Nanoq talittarfimmiittoq, tillinniartoqartoq umiatsiaarartullu ajornartorsiortut

Ullormi unnuamilu kingullermi pisoqaalussimasoq, pigaartut pisortaat Jeppe Andsager ataasinngornermi ullaakkut Sermitsiamut oqarpoq.

Siulleq pivoq sapaammi nal. 08.16, tassani nanoq angisooq Uummannap eqqaani nunaqarfimmi Niaqornaniittoq politiit nalunaarfigineqarmata.

- Nanoq talittarfimmi qeqartoq takuneqarsimavoq, pigaartut pisortaat oqaluttuarpoq.

Nannup qanillattornera pillugu Piniarnermut Aalisarnermullu Naalakkersuisoqarfik saaffigineqarsimavoq, nanorli nammineerluni qimagummat allamik pisoqaqqissimanngilaq.

Umiatsiaaraq immami sikusimasumi nikeriarsinnaajunnaartoq

Sapaammi unnukkut nalunaaqutaq 18.49 politiit nalunaarfigineqarput Ilulissat eqqaanni nunaqarfimmi Qeqertami umiatsiaaqqamiittut pingasut immami sikusimasumi nikeriarsinnaajunnaarsimasut.

- Umiatsiaaraq sikumut qaqissimavaat, navianartorsiorsimanngillallu, kisiannili nikeriarsinnaajunnaarsimapput, Jeppe Andsager oqaluttuarpoq.

Politiit aalisariummut qanittumiittumut, inunnik ajornartorsiortunik annaassiniarluni aallartumut, attaveqarput.

Unnuap ingerlanerani aalisariummut ikisinneqarput, ataasinngornermilu ullaakkut Ilulissanut ingerlaarlutik, aalisariummi Ilulissiarmat.

Pisiffimmi tillinniartoqartoq

Unnuap ingerlanerani Maniitsumi Pisiffimmi tillinniartoqarneranik politiit aamma nalunaarfigineqarput.

Nalunaaqutaq 03.49 kalerriisoqarpoq, sumiiffimmilu inuusuttut arfinillit takuneqarsimapput.

Pisoq misissorneqarlunilu pisiniarfimmi videoliarineqarsimasut misissorneqassasut, pigaartut pisortaat oqarpoq.

Politiilli takunnissimasinnaasunit pinerluttulluunniit kikkuunerinik ilisimasalinnit saaffigineqarusupput. Politiit normumut 70 14 48-mut saaffigineqarsinnaapput.