ILISIMATUSARNEQ
Nanorriutit - qimmit qimuttut nannunniutit navianartorsiortut
Ilisimatusarfimmi Kulturimut, Oqaatsinut Oqaluttuarisaanermullu immikkoortoqarfimmi Ph.d.-inngorniarlunu ilinniartup, Manumina Lund Jensensip misissuinerata takutippaa issittumi avatangiisit allanngoriartorneranni qimmit nannunniarnermi pingaaruteqarluinnartuusut navianartorsiortinneqartut.
Kalaallit qimmii qimuttut Nanorriutit, nannunniutitut immikkut sungiusarneqarsimasut Avanersuarmi taamaallaat nassaassaapput. Assimiittut piniartup Nuka Kristensensip qimmerivai.
Assiliisoq: Josefin Kuschela
Misissuineq nutaaq Manumina Lund Jensen-ip ingerlassimasaa atuagassiami Arctic Sciencemi saqqummersinneqarpoq, A Study of Nanorriutit – Polar Bear Hunting Dogs in
Avanersuaq-mi nanorriutit – nannunniarneq siunertaralugu immikkut sungiusarneqarsimasut –
Avanersuarmi inuiaqatigiinni pingaaruteqartorujussuusut ersersinneqarpoq.
Piniartoq Olinnguaq Kristensen Savissivimmeersoq nuliani Naduk ernertillu Bent peqatigalugit Nanorriutitik qimmeralugit piniariartut.
Assiliisoq: Josefin Kuschela
Nanorriutit
qimuttussaannaanngillat piniarnermi iluaqutissatut atorluarneqartartut, kisiannili nanorriutit
piniartut piniarneranni iluaqutaanermikkut pinngitsoorneqarsinnaanngillat, ukiunilu
hunnorujukkaani issittumi avatangiisini peqqarniitsuni piniartut napatissinnaasimavaat.
Maannakkut
silap pissusiata allanngoriartorneranik, inoqarfiit annerit nutserfigineqarnerulernerannik inuillu
inooriaasiisa allanngoriartornerannik piniariaaseq taanna ulorianartorsiortinneqarpoq.
Misissuineq Avanersuarmi kulturikkut ilisimasalinnik aqqaneq pingasunik Savissivimmeersunik
Qaanaameersunillu apersuinernik tunngaveqarpoq. Tassani piniartut, qimmit kiisalu pinngortitap
ataqatigiinnerat ersersinneqarpoq, nannunniarnerullu ileqqut piniariaatsillu qanoq
allanngoriartornersut takutinneqarpoq. Annikinnerusumik sikusarnerata piniarnermilu periarfissat
annikillinerisa piniarnermik ingerlatitseqqittussat inuusuttut piniarnermik nappateqarusuttut
ikiliartorput.
Olinnguuup Naduullu ernerat Nuka Kristensen ileqqutoqqanik ursuit piniarlugit
Assiliisoq: Josefin Kuschela
- Qimmit piniarnerlu taamaallaat pineqanngillat – kulturikkut kingornussatta immikkuullarissup
ersersinneqarnissaa ingerlateqqinnissaalu pineqarpoq, tassaniipporlu inuit pinngortitamut
atassuteqarnerat, Manumina Lund Jensen, misissuinermi allaatiginnittoq oqarpoq nangillunilu:
- Nanorriutit
ukiuni hunnorujukkaani piniartunut inuuniarnermi periarfissanik pilersitsisarput, aammalu
piniarnermi ileqqutoqqat pigiinnarnissaannut pingaaruteqarlutik. Silap pissusiata
allanngoriartornerata nassatarisaanik piniarnermi ileqqutoqqat annaaneqarsinnaapput, aammalu
silaannarmi peqqarniitsumi inuusoqarsinnaaneranut ilisimasaqarneq tammariartulersinnaalluni.
Nunarsuarmi inuiaat kulturiannik piujuartitsiniarnermik, silap pissusiata allanngoriartorneranik
aammalu kulturikkut kingornussanik annaaneqartartunik misissuineq saqqummiussaqarpoq.
Kulturitta annaaneqannginnissaa pingaaruteqartoq ersersinneqarpoq, aammalu ileqqutoqqat
nutaanerusumik nalilersorneqarnissaat siunissami qanoq ataavartitsinissamut iluaqutaasinnaanersut
saqqummiunneqarpoq.
