Nakorsat nittartakkatigut attaveqaqatigiittarfinni nikanarsaanermut mianersoqqusisut

Peqqinnissaqarfimmi sulisunik nikassaanerit peqqinnissaqarfiullu nittartakkatigut attaveqaqatigiittarfinni sakkortuumik isornartorsiorneqartarnerat sulisussarsiornermi ajornakusoornerulersitsisarput. Kalaallit Nunaanni Nakorsat Peqatigiiffianni Peqqinnissamut politikkimut ataatsimiititaliaq allappoq.

Ataatsimiititaliaq peqqissutsimut naalakkersuisumut ammasumik allagaqarpoq. Peqqinnissaqarfimmi aqutsisut politikkikkullu siuttut peqqinnissaqarfimmi sulisunik tapersersuinerusariaqartut nakorsat isumaqarput:

- Nunatsinni peqqinnissaqarfimmi sulisutut aqutsisunit tapersersorneqarluta assinik sakkortusinnaasunik misigissutsitigullu sunniuteqartunik nittartakkatigut naapittarfiisigut nittarsaassitinnatik eqqarsaqqaartariaqartut innuttaasunut oqariartuuteqarnissaat pisariaqartipparput.

- Taama amerlatigisunik illuatungaanik oqaaseqartoqarani nittarsaassisoqaraangat Kalaallit Nunaanni inuiaqatigiinnut peqqinnissaqarfimmullu ajorluinnartumik kinguneqartarpoq. Pisummi nalinginnaasumik marlunnik sammiveqartarpoq uagulli sulisutut nammineq oqaaseqarsinnaasanngilagut, ataatsimiititaliamit allakkani allassimavoq.

Nipangersimasussaatitaasut

Peqqinnissaqarfimmi sulisut nipangersimasussaatitaagamik kikkunnilluunniit atuarneqarsinnaasunik isornartorsiuisoqartillugu akissuteqarsinnaasaratik Nakorsat erseqqissaatigaat.

- Napparsimasup naammaginartumik passunneqarsimannginneranut atatillugu innuttaasunit isornartorsiuinerit akissuteqarfigineqanngikkaangata toqqorternermik aallaaveqartanngilaq kisiannili pissutsit eqqaaneqareersut pissutaasarlutik. Akissuteqarniarutta sulinissamik akuersissuterput suliffippullu annaasinnaavarput, nakorsat Peqqissutsimut Ataatsimiititaliami ilaasortat allapput.

Nakorsat naapertorlugit inuit attaveqaqatigiittarfiisigut nikanarsaasarneq pissutigalugu sulisut pisariaqartinneqartut Kalaallti Nunaanni peqqinnissaqarfimmit soraarsimasut amerlareerput:

- Uaguttaaq sulisut aalajangersimasut Kalaallit Nunaanni ilaquttavut najuinnarnissaat imminut akilersinnaanersoq eqqarsaasersuutigisarparput, nakorsat ataatsimiititaliaannit oqaatigineqarpoq.

Peqqinnissaqarfik ukiorpassuarni oqallisigineqartarpoq. Peqqinnissaqarfiup immikkoortuini aalajangersimasuni nukittorsaanissaq siunertaralugu politikerit peqqinnissaq pillugu siorna isumaqatigiissuteqarput.