunngorsimasut nunami najugaqartut ukiup aallartinnerani 49.738-upput. Siulittuutit eqquuppata 2049-mi kisitsisit taakku 39.682-inut appariassapput.

Naatsorsuutilli taakku inerneri nalorninartoqartut Naatsorsueqqissaartarfik allappoq.

AAMMA ATUARUK

Missingersuut: Innuttaasut agguaqatigiissillugu utoqqaliartorput – Nunatsinni inunngortut ikiliartorput

Siulittuutaasut nutaarsiassaanngillat. Naatsorsueqqissaartarfik siorna aamma taama ilimasaarivoq. Innuttaasut Kalaallit Nunaanni inunngorsimasut 2049-p tungaanut tallimariaammik ikiliartussasut tassani siulittuutigineqarpoq.

Suna pissutaava?

Kalaallit Nunaanni inunngortut ikiliartornerat arlalinnik pissuteqarpoq. Ilaatigut meeqqiornikinnerulerneq pissutigalugu ukiut qulit qaangiuppata ukiumut inunngortut 600-juusassasut naatsorsuutigineqarpoq. Ukiut qulit matuma siorna 800-juupput.

Aammattaaq nunanut allanut nutserneq suli ingerlavoq. Ukiuni 30-ni kingullerni agguaqatigiissillugu ukiumut inuit 367-it Kalaallit Nunaanniit nuuttarput. Innuttaasut ukioq manna nuussimasut maanna 1000-it angusimavaat.

2050-ip tungaanut inuit ukioqqortunerulersimasussaagaluartut aamma 1960-ikkunni inuusimasut toqusartut amerliartornerat pissutaalluni naatsorsuinerit taamatut isikkoqarput.

Naatsorsueqqissaartarfiup innuttaasut Kalaallit Nunaanni inunngorsimasut najugaqartullu kisimik ineriartornissaat naatsorsuutigaa. 2025-misut innuttaasut Kalaallit Nunaata avataani inunngorsimasut ukiut tamaasa allanngornavianngillat.

Ukiuni 25-ni tulliuttuni Kalaallit Nunaannut nunasisut amerlassusaat politikkikkut aningaasaqarnikkullu aalajangiinernit aalajangiiffigineqangaatsiartarmat.

Taamaattumik Kalaallit Nunaanni innuttaasut qassiussanersut siumut oqaatigiuminaassinnaasarpoq.