Nalaagaaffiit Peqatigiit pillugit immikkut ilisimasallip pisinnaatitaaffiit unioqqutinneqarnerat ernummatigaa
Naalagaaffit Peqatigiit inuit pisinnaatitaaffii pillugit immikkut ilisimasallip Cecelia Baillietip Kalaallit Nunanni Danmarkimilu ulluni aqqanilinni tikeraarnerminut atatillugu arlalinnik kaammattuuteqarpoq.
Naalagaaffiit Peqatigiit pillugit immikkut ilisimasalik Cecilia Bailliet i Danmarkimut Kalaallit Nunaannullu ulluni 11-ni tikeraarpoq. Assimi ICC-meersoq Sara Olsvig aamma UNICEF Kalaallit Nunaanneersoq Tina Dam takuneqarsinnaapput.
UNICEF
Meeqqat pisinnaatitaaffiinik qulakkeerinninnissaq kiisalu Kalaallit Nunaanni Danmarkimilu atugarliortunik immikkoortitsisarneq pinaveersaartinniarlugu suli suliassarpassuaqarpoq.
Naalagaaffiit Peqatigiit inuit pisinnaatitaaffii nunallu tamalaat ataqatigiinnerat pillugit immikkut ilisimasalik arlaannaannulluunniit attuumassuteqanngitsoq Cecilia Bailliet taama naliliivoq.
Taanna Danmarkimut Kalaallillu Nunaannullu ulluni aqqanilinni angalavoq, Naalagaaffiit Peqatigiillu pillugit immikkut ilisimasallip inuit atugarliortut pisinnaatitaaffii pillugit ernumassuteqarpoq:
- Danmarkimi Kalaallit Nunaannilu inuit atugarliortut, ilaatigut inuit innarluutillit, meeqqat, arnat, LGBTI-t, nunasisut, qimaasut, ikinnerussuteqartut nunallu inoqqaavi pillugit ernummateqarpunga. Taakku naalagaaffimmit naalakkersuisunillu illersorneqarnissaat kingusinaartumik pisarnerat pissutigalugu inuit pisinnaatitaaffii pillugit isumaqatigiissutit tunngaviusut tamakkiisumik atuutsinneqannginnerat ernumassutigaara, Cecilia Bailliet 'End of Mission Statement'-imi oqaaseqarnermini ilaatigut oqarpoq.
Ikiuineq pitsaanerusoq ujartoraa
Naalagaaffiit Peqatigiit aallartitaata meeqqat pisinnaatitaaffii ukkatarimmagit Naalagaaffiit Peqatigiit meeqqanut aningaasaateqarfiata UNICEF-ip, UNICEF-illu Kalaallit Nunaanni immikkoortortaqarfiani pisortap Tina Damip naammagisimaarpaa:
- Naalagaaffiit Peqatigiinni paasisimasaqarluartup oqariartuutaasa meeqqat pisinnaatitaaffiinik suliaqarnitsinni suli suliassaqangaatsiartugut ersersippaa, naak Kalaallit Nunaanni Naalagaaffiit Peqatigiit Meeqqat Pillugit Isumaqatigiissusiaata atuutilerneranit ukiut 30-t sinnereersimagaluarai, tusagassiutinut nalunaarummi Tina Dam oqarpoq.
Arnanut meeqqanullu nakuusertarneq kinguaassiuutitigullu atornerluisarneq akiorniarlugu iliuuseqartoqarnerusariaqartoq Cecillia Baillietip ilaatigut tikkuarpaa UNICEF allappoq. Meeqqat pinerluttuliorfigineqarsimasut, pinerlunnermut takunnissimasut allatigulluunniit misigissutsikkut anniaateqalersimasut pitsaanerusumik ikiorneqarnissaat taassuma ujartorpaa.
Ilumoortussaq pillugu isumalioqatigiissitaq isummallu pigiliuteriikkat unitsillugit
Naggueqatigiit inuit aamma Kalaallit Nunaanni inatsisartut ilumoortussaq pillugu isumalioqatigiissitamik pilersitsinissaq oqaloqatigiissutigeqqullugu kaammattorsimallugit Cecilia Bailliet Naalagaaffiit Peqatigiit nittartagaani nalunaarummi nassuiaavoq. Kalaallit danskit akisussaaffiini sullinneqartut isummanik pigiliuteriikkanik aallaaveqartumik pineqartarnerat iliuuseqarfigineroqqullugu aamma kaammattuutigaa.
'End of Mission Statement' saniatigut tikeraarnermit nalunaarusiaq annertunerusoq aappaagu saqqummersinneqassaaq, tassungalu atatillugu Naalagaaffiit Peqatigiit Inuit Pisinnaatitaaffii pillugit Siunnersuisoqatigiivinut saqqummiunneqassalluni.
