Nalunaaquttap ingerlaaqatigiiffiisa allanngortinnissaanut siunnersuut tapersersorneqaqisoq ataatsimiititaliamut ingerlateqqinneqarpoq

Naleqqap Siumullu nalunaaquttap ingerlaaqatigiiffiisa allanngortitsinissamik aasaaneranilu nalunaaquttap atorunnaarsinnissaanik siunnersuutaat ataatsimiititalianut attuumassuteqartunut ingerlateqqinneqarput. Siunnersuut Inatsisartuni novembarip arfernani aappassaaneerneqassaaq.

Kalaallit Nunaanni nalunaaquttap ingerlaaqatigiiffiia UTC-3-mut utertinnissaanut aasaaneranilu nalunaaquttap atorunnaarsinnissaanut siunnersuut, Inatsisartut ippassaq oqallisigimmassuk, partiit tamarmik taperseraat paasinarsivoq.

Nalunaaquttap ingerlaaqatigiiffia UTC-2-mut 2023-mi oktobarimi allanngortinneqarpoq. Tamannali ullaakkut taarnerusalerneranik ualikkullu qaamanerusalerneranik, ingammik ukiukkut, kinguneqarmat isornartorsiorneqarpoq.

Ataatsimiittarfimmi isumaqatigiittoqartoq

Naalakkersuisut siulittaasuata Jens-Frederik Nielsenip (D) nalunaaquttap ingerlaaqatigiiffii 2023-mi allanngortinneqarnialermat Inatsisartuni isumaqatigiittoqarnikuugaluarnera akissuteqaammini erseqqissatigaa, tamatumali kingorna isuma allanngorsimasoq maluginiarsimavaa:

- Inatsisartut nalunaaquttap aalajangersonera pillugu inatsit atatsimoorlutik aalajangersaaviginikuuaat taamanilu isumaqatigiikkaluarluta piffissamik aalajangersaasarnermut isummat assigiingisitaalersimapput, tamannalu siunnersuutini saqqummiunneqartuni takuneqarsinnaavoq. Innuttaasut inuussutissarsiummillu ingerlataqartut pisariaqartitaminnik piumanerusaminnillu assigiinngitsunik nassuiaateqarsimapput, Jens-Frederik Nielsen oqarpoq.

EU-mili aasaanerani nalunaaquttap atorunnaarsinneqarnissaa Naalakkersuisunit utaqqeqqaarneqarusukkaluarpoq:

- Naalakkersuisut Naalakkersuisut siulii assigalugit aasaanerani nalunaaqutaq EU-mi atorunnaarsinneqarpat Kalaallit Nunaanni aamma atorunnaarsinneqassasoq isumaqataaffigigaat erseqqissaatigerusuppara. EU-parlamentip 2019-imi 2/3-mit annerusumik taperserneqarluni aasaanerani nalunaaquttap atorunnaarnissaanut Isumalioqatigiissitamit siunnersuut tapersersorsimavaa. EU-mi nunat inatsimmut tassunga assigiinngitsunik kissaateqarneri pissutigalugit aalajangernerup piviusunngortinniarnera sivitsortoorsimavoq. Taamaattumillu aasanerani nalunaaquttap allanngortinneqartarnerata Europami qaqugu piviusunngortinneqarnissaa oqaatigineqarsinnaanani.

Siunnersuuteqartut nuannaartut

Naleqqap Siumullu Inatsisartuni tapersersorneqarnera nuannaarutigalugu inuit nittartakkatigut attaveqatigiittarfianni allapput.

- Iluatsippoq! Nalunaaquttap aaqqinnissaanut amerlanerussuteqarpugut. Naleraq tunuliaqutaralugu nalunaaqutatta Danmark aallaavigiunnaarlugu Nunarput inuilu aallaavigalugit siunnersuut (Imm. 85) partiinit tamanit ilalerneqarluni ingerlaqqippoq, naak Naalakkersuisut EU utaqqeqqaarniaraluaraat ilaannakortumillu taperserniaraluaraat, Naleqqamiit allapput. Taakku Qupanuk Olsen siunnersuuteqartuusoq aamma qutsavigaat.

Siunnersuut sooq pingaaruteqarnersoq Siumup erseqqissaqqippaa:

- Siumup innuttaasut peqqissusaat eqqarsaatigalugu allannguut iluaqutaassasoq aamma piffissamik nikisitsisarneq timimut artukkiisartoq ilaatigut tunngavilersuutigaa. Inuunerput silarsuarput malillugu ingerlaqqilissasoq ataatsimut isigalugu siunertarineqarpoq, Siumumit allapput.

Nalunaaquttap ingerlaaqatigiiffiisa allanngortinneqarnissaa Siumumit 2024-mi ukiakkut siunnersuutigineqaraluarpoq, Inatsisartunullu qinersisoqartussanngormat taanna suliarineqarani taamaatiinnarneqarpoq.

Nalunaaquttap ingerlaaqatigiiffiisa allanngortinneqarnerata iluaqutissartaanut ajoqutaanullu tunngasut tusarniaanermut akissutit 179-inik qupperneqartut Naalakkersuisut siulittaasuata oqaatigaa. Siunnersuutip suliarineqarnissaanut taakku ilanngunneqassapput.

Siunnersuut novembarip arfernani aappassaaneerneqassaaq novembarillu 13-ianni naammassineqassalluni.