NAPA-p tapissutigisartagaanut qinnuteqartut aatsaat taama amerlatigisut
Issittumi suliniutillit katillugit 21-t Nunani Avannarlerni Piorsarsimassutsikkut Attaveqaammut katillugit 8,8 mio. koruuninik nalinginut qinnuteqarput. Nunani Avannarlerni Ministerit Siunnersuisoqatigiivisa Issittumi tapiissuteqartanerat NAPA-mit, Ilisimatusarfik suleqatigalugu, aqunneqarpoq.
Suliniutit ilaat nunap paarnaanut tunngassuteqarpoq. Paarnat qanoq atorneqarsinnaanerat ilaatigut misissuiffigineqarusuppoq.
Assi: Western Arctic National Parklands
Suliniutit 21-t katillugit 8,8 millionit koruunit nalinginut Nunat Avannarliit Ministeriisa Siunnersuisoqatigiivisa Issittumut tunngatillugu suliniutinut tapissutigisartagaanit aningaasaliiffigineqarput.
Nunat Avannarliit Ministeriisa Siunnersuisoqatigiivisa allattaanerata Karen Ellemannip Nunat Avannarliit Issittumut Tapiisarfiat nutaaq januarimi saqqummiuppaa: Issittoq nukittooq.
Taanna Nunat Avannarliit Ministeriisa Siunnersuisoqatigiivisa takorluugaannut ilaavoq: Nunat Avannarliit 2030-mi nunarsuarmi piujuartitsinerpaajunissaat ataqatigiinnerpaajunissaallu.
Nunat Avannarliit Issittumut Tapiisarfiat nutaaq NAPA-mit Ilisimatusarfik suleqatigalugu ingerlanneqarpoq, suliniutillu assigiinngitsunut siunertanut naleqquttunut aningaasaliinissamut qinnuteqarsinnaapput.
Qinnuteqartitsineq siulleq naammasseqqammerpoq, aatsaallu taama amerlatigisut qinnuteqarsimasut NAPA-mit nalunaarutigineqarpoq.
Nunap paarnai ilisimatusarfigalugit
Nunat Avannarliit Ministeriisa Siunnersuisoqatigiivisa allattaanerata Karen Ellemannip soqutiginninnerujussuaq nuannaarutigaa:
- Piffissami nunat politikkikkut eqqissiviilliorfiusumi silap pissusiatalu allanngoriartornerani Issittumi tatineqarneq malugineqarsinnaavoq. Taamaattumik nunat avannarliit suleqatigiinnerat aatsaat taama pingaaruteqartigaaq. Immitsinnut ilinniarfigeqatigiikkaangatta kulturillu nunallu akimorlugit ataatsimooraangatta, ataatsimoorutta nukittunerusinnaavugut.
- Aamma nuannaarutigeqaarput ukioq manna Issittumi nunat avannarliit suleqatigiinnerat immikkut aningaasaliiffigineqarnikkut soqutigineqarlualermat, oqarpoq.
Finlandimi University of Oulu nunap paarnai pillugu ilisimatusarnissamik siunertaqartoq qinnuteqartut ilagaat. Aamma suliniutit soorlu Issittumi attaveqaatit ilungersunarsinnaasut pillugit ilisimatusarneq, eqqumiitsuliornerup silarsuaanut tunngasut, Pan-Arctic Vision aamma oqaluttuatoqqanik katersuinissamik suliniut tapiiffigineqarput.
