Namminersorlutik Oqartussat suliffeqarfiutaat millionilikkaanik sinneqartooruteqartoq
Namminersorlutik Oqartussat inuussutissarsiornermik siuarsaanermut ingerlatseqatigiiffiat Nalik Ventures A/S 2024-mi 28,7 millionit koruuninik sinneqartooruteqarpoq. Ukiup siuliani 4,4 millionit koruuninik sinneqartoorsimagami siuariarluarpoq.
- Nunatsinni aallarnisaasut suliffeqarfiillu suliniutit nutaat aqqutigalugit, suleqatiginerisigut aammalu nunat tamalaat akornanni attaveqaatit amerliartortinnerisigut kaammattornissaanut angusarput nukissanik tunisivoq. Ineriartortitsinerput pitsaasoq tamanna sanarfeqqinnissaanut qilanaarpugut, pisortaaneq Thomas Tyt Mogensen Nalik Venturesimi angusat pillugit oqarpoq.
Assi: Leiff Josefsen
Ukioq 2024 inuussutissarsiornermik siuarsaanermut suliffeqarfimmut Nalik Venturesimut pitsaasuuvoq.
Ingerlatseqatigiiffik ukiumoortumik naatsorsuutimini 28,7 millionit koruuninik sinneqartooruteqarpoq, tamannalu 2023-mit 4,4 millionit koruuninik sinneqartoorfiusumut sanilliullugu siuariangaatsiarneruvoq.
Siulersuisut angusat naammagisimaarpaat, tamannalu aamma pisortaanerup Thomas 'Tyt' Mogensenip nuannaarutigaa:
- Nunatsinni aallarnisaasut suliffeqarfiillu suliniutit nutaat aqqutigalugit, suleqatiginerisigut aammalu kaammattornissaanut angusarput nukissanik tunisivoq.
- Ineriartortitsinerput pitsaasoq tamanna sanarfeqqinnissaanut qilanaarpugut, Thomas ‘Tyt’ Mogensen tusagassiutitigut nalunaarummi oqarpoq.
400-nit amerlanerusut siunnersorneqartut
Inuit suliffeqarfiillu 400-nit amerlanerusut 2024-mi Nalik Venturesimit siunnersortinnermik, annikitsumik taarsigassarsisinneqarnermik, nioqqutissanik ineriartortitsinermut tapiiffigineqarnermik, EU-mit aningaasaliissuteqarnermik taarsigassarsiniarnermilluunniit ikiorneqarsimasut nangilluni nassuiaavoq.
- Tullernguupporlu nuna tamakkerlugu inuussutissarsiornerup nukittorserneranut sulinerput nangeqqissallugu, pisortaq oqarpoq.
Ingerlatseqatigiiffiit Nalik Startup aamma Nalik Capital Nalik Ventures-imut aamma ilaapput.
Nalik Capital inuussutissarsiornermik siuarsaanermut ingerlatseqatigiiffittut suliniutinut annerusunut, nalorninarsinnaasunut, aamma aningaasaliisarpoq, ingerlatseqatigiiffilli 2022-mi Aappaluttumi rubinisiorfimmik maanna matuneqareersumik Greenland Rubymik piginneqataanermini annertuumik annaasaqarsimavoq.
Aatsitassarsiorfinnut aningaasaliisartoq
Nalik Capitalip suliffeqarfiit qulingiluat 2024-p naanerani piginneqataaffigissagai ukiumoortumik nalunaarusiaani allassimavoq.
Suliffeqarfinni taakkunani sisamat Nalik Capitalip Danmarks Eksport- og Investeringsfond (EIFO) aamma Kalaallit Nunaanni soraarnerussutisiaqalernissamut aningaasaateqarfik SISA peqatigalugit aningaasaliiffigai.
Taakku tassaapput Amaroq Minerals Ltd., 80 mile Plc aamma Greenland Anorthosite Mining A/S kiisalu Q1 ApS.
Nalik Capital tamatuma saniatigut suliffeqarfinni tallimani allani aningaasaliivoq: Isaksen Design ApS (ilusilersuineq), Anortech Inc., Sermeq Helicopters A/S (takornariaqarneq assartuinerillu) aamma Milak Productions ApS (qimmit nerisassaannik tunisassiorneq).
- Nalik Capital 2024-p naanerani suliffeqarfinnik qulingiluanik ingerlataqarpoq. Taamaalilluni ingerlatseqatigiiffiup aningaasaliissutit amerlassusaat, sumiiffiit assigiinngitsut aamma suliffeqarfiit assigiinngitsut pillugit anguniakkat 2024-mi angusimavai.
- Nalik Capital suliffeqarfinni tamani siulersuisuni sinniisoqarpoq taamaalillunilu piginneqataanermik suliaqarluni, ingerlatseqatigiiffik ukiumoortumik nalunaarusiamini allappoq.
