Najukkani sanaartugassanik suliassinneqartartut inuusuttunut inissialiortuussasut

Kullorsuarmi, Qasigiannguani Narsamilu inuusuttut inersimasutut inuunerminnik aallartitsilluarnissaminnut periarfissaqarluernerulertussanngungajalerput. Inatsisartummi Aningaasaqarnermut Akileraartarnermullu Ataatsimiititaliaata Naalakkersuisut inoqarfinni taakkunani pingasuni inuusuttunut inissialiornissamut aningaasanik atugassanngortitsinissamik noqqaassutaat akueraa.

Tamatuma ilutigisaanik tassa suliarinninnissamut isumaqatigiissutit atsiorneqarsinnaalerput, atortussat inniminnerneqarsinnaalernerput sanaartornissarlu aasaq manna aallartinneqarsinnaalerpoq. Inuusuttunut inissiassat 2026-p naanerani atulissangatinneqarput.

– Taamaattumik inuusuttut pisariaqartitaminnut naleqqussakkanik inissiartaarsinnaalersillugit, inuusuttut inissiassaannik amerlanerusunik sanaartornerit maanna aallartissinnaaleratsigit nuannaarutigaara, Ineqarnermut, Attaveqaasersuutinut Isorliunerusunullu Naalakkersuisoq Aqqaluaq B. Egede oqarpoq.

Najukkani sanaartugassanik suliassinneqartartut inissiliortuussasut

Inoqarfinni taakkunani pingasuni najukkani sanaartugassanik suliassinneqartartut neqeroortitsinermi ajugaasuupput. Inissiassat taakkua najukkani pissutsinut teknikkikkullu periarfissanut naleqqussarneqarsimasuussapput:

• Kullorsuarmi kuuffittaqanngitsunik perusuersartarfissalinnik imiisivissalissalinnillu marlunnik inissialiortoqassaaq.
• Qasigiannguani ukioq kaajallallugu imermik pilersorneqartartussanik, kuuffissuaqartussanik avataaniillu kiassarneqartartussanik pingasunik inissialiortoqassaaq.
• Narsami kuuffissuaqartussanik imermillu naqitsineq atorlugu pilersorneqartartussanik sisamanik inissialiortoqassaaq.

Inuusuttuunermiit inersimasunngornermut alloriarfissatut siunniussaasut

Inuussuttunut inissiassat inissianik aaqqissuussinermut najoqqutassiamut, illoqarfinni minnerni nunaqarfinnilu inuusuttunut inissialiornissamik ajornannginerulersitsillunilu aningaasatigut piviusorsiornerusuusumut ilaapput. Taakkua mingutsitsinnginerunissaq, pitsaassussuseq inuiaqatigiillu ukkataralugit sanaartorneqassapput – inuusuttuunermiillu inersimasunngornermut alloriarfissatut atuunnissaat siunnissaalluni.

– Inoqarfinni mikinerusuni inuusuttut pisariaqartitaannut naleqqussakkanik inissianik pisariaqartitsineq iliuuseqarfigissallugu, taamaalillunilu inuusuttut inersimasunngornerminni aalajaatsumik aallartinnissaminnut tunngavissinneqarnissaat inuusuttunut inissiassanut najoqqutassiap siunertaraa, Aqqaluaq B. Egede nassuiaavoq.

Inuusuttunut inissiassat 45 m²-t missaannik angissuseqartussat sinittarfeqassanngillat, tamanik suliaqarfiusinnaasumik igaffiup affarliaqassapput, uffarfeqassapput/perusuersartarfeqassapput isersimaartarfeqassallutillu igaffilimmik, nerisarfilimmik, nalaasaarfilimmik iikkamilu qarajarluusanngorlugu siniffilialimmik. Attartortussat iserternissaminnut aningaasartuuterpassuaqartariaqaqqunagit, inuusuttunut inissiassat tamarmik assigiissaartunik pisatsersorneqassapput. Qerititsiisiviusinnaasumik piniarnermullu atortuusiviusinnaasumik aamma queqassapput.