Napparsimasunut peqqinnissaqarfimmilu sulisunut inissiat nutaat Ilulissani sananeqassasut
Ilulissani napparsimmavimmi napparsimasut sulisullu angalasartut unnuiffissaaleqinerat suliniut nutaaq aqqutigalugu aaqqinneqassaaq.
Assi: Avannaata Kommununia
Napparsimasut Ilulissani katsorsarneqarnissamut angalasut unnuiffissaqarnissaat Ilulissani napparsimmavimmi pisariaqartinneqaraluttuinnarpoq. Tamatuma saniatigut aamma sulisut unnuiffissaqarnissaat pisariaqartinneqarpoq.
Avannaata Kommuniata kommunimut pilersaarummut tapiliussaq tusarniaassutigisimavaa, taannalu napparsimmaviup inissaqarniarneqarnermik ajornartorsiummut aaqqiissutissamik suliniummut aqqutissiuussissaaq. Peqqinnissaqarfik sanaartortitsisuussaaq.
Kommunimut pilersaarut naapertorlugu Edvard Sivertsen-ip Aqqutaani napparsimmaviup inaataasa pisoqaanerusut nutarterluarnissaat ajornarunnaassaaq.
Siunnersuut naapertorlugu inissiat ullumikkut inoqanngitsut tamarmik pisoqaavallaarlutillu aserfallatsaalineqarsimannginnginnamik nutarterneqassapput.
- Sumiiffik ilippanaateqarluarpoq, illoqarfiup nutarsarneqarneratigut nakorsiariartortut katsorsarneqarnerminni sinaakkutissai soqutiginartut pilersinneqarsinnaapput, kommunimi ingerlatsivik allappoq.
Kommunimut pilersaarummut tapiliussap nutaap illoqarfiup nutarternissaa ajornarunnaarsippaa, tassani inissiat pioreersut isaterneqarlutillu kingorna peqqinnissaqarfimmik sullissisut inissiaannik nutaanik sanaartortoqassaaq.
Suliniut pillugu paasissutissat sukumiinerusut kommunip nittartagaani atuarneqarsinnaapput.
