UKIAANERANI ATAATSIMIINNEQ 2025
Naleraq: Danmark suleqatigerusupparput – kisianni naligiimmik tamanna pissaaq
Kalaallit Nunaata Danmarkillu akornanni pissutsit pillugit Naleraq isummersuutini pillugit immikkut maluginiarneqartarpoq. Tamannalumi aamma Inatsisartut ukiakkut ataatsimiinneranni pissagunaannaavoq, tassami partiip Danmarkimut tunngatillugu arlalissuarnik siunnersuuteqarpoq.
Tallimanngornermi Naleqqap Inatsisartut 2025-mi ukiakkut ataatsimiinnissaannut siunnersuutit 43-it avammut saqqummiuppai. Taamaattorli tamarmik iluatsissanersut nalunarallarpoq, tassami Inatsisartut siulittaasoqarfiannit siunnersuutit tamarmik nalilerneqarlutillu aalajangiiffigineqarnissaat suli naammassineqanngimmat.
Assiliisoq: Jensine Berthelsen
Naleraq kisimi aalajangiisuusinnaagaluarpat, taava Kalaallit Nunaata namminiilivinnissaanut tunngatillugu siuariarnerujussuaq pissagaluarpoq.
Partiimmi tassunga atatillugu siunnersuutigaa naalagaaffinngornissamut suliaq piffissalerneqassasoq, taamatuttaaq partiip siunnersuutigaa Inatsisartut aalajangissagaat "§21 tunngavigalugu isumaqatigiinniarnerit" aallartinneqarnissaat tassungalu atatillugu Danmarkimut isumaqatigiissuteqartoqassasoq namminiilivinnissamut pilersaarutit ingerlanneqassanersut.
Qinigaaffiup siuliani namminiilivinnissamut naalakkersuisoqarfik pilersinneqarsimavoq, kisianni qinersinerup nutaap kingorna tamanna attatiinnarneqanngilaq, Naleqqap tamanna allanngortikkusuppaa, partiimmi Inatsisartuni ilaasortaatitaa Aki-Matilda Høegh-Dam siunnersuuteqarpoq naalakkersuisoqarfik pilersinneqaqqissasoq.
Taamatuttaaq partiip siulittaasua Pele Broberg siunnersuuteqarpoq Kalaallit Nunaata siunissami inatsit tunngaviusussatut suliaq nangillugu suliarineqassasoq.
Allatut oqaatigalugu namminiilivinnissamut suliaq sukkatsinneqassaaq Nalerqqap siunnersuutai Inatsisartuni suliarineqartussanngorlutik akuersissutigineqassappata.
Pele: - Naalagaaffinngorutta Danmark suleqatigissavarput
Partiip ilaasortat siunnersuutaanik 43-nik saqqummiinermini, taakkunannga amerlanerit Danmarkimut tunngatillugu aaqqiissutissanik imaqartut pillugit, partiip siulittaasua inerniliivoq nunat tamalaat inatsisaat naapertorlugit Kalaallit Nunaat namminiilivippat, taava Kalaallit Nunaat Danmarkimik suleqatiginnissasoq.
- Kisiannimi Danmarkimik tunuartertitsileriinnginnassi Danmarkimik aammalu danskisut suugaluarnersumik oqaaseqarnisi tunngavigalugit?
- Naamik! Danmarkimik aammalu danskit pillugit akerlerlilersuinngilagut, aammalu oqaluttuarisaanermi sivisuumik ataatsimoorsimavugut, tassunga ilanngullugu ilaqutariittut ataqatigiinnerit eqqaaginnarneqarsinnaapput. Kisianni ullumikkut, nunat akornanni naligiimmik suleqatigiinneqanngilaq. Tamanna aatsaat pisinnaavoq ulloq taanna naalagaaffinngorutta, aatsaat tamanna pippat naligiissumik suleqatigiinneq ineriartortissinnaavarput.
- Kisianni politikkikkut oqaluuserineqarsimavoq "aapparisamut avissaarniartumut aniartornerani aningaasanik milloortoqarnavianngitsoq?"
- Tassa ajornartorsiut, aappariittut naligiittut inissisimanngilagut, naligiinngitsumik ataqatigiittoqarpoq, aappaannaa aalajangiisuuvoq tamakkiisumillu kisimi oqartussaalluni. Aappariittut ingerlaniarutta, taava tamanna naligiinnermik tunngaveqartariaqarpoq, naligiinnerlu taanna atorlugu, Kalaallit Nunaat Danmarkilu naligiimmik imminnut pisariaqarput ataqqeqatigiillutillu suleqatigiinneq aatsaat tunngavissaqalissammat, Naleqqap siulittaasuata Pele Broberg akivoq.
Politikkikkut Danmarkilu pissutsit arlalitsigut siunnersuuteqarfiginerisa saniatigut Naleraq aamma siunnersuuteqarpoq meeqqat atuarfianni atuartut oqaatsit allanertani ilissiniagassaat siulleq tassaassasoq tuluttut oqaatsinik ilinniarneq, taamatullu Inatsisartut sulinerat kalaallisut ingerlanneqassasoq.
Inatsisartut allattoqarfianit Sermitsiarmut uppernarsarneqarpoq ilaasortat siunnersuutaasa Inatsisartuni siulittaasuusut suli suliarigaat, aammalu partiit piaarnerpaamik akissutisissasut siunnersuutitik Inatsisartuni ukiakkut ataatsimiinnermi suliarineqassanersut.
Inatsisartut 2025-mi ukiakkut Ataatsimiinnerat tallimanngornermi 19. september 2025 aallartinneqassaaq.
