Naleraq naalakkersuisoqatigiinnissamik isumaqatiginninniarnerniit anivoq
Demokraatit Nalerarlu namminiilivinnissaq pillugu isumaqatigiissinnaasimanngillat.
Naleraq marsip aqqarngani Inatsisartunut qinersinermi partiit anginersaasa tulliatut inissippoq. Naleqqap siulittaasua Pele Broberg parteeqatiminit nikuilluni ersaattaanneqartoq uani takuneqarsinnaavoq.
Assi: Emil Stach
Naleraq isumaqatiginninniarnernit anisoq Demokraatit siulittaasuat Jens Frederik Nielsen, Naalakkersuisut nutaat pilersinneqarnissaannut isumaqatiginninniarnernik aqutsisoq, ataasinngornermi ualikkut tusagassiuutinut nalunaarummi allappoq.
- Nunatta
inissisimanera aallaavigalugu siammasissumik suleqatigiinnissaq aallaqqaataaniilli
aaqqiissut pitsaanerpaatut isigisimavara, ujartorsimallugulu.
- Kisiannili isumaqatigiissusiornissamut
piumasaqaatinut isumaqatigiiffeqarnissaq piusariaqarpoq. Matumanili Naleraq
isumaqatigiissuteqarfiginissaa ajornarsimavoq, allappoq.
§21 partiit avissaarutigigaat
Partiit taakkua marluk assigiinngitsutigut isumaqatigiissinnaagaluarlutik namminersorneq pillugu inatsimmi §21-p aallarnisarneqarnissaa pillugu isumaqatigiissinnaasimanngillat.
Naleqqap namminiilivinnissaq pillugu sulineq sukkanerusumik aallartitsinissaa kissaatigaa, Demokraatilli kigaatsumik aallartisaanissaq tunngavissaqarluarnissarlu qulakkeerusullugu.
- Partiit
sinneruttunut isumaqatiginninniarnerit suli ingerlassapput. Suliassanik
tigusillutik naalakkersuisooqatigiinnissamut isumaqatigiissusiornissaq nunatta
pisariaqartivippaa, siunissarpullu pillugu inuiaqatigiinnik akisussaaffimmik
tigusisussanik pilersitsisariaqarpugut.
- Ataatsimoornissamut
piffissaavoq, Jens Frederik Nielsen allappoq.
Naleraq partiini siulliulluni isumaqatiginninniarnernit anivoq.
