Nammineq illuliorsinnaanissamut taarsigassarsisinnaaneq annertusisoq - kommunit qularput
Inatsisip nutaap nammineq illuliornissamut pisortanit taarsigassarsisinnaanermut periarfissat annertusitippai. Kommunip innuttaasut akeqanngitsumik illuliorsinnaanngortutut isigai, aaqqissuussarlu lottomik eqquinertut nalilerlugu.
Leiff Josefsen
Nunaqarfimmi
illoqarfinnilu mikinerusuni innuttaasut namminneq illuliornissamut
pisortanit taarsigassarsisoqarsinnaanera
tapiissuteqartoqarsinnaaneralu pillugit inatsisip
allanngortinneqarnissaa Inatsisartut sapaatip-akunnerani matumani
akuersissutigivaat.
Inatsimmut allannguut,
illulioqataaffiusuni taarsigassarsititsisarnerup
qulakkeerneqarnissaanut, ajornannginnerulernissaanut taavalu
innuttaasunut taarsigassarsititsisarnerup pilerinarnerulernissaanut
siunertalik, Inatsisartuni akerliusoqarani akuerineqarpoq.
Inatsisip allannguutaa
Naleqqameersup Jens Napãtôp 2023-mi upernaakkut ataatsimiinnermi
siunnersuutaanit aallaaveqarpoq.
Naleraqqami
politikkeri: Kiisami
Allannguut politikerip
nuannaarutigalugu tusagassiuutinut nalunaarutigaa:
- Naleqqamit nammineq
illuliorsinnaanissamut siunnersuut kiisami iluatsipparput - una
periarfissat tamanut siammarli taamaaliornikkut innuttaasut
amerlanerit namminneq illoqalersinnaaniassapput, allappoq.
Qinnuteqartup
inoqutigiittut isertitai apeqqutaatinnagit,
taarsigassarsiissutigineqartulli amerlassusilerneqarnissaanni
isertitat apeqqutaatillugit kommunit
taarsigassarsititsisinnaanissaannut siunnersuut periarfissiisoq
inatsisip nassuiaataani atuarneqarsinnaavoq.
Inatsisip
allanngortinneqarnerata kingorna ilaqutariit 300.000 koruunit
ataallugit isertitallit 25.000 koruuninik akiliilluni namminneq
illuliorsinnaalissapput, tassa taarsigassarsiniartup aningaasanik
taama amerlatigisunik akiliinissaa piumasaqaataalluni. Siornatigut
malittarisassat naapertorlugit inoqutigiit taama isertitallit 100.000
koruunit 125.000 koruunillu akornanni akilertussaasarnikuuaat.
Kommune:
Lottomi 2 mio. kr. sinnerlugit eqquisutut ippoq
Inoqutigiit isertitaat
aallaavigineqartut annertuneruppata taarsigassarsianut akiliutit
annertunerussapput. Taarsigassarsiniartut isertitaat 800 - 850.000
kr. qaangerlugit isertitaqarunik qaammammut akiliut tamakkiisoq
akilertassavaat.
Kommunit arlallit
tusarniaanermut akissuteqarnerminni inatsisip allanngortinneqarnera
qularivaat. Qeqqata Kommunita aaqqissuussineq innuttaasunik
immikkoortitsivallaartoq allaffissornerlu annertoorujussuusoq
ilaatigut isumaqarluni:
- Nalinginnaasumik
ikiorsiissutitigut tapersiissutissat aammalu aningaasaqarnikkut
itsuarfissamik pilersitsinissaq oqaluuserineqartarput, tassani
isertitakitsut ilaquttaminnut inissialiorsinnaassallutik.
Peqatigisaanik ikiorsiissutit pigisanut aalaakkaasunut niuerfimmi
akornusersuisutut atuutinnginnissaat pingaaruteqarpoq.
- Siunnersuummi
saqqummiunneqartumi lottomik eqquinerunerusoq
takussutissiarineqarpoq, tassani tigusisussaq
iluatsitsilluarsimalluni annertunerpaatigut akeqanngitsumik
illutaassalluni, kommune allappoq.
Illulioqataanermut
aningaasartuutit 2,5 aamma 3,5 millionit koruunit akornanniissasut
naatsorsuutigineqarpoq. Kommuni aningaasanik
taarsigassarsititsisarnermi, taarsigassarsereernermi
akuttoqatigiimmik akilersornissaannut naatsorsuinissamut kiisalu
ilassutitut taarsigassarsisitsinissamut periarfissaqarnermut
tunngatillugu allaffissornikkut annertuumik suliaqartoqartassasoq
aamma erseqqissarneqarpoq.
Naalakkersuisut:
Pisortanit tapiisoqartarnissaa pisariaqartinneqarpoq
Innuttaasut
inissaaleqinnginnissaannik ikiorniarlugit ukiorpassuarni pisortanit
assigiinngitsutigut tapiissuteqartoqartartoq Naalakkersuisut
kommunimut akissuteqarnerminni allapput:
- Ukiorpassuarni
piginneqatigiilluni inissialiornissamut annertoorujussuarnik
tapiissuteqartoqartarpoq. Tamanna iluatsilluarsimavoq aammalu
nammineq inissianik amerlasoorpassuarnik pilersitsiviusimalluni.
Ukiorpassuarni nammineq illuliornissamut, illunut uiguleriinnut
nammineq inissialiornissamut annertoorujussuarnik
tapiissuteqartoqartarpoq. Tamanna iluatsilluarsimavoq aammalu
inissiat nammineq pigineqartut amerlasoorpassuanngorsimallutik.
- Taamaaqataanik
nunaqarfinni nammineq inissialiornissamut tapiissuteqartarnissaq
pisariaqartinneqarpoq, Naalakkersuisut kommunimut allapput.
Maannamut 28 mio. kr.-it
missaat kommunit illulioqataasunut taarsigassarsititsinissamut
atorsinnaavaat. Inatsimmik allannguuteqarnerup kingunerisaanik
Naalakkersuisut naatsorsuutigaat aningaasat taakku sukkanerusumik
atorneqarumaartut, aningaasallu amerlinissaat
eqqartorneqarsinnaalluni.