Nalunaaquttap akunneranut piffissaliussaq tusarniaassutigineqaqqittoq
Nalunaaquttap akunneranut piffissaliussaq siornatigutut allanngortinneqarnissaa pillugu siunnersuut tusarniaassutigineqarpoq. Siunnersuut assingusoq aamma ukioq kingulleq tusarniaassutigineqarpoq.
Kalaallit Nunaanni piffissap allanngortinneqarnissaa pillugu oqallinneq suli naammassinngilaq. Piffissap allanngortinneqarnissaanut siunnersuut tusarniaassutigineqaqqippoq.
Foto: Jesper Hansen
Qassinngorpa?
Piffissaq pillugu oqallinneq arlallit ilisarisinnaassajunnarsivaat. Aamma Inatsisartut ataatsimiittarfiani. Kalaallit Nunaata nalunaaqutaa UTC-3-mit UTC-2-mut allanngortinneqarmalli, taamaalilluni Kalaallit Nunaata Danmarkillu nalunaaqutaat akunnernik sisamaaniit akunnernik pingasunik nikingalersinneqarmata, ilaannikkut innuttaasut politikkikkullu suliaqartut naammagiliillutik oqariartortarsimapput.
Naleraq ukiaru siunnersuuteqassaaq Kalaallit Nunaanni nalunaaqutaq UTC-3-mut utertinneqassasoq. Tamanna isumaqarpoq nalunaaqutaq akunnermik ataatsimik kinguartinneqassasoq. Maanna nalunaaqutaq 12.00-iuppat, tassa 11.00-inngortinneqassalluni. Siunnersuut maanna tusarniaassutigineqarpoq, siunnersuullu pillugu isummersornerit kingusinnerpaamik aggustip sisamaani nassiunneqareersimassapput.
Oqallisigineqarsimavoq sumiiffinni assigiinngitsuni seqineq qaqugukkut qutsinnerpaasarnersoq, siunnersuuteqartullu tamanna aamma aaqqiissutissaqarfigaa:
- Sumiiffiit Qaanaaq, Tasiilaq Ittoqqoormiullu eqqarsaatigalugit siunnersuutigineqarpoq sumiiffinnut taakkununnga nalunaaquttaq ingerlaqatigiiffii najukkani innuttaasut tusarniareerlugit nalunaarutikkut aalajangersarneqassasut, allassimavoq.
Seqineq qaqugukkut qutsinnerpaasarpa?
Qaanaami, Tasiilami Ittoqqortoormiinilu innuttaasut piffissap allanngortinneqarnissaanut tunngatillugu aamma tusarniaaffigineqarnissaat tunngavilersorneqarpoq Kalaallit Nunaata anginera pissutigalugu sumiiffinni assigiinngitsuni seqernup qutsinnerpaaffia aamma nikingasarmat.
Naleqqap siunnersuutitut ilannguppaa aalajangertoqarneranit ukioq ataaseq qaangiuppat piffissaliussaq aatsaat inissinneqassasoq. Taamaasiortoqassaaq inuussutissarsiortut innuttaasullu allannguutinut naammattumik naleqqussarsinnaanissaat qulakkeerniarlugu.
- Innuttaasut ikigisassaanngitsut nalunaaquttat ingerlaqatigiiffiat nutaaq ajornartorsiutitut misigisimavaat nunanilu allani misissuisarsimanerit takutillugu nalunaaquttaq seqinnertarneratalu imminnut naapertuutinnginnerat peqqissutsimut kingulerluuteqartarsinnaasoq.
- Ajornartorsiutit aamma taakku aasaanerani nalunaaqutaqartitsinermik aaqqissuussinermut atuupput. Aaqqissuussineq taanna malillugu piffissami marsimi sapaammi kingullermiit oktobarimi sapaammut kingullermut nalunaaqutaq siuartinneqartarpoq, siunnersuutip tusarniutigineqartup tunngavilersuutaani allassimavoq.
