Naleqqami siulittaasoq kommunalbestyrelsimi ilaasortaassanngilaq

Naleqqami siulittaasoq Pele Broberg Qeqqata Kommuniani kommunimut apriilip aallaqqaataani qinersinissamut qinigassanngortippoq.

121-nit qinerneqaraluarluni kommunalbestyrelsimi ilaasortatut tunuarpoq.

AAMMA ATUARUK

Pelep naalakkersuisooqatigiinnissamut isumaqatiginninniarnerit pakatsissutigigai

Qinersisoqarnissaanut aqaguttoq Facebookikkut qinersisartuminut tamanna nalunaarutigaa.

Ilaquttanilu Nuummut uteqqilerlutik allatamini nalunaarutigaa.

- Ulloq sorliussanersoq suli nalugaluarlugu, maanna avammut nalunaarutigivara qinersisartut aqangu qinersinissaat eqqarsaatigalugu, Pele Broberg allappoq.

Nulia Malene Broberg Kalaallit Nunaanni Brugsenimi aningaasaqarnermut pisortatut maajip aallaqqaataani atorfinissaaq. KNB tusagassiuutinut nalunaarummi allappoq.

- Qilanaarpunga KNB-imi atorfimmi nutaami sulilernissannut, tassuunakkullu aamma Kalaallit Nunaanni inuiaqatigiinni suliffeqarfimmut pingaarutilerujussuarmik inissisimasumuttunniussaqarnissannut, Malene Broberg tusagassiorfinnut nalunaarummi oqarpoq.

Allannguerusuttoq

Pele Broberg kommunimi ineriartortitseqataarusulluni qineqqusaarsimalluni nassuiaavoq.

- Sineriammi inuerusaaneq akuersaaginnarnagu, maanna najungaqarfigisatsinni Sisimiuni maluginiakkat arlaqartut nikisitsinissaanut peqataaffiginissaa piumassuseqarfigalugu qinigasanngortippunga.

Naleraq sinnerlugu kommunimut qinigassanngortittut qutsavigai.

Pele Brobergili politikkimut tunuanngilaq. Inatsisartunut marsip aqqarngani qinersinermi Naleraq sinnerlugu qinigaavoq, partiilu arfineq-pingasunik ilaasortaatitaqarluni Inatsisartuni amerlanerussuteqartut tulliattut inissilluni.