NAATSORSUUSERISUUSIMASUMUT EQQARTUUSSINEQ
Naatsorsuuserisuusimasoq ukiuni pingasuni pineqaatissinneqarsimasunut inissiisarfimmiittussanngorlugu eqqartuunneqarpoq
KNI A/S-imi naatsorsuuserisuusimasumut eqqartuussinerup inernera sisamanngornermi nalunaarutigineqarpoq. Peqquserluuteqarsimasutut allakkanillu eqqunngitsumik suliaqarsimasutut pisuutinneqarluni ukiuni pingasuni pinerluuteqarsimasunut inissiisarfimmiittussanngorlugu eqqartuunneqarpoq. Illersuisup unnerluussisussaatitaasullu Nunatta Eqqartuussisuuneqarfianut suliassanngortippaat.
Dorthea Reimer-Johansen
- Taamaattumik eqqortuutinneqarpoq (...) ukiuni pingasuni pineqaatissinneqarsimasunut inissiisarfimmiittussanngorlugu pineqaatissinneqassasoq.
Ulluni tallimani eqqartuussineq naammassivoq. Unnerluutigineqartoq KNI A/S-imi naatsorsuuserisut pisortaattut atorfeqarnermini peqquserlussimasutut allakkanillu eqqunngitsumik suliaqarsimasutut pisuutippaa.
Eqqartuussiviup aalajangernerminut peqqutaa
KNI A/S-imi atorfeqartut marluk ilisimannittutut nassuiaataat eqqartuussiviup tutsuiginartutut nalilerpai, taamaattumillu nassuiaataat tunngavigalugit unnerluutigineqartoq pisuutinneqarluni eqqartuunneqarpoq.
Unnerluutigineqartoq unnerluussummi tamanut pisunut pisuutinneqarpoq.
Pisortaaneq iluarisimaarinnittoq
KNI A/S-imi pisortaaneq, Jeppe Jensen, KNI A/S-imilu siulersuisuni siulittaasoq, Inger Eriksen eqqartuussinerup inernera paasiniarlugu eqqartuussivimmi malinnaapput.
Eqqartuussinerup inernera pisortaanerup iluarisimaarpaa:
- Unnerluutigineqartoq KNI-mi atorfeqarnermi nalaani eqqunngitsuliorsimasoq isumarpugut, taamaattumik 2021-mi politiinut suliassanngortitsilluta nalunaaruteqarpugut. Tamatumunnga eqqartuussiveqarfiup isumaqataanera naammagisimaarpara.
- Eqqunngitsuliorluni iliuuserisimasaminut kiisalu KNI-mut ajoqusiinini suliffeqarfimmullu isiginerlunneqaatissiinerminut maanna akisussaatinneqarnera pissusissamisoorpoq, Jeppe Jensen oqarpoq nangillunilu:
- Suliaq tamannarpiaq tunngavigalugu, taamatullu pisoqaqqinnginnissaa anguniarlugu, KNI A/S-imi suleriutsit naleqqussaaviginikuullutigit aningaasaqarnermilu sukannersumik nakkutilliinermik ingerlatsinerput oqaatigissavarput. 2021-mi KNI aalajangerpoq sulisunik aqutsinermik suliaqartussanik atorfinitsitsisoqassatillugu pinerluuteqarsimannginnermut uppernarsaammik atorfinittussat peqartassasut.
Eqqartuussinerup ingerlanerani naatsorsuuserisuusimasoq siornatigut aningaasanik millionilikkaanik nalilinnik Danmarkimi suliffeqarfimmi atorfeqarnermini peqquserlussimasutut siornatigut pineqaatissinneqarsimasoq paasinarsivoq.
Suliaq Nunatta Eqqartuussisuuneqarfianut suliassanngortippaa
Illersuisup sullitami pinngitsuutinneqarnissaa anguniarlugu suliaq Nunatta Eqqartuussisuuneqarfianut suliassanngortippaa.
Akerliani aamma unnerluussisussaatitaasup suliaq sakkortusaaviginiarlugu Nunatta Eqqartuussisuuneqarfianut suliassanngortippaa.
