Naleraq: Royal Greenlandip sioorasaarutai ingasattajaarnerupput
Inatsisartut aningaasaqarnermut ataatsimiititaliaat Royal Greenlandimik ataatsimeeqateqarput, tassanilu Royal Greenland periarfissinneqarpoq aalisarnermut inatsisissatut siunnersuummut tunngatillugu isummersuutiminnik saqqummiussinissamut.
Pele Broberg (N) tupigusunnerarpoq, sooq Royal Greenlandip pisariaqartitsinersoq Inatsisartut ataatsimiititaliaannut kingunerisassassat pitsaanngitsut aarleqqutigisani tusartissallugit, massa ingerlatseqatigiiffimmut pissutsit allannguuteqassanngitsut siunnerfigineqartoq. Aalisarnermik tunitsivinnik aamma suliffissuarnik matusinissamik sioorasaarutiginninneq naapertuutinngilaq, taanna isumaqarnerarpoq.
Assiliisoq: Leiff Josefsen
Aalisarnermut inatsisissatut Naalakkersuisut siunertaat aamma inuussutissarsiummut tunngatillugu takorluugaat annertuumik malissuarsiortitsivoq.
Inatsisissatut siunnersuutip siullermeerneqarnerani, partiit akornanni pissuserissaarluni naaperiaanissamik siunertaqarpalaartumik oqallittoqarpoq. Tamanna pivoq naak Inatsisartut ataatsimiittarfiata silataani sakkortoorujussuarmik aaqqiagiinngittoqartutut nipilummik saqqumiussuisoqaraluartoq, pingaartumillu Inatsisartuni illuatungiliuttut KNAPK-p akerliussutsimik takutitsisuinut neriorsuutigaat, "aalisarnermik inuussutissarsiuteqartut sinnerlugit killissaq tikillugu akiuussinnaallutik".
Kisianni maanna, aappassaaneerneq, pingasunngornermi maajip aqqarngani pisussaq qanilliartorlugu, aalisarnermut inatsisissatut siunnersuutip qanoq ittuunissaa pillugu akerleriit akornanni oqallinnerit sakkortusiartuinnarput.
Ataatsimut eqikkarlugu oqaatigissagaanni, soqutigisaqartut inatsisissatut siunnersuummut tunngatillugu tusaaqqullutik noqqaassuteqartut pingasunut avinneqarsinnaapput, sinerissamut qanittumi aalisarnermik ingerlataqartut, illuatungaanilu eqimattat marluk tassaallutik avataasiortut, illuatungaani ingerlatseqatigiiffik pisortanit tamakkiisumik pigineqartoq Royal Greenland illuatungaanilu aalisarnermik ingerlataqartut namminersortut.
Maannamut aamma Polar Seafood sakkortuumik ilungersuussilluni suliniuteqarpoq piumasaqaatit ajorseriarnissaannut pinngitsoortinniarlugit, taamaalilluni ingerlatseqatigiiffik siunissami aalisarnermik ingerlatsisinnaaqqullugu, maannali aamma allat namminersortut aalisarnermik ingerlataqartut akerliussutsimik takutitsisalerput.
RG-p Aningaasaqarnermullu Ataatsimiititaliaq Aalisarnermullu ataatsimiititaliaq naapippai
Sermitsiap nittartakkatigut nutaarsiassaqartitsivia ilisimatinneqarpoq, tassa Namminersorlutik Oqartussanit pigineqartoq aalisariutinik ingerlatseqatigiiffik, Royal Greenland ataatsimiititalianut saqqummiussinissaminik periarfissaqartinneqarsimasoq. Tassunga tunngatillugu Aningaasaqarnermut Ataatsimiititaliap siulittaasua, Asii Chemnitz Narup (IA), oqaaseqartinniarlugu attavigigaluarparput uterfiginnikkumagaluarlunili taamaaliunngilaq.
Kisianni Naleqqap siulittaasuata, aammalu Aningaasaqarnermullu Ataatsimiititaliami ilaasortaasup, Pele Brobergip, Royal Greenlandip politikerinut sakkortuumik mianersoqqusisimanerarpaa, tassa siunissami aalisarnermut inatsisissap maannakkutut siunnersuutigineqartutut akuersissutigineqanngippat imaluunniit Royal Greenlandip inatsisissatut siunnersuummut sanilliullugu pitsaanerusumik inissisimanngippat kingunerisinnaasai pillugit.
Pele Brobergip erseqqissaatigaa, Naleraq partiiusutut sakkortuumik mianersoqqussuteqarsimasoq aammalu partiinut allanut isumaqatigiinniarnerigalua kinguneqarsimanngitsoq:
- Soorunami ataatsimiititaliaq sinnerlugu oqaaseqarsinnaanngilanga, kisianni uppernarsarsinnaavara Royal Greenland peqatigalugu ataatsimeeqateqarsimalluta. Kingumut oqaatigiinnarsinnaavara aalisarnermut inatsisissatut siunnersuut ajortuliornerusoq, sukkanerpaamik naammassiniarneqarpoq, aammalu siunertarineqarpoq Royal Greenlandip annaanneqarnissaa taassumalu aqutsinerliorneranik akuersaarnertut isigineqartariaqartoq.
Qanoq paasillugu aqutsinerliorneranik akuersaarnertut?
- Assersuutigalugu aalisartut arlallit sinerissami oqaluttuarput Royal Greenlandip tunitsiveqarfiitut ingerlatsisoqartutut isikkoqarluni, pisuussaarnertut oqaatigineqartariaqarpoq, tassami aalisartut ikigisassaanngitsut naammagittaalliuutigaat, RG-p tunitsiviini arlalinni ullormut 50 kilo tulaanneqarsinnaasoq killiliussaqartitsisoq, taannalu RG-p tunitsivinnik ingerlatsinertut ammasutut taavaa. Aalisartut naapertorlugit tunitsivittut taasat tamakku matuneqaannarunik assigiinnarpaa, aalisartunut iluaqutaanngimmata, Pele Broberg (N) oqarpoq.
- Apeqqutima aappa tassaavoq RG-p sunniiniarnernik siammarterinera. Takuneqarsinnaavormi KNR aqqutigalugu ullut tamaasa sunniiniarnernik ingerlatsisut, taakkunanilu ersarippoq anguniarneqartoq innuttaasut tapersersornissaat. Suna anginiarnerpaat taamaaliornerminni? Tamanna assut isumakuluutigineqarpoq kusanaallunilu, tassami ingerlatseqatigiiffik inuiaqatigiinnut pigineqartoq, politikkikkut ingerlatsinermut akuliukkusugani oqariartornikuusoq, taamaakkaluartoq sunniiniarnermigut politikkikkut suliarineqartunut akuliuttoq.
Pele Brobergip aamma uparuaatigaa, Royal Greenland politikerinut paasissutissiiumanngitsoq nunani allani inuiaqatigiit akiligaannik tunisassiorfippassuani aalisarnermillu ingerlatsiveqarfippassuani qanoq ingerlanersut, isummani naapertorlugu uffa massa aalisartut nunatsinni tunitsivissaaleqitinneqaqqattaartut RG-llu najuunnissaa amigaatigaat, tamannalu pisussaaffiugaluartoq ingerlatseqatigiiffimmit Namminersorlutik Oqartussanit pigineqartumit.
