Jens-Frederik Nielsenip
Demokraatineersup Naalakkersuisut siulittaasuattut Namminersorneq
pillugu Inatsisip suliareqqinneqarnissaannik ilimasaarinera qanga
pisimasut tunngavigalugit allaannginnami aaqqissuussaasoq.
Namminersorneq pillugu inatsit ukiut 17-it matuma siorna, novembarimi
2008-mi, qinersisartunit taasissutigineqalermat Demokraatit
akuersissutigeqqunagu innuttaasunut suaartaatiginikuuaat.
Jens-Frederik Nielsenip
Demokraatineersup Naalakkersuisut siulittaasuattut Namminersorneq
pillugu Inatsisip suliareqqinneqarnissaannik ilimasaarinera qanga
pisimasut tunngavigalugit allaannginnami aaqqissuussaasoq.
Namminersorneq pillugu inatsit ukiut 17-it matuma siorna, novembarimi
2008-mi, qinersisartunit taasissutigineqalermat Demokraatit
akuersissutigeqqunagu innuttaasunut suaartaatiginikuuaat.
-
Demokraatit namminersorneq tapersersorpaat, namminiilivinnissarli
pillugu ataatsimiititaliarsuup isumaqatigiissutaa akerleralugu,
partiimi taamani siuttut Jens B. Frederiksen aamma Palle Christiansen
quppersakkami »NEJ/NAAMIK«-mik qulequtalimmi agguaanneqartumi
allapput.
Demokraatit
inatsisip immikkoortuini pingasuni immikkut maluginiarpaat:
Naalagaaffiup tapiissutaasa amerlassusaat aalajangersimasunngorput,
Kalaallit Nunaata susassaqarfiit angerlaannerat nammineq akilissavai,
aatsitassarsiornermillu isertitat Danmarkilu avinneqartassapput.
ULLUT HUNNORUJUT SIULLIIT
Ukiup
affaani kingullermi politikkikkut pingaarutilinnik pisoqarpoq.
Piffissap
ingerlanera:
Marlunngorneq
februaarip sisamaat: Qinersisoqarnissaa Naalakkersuisut siulittaasuata Múte B.
Egedep Inatsisartut oqaluttarfiannit nalunaarutigaa.
Marlunngornermi
marsip 11-anni: Inatsisartunut qinersineq, Kalaallit Nunaata
oqaluttuarisaanerani nutaanerusumi allannguuteqarnerpaaq.
Tallimanngorneq
marsip 28-at: Demokraatit, Inuit Ataqatigiit, Siumut aamma Atassut
naalakkersuisooqatigiinnissamut isumaqatigiissut “Kalaallit Nunaat
toqqissisimaffiusoq kiffaanngissuseqarfiusorlu ineriartorfiusoq ataatsimoorluta
aalajangiusimavarput” atsiorpaat.
Ataasinngorneq
apriilip 7-iat: Inatsisartut Demokraatit siulittaasuat Jens-Frederik Nielsen
siuttoralugu naalakkersuisunik nutaanik qinersipput.
Tallimanngorneq
septembarip 19-iat: Ukiakkut ataatsimiinneq aallartissaaq
kurt@sermitsaq.gl
-
Isumaqatigiissut Kalaallit Nunaannut kalaallinullu ajorpallaartoq
isumaqarpugut. Namminersorneq pillugu Inatsisip inuuniarnermi
atugassarititaasut ajornerulersissinnaavai, aamma
namminiilivinnissamut aqqummi akornutaasinnaalluni, taamani
mianersoqqussutigineqarpoq.
Partii
saqqummersitartik »Naamik« pillugu sakkortuumik
isornartorsiorneqarpoq, ingammik Siumumit Inuit Ataqatigiinniillu.
Partiilli taakku marluk Demokraatit maanna ilumoornerarpaat:
Namminersorneq pillugu Inatsit Kalaallit Nunaata ajornartorsiutaanut
aaqqiissutissaanngilaq.
Isorinnittut
allat
Naalakkersuisooqatigiinnissamut
isumaqatigiissummi tallimanngornermi marsip 28-ani atsiorneqartumi
Naalakkersuisut Namminersorneq pillugu Inatsit nutarterniarlugu
siunniuppaat. Aningaasaqarnerup ineriartortinnissaa Kalaallit
Nunaatalu Danmarkillu akornanni naligiinnerulersitsinissaq pillugit
suleqatigiinnerulernissaq anguniarneqassalluni.
Taannali
sakkortuumik isornartorsiorneqarpoq, tamatumuuna Naleqqamiit
Siumumilu ilaasortat ilaannit.
