Namminiilivinnissamut ataatsimiititaliarsuaq nutaaq pilersinneqassaaq

Kalaallit Nunaata namminersulivinnissaanut tunngaviusumik inatsisissatut siunnersuut Tunngaviusumik inatsisissaq pillugu isumalioqatigiissitap apriilimi 2023-mi tunniuppaa, maannalu isumalioqatigiissitap tullia pilersinneqangajalerpoq.

§21 naapertorlugu isumalioqatigiissitaq pineqarpoq, taassumalu Kalaallit Nunaata namminiilivinnissamut periarfissaanut inatsisitigut pissutsit arlallit nassuiassavai, tamatumalu saniatigut isumalioqatigiissitap aamma tunngaviusumik inatsisissatut siunnersuut, tunngaviusumik inatsisissaq pillugu isumalioqatigiissitap suliarisimasaa, nalilersortussaavaa.

Naalagaaffinngornissamut naalakkersuisup Vivian Motzfeldtip (S) ataatsimiititaliarsuup nassuiaataa Inatsisartunut tunniuteqqammerpaa.

- §21 pillugu isumalioqatigiissitamik namminiilivinnissamut naalagaaffinngornissamullu piorsaanermut ersarinnerulersitsiumaartussamik pilersitsinissamut alloriarnerput nuannaarutigaara, tusagassiuutinut nalunaarummi Vivian Motzfeldt (S) oqarpoq.

Aaqqissorluagaanissamik isertuaatsuunissamillu qularnaarinnissasoq

Inatsisartut upernaakkut ataatsimiinnerminni ataatsimiititaliarsuaq pilersinneqarnissaa aamma Namminersorlutik Oqartussat pillugit inatsimmi paragraf 21-p atuutilersinnissaa siunertaralugu Naalakkersuisut nassuiaateqaqqullugit piumaffigisimavaat. Immikkoortumi tassani Kalaallit Nunaat qanoq ililluni namminersulivissinnaanersoq allaatigineqarpoq.

Ataatsimiititaliakkut tassuuna siunertaasoq tassaasoq "Namminersorneq pillugu inatsimmi § 21-p atorneqaleratigut suliarineqalersussat inatsisitigut nassuiaasiussallugit", nassuiaammi Naalakkersuisut allapput.

"Aalajangiiniarnerup ingerlanerani alloriarfiit pisariaqartussat ataatsimiititaliamit misissorneqarlutillu nassuiarneqassapput, inatsisit atuuttut misisoqqissaarneqassallutik, kiisalu suliap ingerlaqqinnissaanut siunnersuusiussalluni. Kalaallit Nunaata namminiiliveratarnissaanut inatsisitigut sulinerup aaqqissorluagaanissaa isertuaatsuunissaalu qularnaagassarissavaa", nassuiaammi allassimavoq.

Namminiilivinnissaq pillugu innuttaasut taasitinneqarnissaat inatsisinut naapertuuttumik nunanilu tamalaani akuerineqarsinnaasumik ingerlanneqarsinnaaqqullugu, ilaatigut suut tunngavigalugit taamaaliortoqarsinnaanersoq, tassani ilaatigut pineqarpoq.

Aningaasaqarneq qiviarneqassanngitsoq

Inatsisitigut pissutsit, aningaasaqarnikkut pissutsit pinnagit, ataatsimiititaliarsuup misissussagai nassuiaammi arlaleriarluni erseqqissarneqarpoq. Aningaasatigut pissutsit Inatsisartut aalajangiineranni eqqaaneqannginnerat pissutaavoq.

Aningaasanulli tunngasut annertuutut oqaatigineqarput, ilaatigut nunatta karsianut isertitat affaat sinnerlugit ataatsimoortumik tapiissutit aqqutigalugit Danmark akiliisarmat, tamatumalu saniatigut suliassat aningaasartuuteqarfiusut arlallit isumagisarmagit.

Nunasiaatigisimasap namminiilivinneranut atatillugu nunasiaatigisimasap nunasiaateqarsimasullu aningaasaqarnikkut attaveqatigiinneri pillugit siornatigut pisimasut maannakkullu pissutsit atuuttut misissornissaat ataatsimiititaliarsuup soqutigisarigaa, Naalakkersuisut nalunaarumminni allapput.

Isumalioqatigiissitap ingerlanissaanut aningaasat aningaasanut inatsimmi nassaarineqassapput, isumalioqatigiissitamullu suliassiissutigineqartoq Naalakkersuisut isumalioqatigiissitamut siunnersuutigisimasaat Inatsisartuni Inatsisinut Ataatsimiititaliap isumaqataaffigisinnaappagu, Naalakkersuisut isumalioqatigiissitaq pilersissavaat.

Ataatsimiititaliaq inatsisilerinermik immikkut ilisimasalinnik pingaarnertut inuttaqassasoq ukiunilu marlunni suliaq suliarineqassasoq, Naalakkersuisut siunnersuutigaat.