Nanoq Arctic Circle Trailimi takuneqartoq: Pisuttut SOS-imik kalerrisaarisut
Arctic Circle Trailimi qaqutigoortumik pisoqarpoq. Inuimmi sisamat pisutsillutik nannumik naammattuuipput, tupassutigeqisaminnik. Nanoq Kanocenterimiit 12 kilometerit missaanik ungasitsigisumiittoq naammattoorpaat, pisuttuniit 200 meterit missaanik ungasissuseqarluni.
Arctic Circle Trail, juli 2023. Katiffimmiit Kanocenterimut aqqut.
Foto: Dorthea Reimer-Johansen
Pisuttut sisamat, Sisimiuniit Kangerlussuarmut sisamanngornermi 13. juni ingerlaartillutik nannumik naammattuuinissartik naatsorsuutigisimanngikkaluarpaat.
Katiffimmiit Kanocenterip tungaanut ingerlaartillutik, nanoq Kanocenterimiit 12 kilometerit missaanni ungasitsigisumiittoq takuaat, pisuttuniit 200 meterit missaanni ungasitsigisumiilluni.
- Pisulluta ernera oqarami "Aajinnga uumasorujussuaq". Uanga isumaqarlunga ujarak. Kisianni nikikkami, tuttoorpasinnanilu. Uppernarsigatsigu nanuusoq tuparujussuarpugut. Ingerlaannaq sukkaannaq uterpugut, Vivi Schultz Grønvold, sisamaasuni pisoqataasoq oqarpoq.
SOS
Vivi Schultz Grønvold ernini marluk, erneratalu kammalaataa pisoqatigai. Taakku illuaqqanut ungasissumiipput toqqorfigisinnaasaminnillu soqarani. Aamma aallaaseqanngillat.
Garmin Inreach atorlugu ajunaalernermik kalerrisaaripput, "Nanoq"-mik kalerriillutik.
Pisuttut kalerrisaarutinik ikumasartunik piareersimasuuteqarsimapput, nanoq qanillissagaluarpat ersisaarutissaminnik.
Annaassiniaaneq piaarnerpaamik aallartisarneqarpoq, qulimiguulillu nalunaaquttap akunnera ataaseq missaa qaangiuppat tikiuppoq, pisuttullu annaanneqarput Kangerlussualiaanneqarlutillu. Pisuttut tamarmik ajoqusersimanngillat.
Mianersoqqissaaritsi
Kalaallit Nunaanni Politiit uppernarsarpaat Garmin Inreachimit kalerrisaarisoqarsimasoq.
- Ullumi sisamanngornermi (juunip ulluisa 13-at, aaqq.) nalunaaqutaq 13.28 Garmin Inreachimiit kalerrisaarisumik nalunaarfigineqarpugut. Aalajangerpugut piaarnerpaamik SAR helikopteri sumiiffigisaannukassasoq. Inuit sisamat Kangerlussualiaanneqarput. Nanoq 200 meterisut ungasitsigisoq takusimavaat. Ajoqusertoqanngilaq, Aputsiaq Hansen, pigaartut pisortaat Sermitsiamut paasissutissiivoq.
Politiit ilanngullugu paasissutissiissutigaat nanoq qulimiguulik atorlugu ujarsimagaluarlugu, nanisimanaguli.
- Politiit suli aalajaginngillat nanoq ujaarineqaqqissannesoq.
Arctic Circle Trailimi nannunik nalinginnaasumik takussaasoqarneq ajorpoq. Taamaattumik pisuttut sillimanerunissaat kajumissaarutigaa.
- Mianersornerussapput, ajornanngippallu kalerrisaarisinnaasumik, soorlu Garmin Inreacheqarnissaat innersuussutigisinnaavara.
Pisunnissarsi kinguartissiuk
Lisa Germany Arctic Circle Trailimi ataqatigiissaarisuusup pisuttussat pisuffissartik ullumik ataatsimik kinguartinnissaa kaammattuutigaa.
- Politiit aqagu ullaakkut naliliissapput, taava nutaanik paasissutissaateqalissaagut.
Arctic Circle Trail Kangerlussuup Sisimiullu akornanni pisuttunut aqqutaavoq, 165 kilometerinik isorartussuseqarluni.
