Naleqqami politikeri nuimasoq sassaqqinnianngilaq
Naleqqami politikeri Jens Napãtôk tulliani Inatsisartunut qinersisoqalerpat sassarnianngilaq.
Jens Napãtôk' tulliani Inatsisartunut qinersisoqalerpat sassarnianngilaq.
Leiff Josefsen
Naleqqami politikeri nuimasoq Jens
Napãtôk’, tulliani Inatsisartunut qinersisoqalerpat sassarniarani
Facebookimi allappoq.
Sermitsiamut ima nassuiaavoq:
- Hans Enoksenip kaammattuineratigut
2018-imi piffissaq kingulleq atorlugu Upernavimmi
qinigassanngortippunga.
- Taasisoqarnissara
naatsorsuutigisimanngilara, kisianni qinigaavunga, qinigaaffinnilu
marlunni ilaasortaallunga. Maanna utoqqaanerulerpunga nutaamillu
misileerusullunga, Nalerarlu maanna nukittummat nukiit inuusunnerusut
ingerlatitseqqissinnaapput, 57-inik ukiulik Jens Napãtôk’
oqarpoq.
Allamik
misiliiniartoq
Parteeqatiminut aamma pingaartumik
qinersisartuminut naapertuilluartumik perusukkami maanna taamatut
nalunaaruteqarnerarpoq.
Kingullermik 6. april 2021
Inatsisartunut qinersisoqarpoq, taamaattumillu ukiup ataatsip iluani
qinersisoqartussaavoq.
Jens Napãtôk’ naalakkersuinermik
suliaqarnermi saniatigut ilinniartitsisuuvoq, tamannalu
ingerlateqqissagunarpaa:
- Politikki piffissarujussuarmik
atuiffiusarpoq. Naalakkersuinikkut pitsaasumik suliaqarniaraanni
ulloq unnuarlu tamakkingajallugit malinnaasoqartariaqarpoq. Maanna
qanoq pisoqassanersoq piffissap takutikkumaarpaa, politikeri oqarpoq.
Inatsisartuni
pissutsit naammaginngikkai
Jens
Napatôk’ nangilluni oqarpoq Inatsisartuni qinikkat atugaat
naammaginagit tamanna aamma aalajangiinissaminut sunniuteqartoq.
Qinikkat
sunniuteqarpianngitsut aamma atorfilittanit Naalakkersuisunillu
sunniuteqarfigineqartorujussuusut, taanna isumaqarpoq:
-
Sunniuteqarsinnaanera killeqartorujussuanngornikuuvoq.
Siunnersuutinik arlalinnik saqqummiussinikuuvunga, ukioq mannalu
siunnersuutiga teknikkikkut misissorneqareerluni akuerineqarpoq,
naggataatigulli siulersuisoqatigiit itigartippaat.
-
Pisortatigut ingerlatsineq annertuallaalersimavoq, taanna oqarpoq.
Kanngunartuliortarsimanerit
Jens Napãtôk’
qinikkatut sivisuumik sulisimavoq, ilaatigut Ittoqqortoormiini
borgmesteriunikuuvoq.
2000-ikkunni
Naalakkersuisunut ilaasortaasimavoq, pisortalli aningaasaataannik
atornerluisimanera pissutigalugu anisitaavoq, tamannalu pillugu
2007-imi qaammatini sisamani pineqaatissinneqarsimasunut
inissiisarfimmiittussanngorlugu eqqartuunneqarpoq.
2018-imi
nuna tamakkerlugu politikkimut uteqqippoq 128-nillu taaneqarluni
qinigaavoq. 2021-mi 324-nik taaneqarpoq.
Hans
Enoksen 2022-mi Naleqqami siulittaasutut tunuarmat Jens Napãtôk
siulittaasutut qinigassatut ilimagineqartut ilagaat, Pele Brobergili
siulittaasunngorpoq.
Jens
Napãtôk’ Avannaata Kommuniani kommunalbestyrelsimut ilaasortatut
kommunimi politikkimik suliaqarnini maannamut ingerlatiinnarpaa.