Nunatsinni nalunaaquttap ingerlaarfiata UTC-3-mut allanngortinneqartariaqarneranik taamalu aasaanerani nalunaaquttap atorunnaarsinneqarnissaanik Siumup siunnersuutaa, taamaalilluni Europamut Danmarkimullu ukiukkut nalunaaquttap akunnerinik sisamanik aasakkullu nalunaaquttap akunnerinik tallimanik nikingassuseqalernissaa, Sulisitsisuni pisortap Christian Keldsenip isumaqatiginngilaa.
- Siumup siunnersuutaa inuussutissarsiortunit tapersersorneqanngilaq, Christian Keldsen Sermitsiamut oqarpoq.
Nunatsinni nalunaaquttap ingerlaarfiata UTC-3-mut allanngortinneqartariaqarneranik taamalu aasaanerani nalunaaquttap atorunnaarsinneqarnissaanik Siumup siunnersuutaa, taamaalilluni Europamut Danmarkimullu ukiukkut nalunaaquttap akunnerinik sisamanik aasakkullu nalunaaquttap akunnerinik tallimanik nikingassuseqalernissaa, Sulisitsisuni pisortap Christian Keldsenip isumaqatiginngilaa.
- Siumup siunnersuutaa inuussutissarsiortunit tapersersorneqanngilaq, Christian Keldsen Sermitsiamut oqarpoq.
- Ilaatigut pissutsit tunngaviusut allanngorartuarnerat inuussutissarsiortunut unammillernartorujussuuvoq, ilaatigullu maannakkut nalunaaquttap ingerlaarfia aningaasarsiornermut iluaqutaasorujussuummat.
- Inuussutissarsiortut piffissamut nutaamut naleqqussarnerat pissutigalugu piffissatoqqamut uternissaq ajornakusoorsinnaavoq, inuussutissarsiortummi nalunaaquttap ingerlaarfianut nutaamut naleqqussareersimammata. Inuussutissarsiortut ilaat ukiup ingerlanerani piffissani arlaqartuni ilungersunartorsiornerusarput, assersuutigalugu sanaartornermi ullaakkut nalunaaquttap akunnerata ataatsip missaani taarmiuneq pisarmat aamma aalisarnermi piffissani sumiiffinnilu aalajangersimasuni kingusinnerulaartumik aalisariartoqartarluni.
Ilisimatusarnikkut tunngavissanik amigaateqartut
- Nalinginnaasumilli amerlanerit nalunaaquttap ingerlaarfiata maanna atuuttup attatiinnarnissaa tapersersorpaat, GE-mi pisortaq oqarpoq.
- Aamma erseqqissassallugu pingaaruteqarpoq, Siumup siunnersuutaa ilisimatuussutsikkut nutaanillu misissuinernik tunngaveqanngimmat, innuttaasulli ikittuinnaat maluginiagaannik tunngaveqarmat.
- Nalunaaquttap ingerlaarfitoqaanut uteqqissagutta, Air Greenlandip eqqugaarujussuarnissaa qularutissaanngilaq, atugassarititaasut allanngornerisa kingunerinik piffissaq sivisunerusoq sivikitsorluunniit eqqarsaatigalugit millionikkaanik aningaasartuuteqassalluni, aamma pissutsit ima allanngortigisimassapput mittarfinnut nutaanut milliardikkaanik aningaasaliisoqarnera sunniutaarutissalluni, Christian Keldsen oqarpoq.
Inuussutissarsiortunit tapersersorneqarluartoq
Siumup inatsisissatut siunnersuutaata tusarniaassutigineqarneranut atatillugu Sulisitsisunit ilaasortat arlalissuit apersorneqarsimapput.
– Aperineqartut 76 procentii sinneqartut UTC -2-miikkusunnerupput, tassani Danmarkimut/Europamut nalunaaquttap akunnerinik pingasuinnarnik nikingassuteqarpugut. Tunngaviusumik tunngavilersuutaavoq Danmarkimi Europamilu niuernermut suleqatinullu ajornannginnerusoq, tamatuma saniatigut tikkuarneqarsimavoq IT-mik ingerlatsiviit UTC -2-mut nuunnissaat annertuumik aningaasartuuteqarfiusimasut, taamaattumillu UTC -3-mut uternissaq taamatulli annertutigisumik aningaasartuuteqarfiussasoq. Aamma erseqqissarneqarpoq UTC -3-mut uternissaq teknikikkut unammillernarsinnaasoq, ingammik aasaanerani nalunaaquttap atorunnaarsinneqarnissaa siunnersuutigineqartoq peqatigalugu.
Sulisitsisunit aperineqartunit 14 procentit sinneqalaartut UTC-2-miinnissarput imaluunniit UTC-3-miinnissarput soqutaanngitsutut isigineqarpoq. Taamaallaallu 9,5 procentit UTC-3-mut uteqqinnissaq kissaatigaat. Siumup siunnersuutaanut tusarniaanermut Sulisitsisut akissumminni taama allapput.