– Isumaga
naapertorlugu Naalakkersuisut Inatsisartut innuttaasullu
peqataatinnagit Namminersorneq pillugu inatsisip
isumaqatigiinniutigeqqinnissaanut piginnaatitaanngillat, akerlianilli
Naalakkersuisut namminersorneq pillugu inatsimmi § 21-p
atuutilersinnissaanut pisinnaatitaaffeqarput. Naalakkersuisut
inatsimmik nutarterineq pillugu isumaqatigiinniarnernik
aallartitsinatik naalagaaffimmik namminersortumik pilersitsinissaq
pillugu danskit naalakkersuisuinik isumaqatigiinniarnermik
aallartitsisariaqarput, Naleqqami Inatsisartunut ilaasortaq Kuno
Fencker Sermitsiamut oqarpoq.
– Namminersornerli
pillugu inatsit sukannerpallaarsimasoq kikkut tamarmik isumaqarput?
– Naalagaaffik
namminersortoq tunngaviginagu Namminersorneq pillugu inatsimmik
isumaqatigiinniaqqinniarsarinerup Kalaallit Nunaata
namminiilivinnissamut pisinnaatitaaffia akornusersinnaavaa. Kalaallit
Nunaatami Kunngeqarfiup Danmarkip ilarigaa aammaarluta
akuerissagatsigu. Tamanna politikkikkut aqqutaavoq ulorianartoq,
oqallisigineqartinnagu innuttaasunillu tapersersorneqanngitsumik
pisussaanngitsoq. Taamatut inissisimalernaveersaartariaqarpugut,
tassa namminiilivinnissaq ungasissumi takorluugaannanngorlugu,
politikkikkut ingerlavik allamut sangutillugu, Kuno Fencker
oqarpoq.
Pisinnaatitaanngitsoq
Siumut
naalakkersuisooqatigiinnissamut isumaqatigiissummut atsioqataasuuvoq,
kisianni Namminersorneq pillugu inatsisip nutarterneqarnissaanut
Naalakkersuisut danskillu naalakkersuisuisa isumaqatiginninniarnerat
partiimi ilaasortat ilaasa akerleraat.
– Namminersorneq
pillugu inatsit kalaallit piumasaattut imaqarpoq, taamaattumillu
kalaallit kisimik allanngortissinnaavaat, Siumut sinnerlugu
naalakkersuisuusimasoq Jess Svane oqarpoq.
2008-mi
novembarimi innuttaasunik taasititsinermi namminersorluni
oqartussaqalernissaq 75,5 procentinit akuerineqarpoq 23,5
procentinillu akerlerineqarluni.
– Taamaattumik
Naalakkersuisut siulittaasuata, innuttaasut oqartussaaqataanerat
tunngaviginagu Inatsisartuniillu tapersernerani, Namminersorneq
pillugu inatsit allanngortinniarlugu Danmarki oqaloqatigilermagu
ernumanarpoq, Jess Svane oqarpoq.
Nutarterinissaq
naammanngitsoq
Naleqqap
siulittaasuata Pele Brobergip 2008-mi innuttaasunik taasititsineq
eqqaamavaa.
–
Kalaallit
amerlanerussuteqartut nutaamik inissisimaffeqalernissaq
akuersissutigaat. Alloriarneq tulleq namminiilivinnissatut paasivaat.
Danmarkimut atassuteqartuaannarnissatut aalajangiisoqanngilaq;
ikaarsaariarnermut isumaqatigiissutaasutut isigineqarpoq.
Naalakkersuisut Namminersorneq pillugu inatsisip
nutarterneqarnissaata oqaluuserineqarnissaa naammagiinnarpassuk,
taava siunertaq innuttaasullu ersarissumik akuersinerat
akornuserneqassapput, Pele Broberg Sermitsiamut oqarpoq.
Namminersorneq
pillugu inatsit Danmarkimit Kalaallit Nunaanniillu
peqataaffigineqartumik Inatsit tunngaviusussaq pillugu
Isumalioqatigiissitat juunimi 2008-mi nalunaarusiortumit
ilusilersorneqarpoq.
– Namminersorneq
pillugu inatsit naaperiutaanikuuvoq; suliaq naammassineqanngilaq.
Namminersorneq pillugu inatsit maanna nammineerluta
iliuuseqarnissatsinnut killilersuutaavoq, tassa Danmarki suli
aalajangiisussaatitaammat. Taamaattumik nutarterinerit
naleqqussaanerillu naammanngillat. Kalaallit Nunaanni inatsimmik
tunngaviusumik peqalernissamut missingiuteqareerpugut, maannalu
piffissanngorpoq Namminersorneq pillugu inatsit uagut nammineq
inatsimmik tunngaviusumik peqalernitsinnik taarserneqarnissaanut,
Pele Broberg oqarpoq.
