Naligiimmik Pinninnissaq Pillugu Aalajangiisartunut naammagittaalliortoqarsinnaalerpoq

Naligiissitaaneq assigiinngisitsinnginnissarlu pillugu inatsit naapertorlugu  Suiaassuseq, naartuneq, qitornavissiartaarneq, qitornartaarsimalluni sulinngiffeqarneq, suiaassuseq kajungerfigisaq, suiaassutsikkut kinaassuseq, suiaassuseq ersersitaq, suiaassutsip ilisarnaatai, inuiaat ilisarnaataat, ammip qalipaataa, inuiaqatigiinni, inooqatigiinnermi imaluunniit inuianni pinngorfik, innarluuteqarneq, ukiut, politikkikkut isiginnittaaseq, upperisaq imaluunniit upperisaqarneq imaluunniit nakkarsarneqarneq toqqaannartumik imaluunniit toqqaanngitsumik misigisimagukku, Naligiimmik Pinninnissaq Pillugu Aalajangiisartunut naammagittaalliorsinnaaneq maanna periarfissanngorpoq, Naalakkersuisut tusagassiorfinnut nalunaarumminni taama allapput.

Toqqaannartumik aamma toqqaannanngitsumik assigiinngisitsineq

Toqqaannartumik assigiinngisitsineq tassaavoq inuk allamit ajornerusumik pineqaraangat imaluunniit inuk alla pisup assingani ajornerusumik pineqaraangat.

Toqqaannanngitsumik immikkoortitsineq tassaavoq inuit eqimattat ilaat allanit ajornerusumik pineqaraangata. Tamannali immikkut ittumik pisinnaavoq. Inatsit atuutinngilaq immikkoortitsineq tunngavissaqarluarpat naleqquttumillu siunertaqarpat, soorlu utoqqarnut immikkut akikilliliinerusinnaavoq imaluunniit inuit eqimattat amerlanerusunit ikiorneqarnissaminnik pisariaqartitsinerusut immikkut ikiorserneqarpata.

Suiaassutsikkut kinaassuseq, suiaassuseq ersersitaq aamma suiaassutsip ilisarnaatai

Paasinneriaatsit pingasut siornatigut inatsisiliornermi taaneqarsimanngitsut, inatsisimmi aamma sammineqarput. 

Suiaassutsikkut kinaassutsimi inuup ataatsip inuttut suiaassutsimut aalajangersimasumut ilaanerminik misigisimanera pineqarpoq. 

Suiaassusermi ersersitami inuup ataatsip, assersuutigalugu atisalersornermigut, nutsaminik inissiinermigut aamma pissusilersornermigullu, suiaassutsiminik inuttut takutitsinera pineqarpoq. 

Suiaassutsip ilisarnaataani timimi suiaatsummi aalajangersimasumiittumi ilisarnaatit takussaasut takussaanngitsullu aamma suiassutsip aappaanit immikkooruteqartut, soorlu kinguaassiuutit, suiaassutsimut hormonit, nukiit- aamma orsut- pissusaat, iviangit, qooqqaq, takissuseq, siffissap silissusaa, kiatsip silissusaa aamma nipi pineqarput.

Sumut naammagittaalliortoqarsinnaava?

Allakkamik allannermi, e-mail-imik allannermi, sianernermi, inuttut saaffiginninnermi imaluunniit Atuisartoqarnermut Unammilleqatigiinnermullu Aqutsisoqarfiup Naligiimmik Pinninnissaq Pillugu Aalajangiisartunut internettikkut nittartagaani naammagittaalliornissamut skiimap immersorneratigut naammagittaalliortoqarsinnaavoq. Paasissutissat suut naammagittaalliornermi ilaatillugit nassiunneqartussaanersut pillugit nittartakkami atuarneqarsinnaapput.

Nammineq misigisimasat taamaallaat naammagittaalliuutigineqarsinnaapput, allat sinnerlugit naammagittaalliortoqarsinnaanngiaq. Naammagittaalliuut nassiunneqarpat, Atuisartoqarnermut Unammilleqatigiinnermullu Aqutsisoqarfiup naammagittaalliuutip Naligiimmik Pinninnissaq Pillugu Aalajangiisartunit suliap suliarineqarnissaa isumagissavaa.

Naligiimmik Pinninnissaq Pillugu Aalajangiisartut aalajangiineri inaarutaasumik aalajangiinerupput taamaammallu allaffissornikkut oqartussaasumit allamit nalilerneqarsinnaanatik. Naligiimmik Pinninnissaq Pillugu Aalajangiisartut aalajangiinerat isumaqatigineqanngippat, suliaq eqqartuussivimmut suliassanngortinneqarsinnaavoq. Massakkumiik naammagittaalliuutinik nassiussisinnaavutit.

Naligiimmik Pinninnissaq Pillugu Aalajangiisartut Naalakkersuisunit juunip 20-ani 2024-mi toqqarneqarput. Aalajangiisartut aasaanerani sulinngiffeqarnerup kingorna siullermeerlutik ataatsimiissasut, Naalakkersuisunut ilisimatitsissutigineqarsimavoq, taama Naalakkersuisut nittartakkaminni allapput.