Nalunaaquttap ingerlaqatigiiffiata akerleriissutaasup allanngortinnissaanut pilersaaruteqanngitsoq

Kalaallit Nunaat nalunaaquttap ingerlaqatigiiffianut nutaamut UTC-2-mut 2023-mi ukiakkut nuuppoq, tamatumalu kingorna nalunaaquttap ingerlaqatigiiffiata nikisinneqarnera oqallisigiuarneqalerpoq.

Naalakkersuisut siuliisa piffissamik nikisitsinerup iluaqutissartai ajoqutissartaalu nalilersorniarlugit misissuisoqarnissaa kissaatigaat, naalakkersuisulli nutaat suna siunertaraat?

Naalakkersuisut siulittaasuat Jens-Frederik Nielsen (D) Naleqqameersumut Qupanuk Olsenimut akissummini nalunaaquttap ingerlaqatigiiffiata aalajangiusimasap allanngortinnissaanik Naalakkersuisut maannakkorpiaq pilersaaruteqanngitsut naatsumik paasissutissiivoq.

Qupanuk Olsen nalunaaquttap ingerlaqatigiiffiata allanngortinneqarnissaanik kissaateqartut atsiornerinik 2024-mi katersuivoq, nalunaaquttallu ingerlaqatigiiffiata allanngortinnissaa qineqqusaarnermini qineqqusaarutigaa.

- Ajunngila ajorpaluunniit?

Taanna marsimi Inatsisartunut qinigaavoq, Jens-Frederik Nielsenimullu nalunaaquttap ingerlaaqatigiiffia pillugu apeqquteqaateqarpoq:

- Inuit nalunaaquttap ingerlanera pissusissamisuunngitsumik allanngortoq malugisimavaat.

- Maanna Naalakkersuisut Kalaallit Nunaanni nalunaaquttap pissusissamisuunngitsumik akunnernik marlunnik siuaqqanera ajunngitsutut ajortutulluunniit isigineraat paasisariaqarparput, taamaammat apeqquteqarpugut, Qupanuk Olsen apeqquteqaamminut tunngavilersuilluni allappoq.

Naalakkersuisut siulittaasuata nalunaaquttap ingerlaqatigiiffia nutaaq pitsaanersoq ajornersorluunniit akissummini toqqaannartumik isummerfiginngilaa, piffissalli allanngortinnissaa 2022-mi Inatsisartuni isumaqatigiilluni akuersissutigineqarsimasoq innersuussutigaa.

Nalunaaquttap ingerlaqatigiiffia nutaaq pillugu isumakuluutit amerlanerit nunap inissisimaffia pissutigalugu nalunaaquttap ingerlaqatigiiffiata allaanerulluinnarneranut tunngassuteqarput.

Nalunaaquttap ingerlaqatigiiffia pillugu siunnersuut akuerineqarmat aamma Islandimi inuusuttut, taamatuttaaq nalunaaquttap ingerlaqatigiiffiani nikingaffilimmi, sinittarneri pillugit misissuinerit politikerit malinnaavigisassagaat isumaqatigiissutigineqarpoq.