Napparsimallutik toqusimasut angallanneqartarnissaat qulakkeerneqassaaq
Naalakkersuisut nalunaarut nutaaq, napparsimallutik toqusimasut ilisaaffigisassaannut assartuunneqartarnissaannik qulakkeerinnissutaasussaq, tusarniaassutigaat.
Nalunaarummi nutaami napparsimasut Kalaallit Nunaanni Danmarkimiluunniit peqqinnissaqarfimmi katsorsarneqartillutik toqusimasut ilisaaffissaminnut akeqanngitsumik assartorneqarsinnaanissaat qulakkeerneqassaaq.
Assiliisoq: Leiff Josefsen
Aaqqissuussineq utaqqiisaarutaannaasimasoq maanna ataavartussanngortinneqassaaq.
Naalakkersuisut nalunaarut, napparsimasup katsorsarneqarnermi nalaani toqusimaguni illerfiata arsaataluunniit assartorneqarnerata pisortanit akilerneqartarnissaata qulakkeerneqarnissaanut tunngasoq, tusarniaassutigaat.
Assersuutigalugu napparsimasut katsorsarneqarniarlutik Danmarkimut aallartinneqarsimasut pineqarput, tusarniaassummi allassimavoq:
- Danmarkimi nakorsiartut ilaat akuttugaluartumik toqusarput, ilaatigut kukkusumik katsorsartissimanikkut, nappaatimit pinartoqarnikkut imaluunniit nakorsiartup ukiui peqqutaallutik.
- Ilaannikkut napparsimasut Danmarkimiinnissaminnut atatillugu toqukkut qimaguttarput, soorlu kukkusumik katsorsarneqarnermi, nappaatip ineriartornerani imaluunniit napparsimasup utoqqalinersua pissutigalugu.
- Nunani allani katsorsartillutik toqusartut, peqqinnissaqarfimmillu misissortissimasut eqqarsaatigalugit, napparsimasutut kingunerani inisisimajunnaartarput (..), taamaammallu angallanneqarnissaanut inatsisitigut pisinnaatitaaffeqarunnaartarlutik. Napparsimallutik toqusut illerfiinik assartuinissamut aningaasartuutinut ataavartumik aaqqiissutissat nalunaarusiami pineqartumi qulakkeerneqassaaq, tusarniaassummi allassimavoq.
Qummuattami illerfimmiluunniit?
Malittarisassani siunnersuutigineqartut naapertorlugit toqusup timaa ikuallanneqassanersoq, kinguneranilu arsai qummuattamut ikillugit imaluunniit ilivermut angallanneqarluni assartorneqassanersoq nunatsinni peqqinnissaqarfimmit aalajangerneqassaaq.
Peqqinnissaqarfik toqusup toqusulluunniit qanigisaata kissaatai malillugit aalajangiissaaq, allatut isumaqatigiissuteqartoqanngippat:
1) kissaatigisaq malillugu
angallassisoqarsinnaanngippat,
2) kissaatigisaq malillugu angallassinissaq
akisuallaarpat, imaluunniit
3) immikkut
ittumik ajornarpallaartumik tunngavilersuuteqarpat.
Ilaqutaasut angallassinerup kissaatigisap Kalaallit Nunaannilu peqqinnissaqarfiup neqeroorutigisinnaasaata aningaasartuutaasa assigiinngissutaat akilissagaat neqeroorfigineqareerpata peqqinnissaqarfiup illerfimmik assartuineq aatsaat itigartissinnaavaa.
