Napparsimasut illersuisuat imaluunniit isumaginninnermut siunnersortit amerlanerusut

Peqqinnermiit imminullu isumaginermiit nappaammik passunneqarnissamik pisariaqartitsiffiusumik eqqugaariataarnermi arlalippassuartigut kinguneqarsinnaasarpoq. Napparsimalersumuinnaanngitsoq, aammali ilaqutai annertuumik inuunermi atugassanik allannguisumik nalaataqarfiusinnaasarpoq, ajornerpaamik pisoqassappat ilaqutariit aningaasaqarnikkut ajunaarnersuartut ittumik nalaataqarsinnaasarlutik.

Siumut: Napparsimasut illersuisoqarnissaat pisariaqarpoq

Partii Siumut isumaqarpoq, napparsimasut illersuisoqalerneratigut ilaqutariit napparsimasortaqalernermikkut ajornartorsiutit nalaassinnaasaat pinngitsoortinniarneqarnerusinnaasut:

- Napparsimasut oqaaseqartartua pisariaqarluinnarpoq pilersinneqarnissaa, tassami tassuuna ersarissumik napparsimasut qanigisaasullu atugaasa saqqummiunneqartalersinnaanissaat, minnerunngitsumik inatsisitigut napparsimasut qanigisaasullu saaffissaqarlutik periarfissanillu tamanik aqqutissiuunneqarsinnaalissallutik, aammalu inatsisit sukkut allannguuteqarsinnaaneranik siunnersuisussanik, Siumut sinnerlugu siunnersuummik saqqummiussisoq, Doris J. Jensen nassuiaavoq.

Siumup siunnersuummini Københavnimi nakorsiartut angerlarsimaffigisartagaat aallaavigineruaa, tassani ilaatigut ilaqutaasut napparsimasortaminnik ingialluisut najugaqarsinnaatitaajunnaarlutik allamut nuuffissarsioqqusaasarput. 

- Patient hotel-it pisortaniit minnerunngitsumillu peqqissutsimut naalakkersuisuusuniit sumiginnakkat nakkutigineqarnerusinnaanerannut periarfissanik ammaasuusinnaammat. Napparsimasut kræftertut qanigisaasalu illersuisuat/oqaaseqartartuata piaartumik pilersinneqarnissaa pisariaqarluinnarpoq isiginngitsuusaaginnarsinnaananilu, siunnersuummi ilaatigut tunngavilersuutigineqarpoq.

Demokraatit: Napparsimasut allaffissornerulertoqarnissaanik pisariaqartitsinngillat sullinneqarnissartilli pisariaqartippaat

Demokraatit isumaqarput, napparsimasut illersuisussaannik pilersitsineq naggataatigut isumaqaannassasoq allaffissornerup annerulerneranik. Taamaattumik partii kaammattuivoq peqqinnissaqarfimmi isumaginninnikkut kiffartuussineq  annertusarneqassasoq:

- Ilaatigut paasitinneqarnerput (ilaqutariinnut peqqissutsimullu ataatsimiititaliaq, aaq.) imaqarpoq, oqaaseqartartumik pilersitsineq, nunat tamalaat isumaqatigiissutaanniit toqqammaveqartumik meeqqat oqaaseqartartuat (MIO) aammalu innarluutillit oqaaseqartartuat (TILIOQ) sulisarmata, tassani anguniagaasarluni nunarsuatsinni pisinnaatitaaffiit, nunatsinni aamma akuerineqarsimasut, timitalerniarneqarnerat nakkutigissallugu.

- Massakkullu, assersuutigalugu utoqqaat oqaaseqartartuanik pilersitsineq, assingusumik tunngavissaqarnani sulivoq, FN-ip utoqqaat pisinnaatitaaffiinnik maleruagassaqartitsinngimmat. Taamatullu napparsimasut oqaaseqartartuanik pilersitsissagutta, sulinermi tunngavissaqarnavianngilaq, uani anguniagaassappat assersuutigineqarlunilu MIO-p TILIOQ-llu sulilluarnerat peqqutaalluni, napparsimasut oqaaseqartartuat naatsorsuutigineqassasoq assingusumik sulissasoq. Tikkuarusunnarpoq siunnersuuteqartut assersuusiormata, napparsimasunut oqaaseqartartoq napparsimasut saaffiginnikkaangata akuleruffigisinnaanissaanik. Isumaqarpunga kukkunerusoq, ilami oqaaseqartartugut sulianut ataasiakkaannut akulerussinnaatitaangimmata, tamakkiissumillu isiginnittumik siunnersuisinnaallutillu aqqutissiuussisarmata, Demokraatit oqaaseqartuat allannguutissatut siunnersuummik saqqummiussinerminut atatillugu nassuiaavoq.

"Inatsisartut aaliangiiffigisassaatut siunnersuut, peqqinnissaqarfimmi siunnersuisartut ikinnerpaamik marlunnik amerlineqarnissaat, siunertaralugu pisinnaatitaaffinnik aqqutissiuunneqarnissaq aammalu napparsimasutut saaffissaqarnissaq, tassanngalu ataaseq Danmarkimi peqqissartut illuanni (DgP) atorfinitsinneqassasoq, qitiusoqarfimmiilli immikkut ittumik meeqqanut ilaqutariinnullu siunnersuisartussamik peqalernissaat, Naalakkersuisut suliniummik aallartitsinissaannut peqquneqassasut. Siunnersuutip akuerineqarnerani piaartumik suliniut piviusunngortinnissaanut suligasuartoqassaaq."

Naalakkersuisut periarfissanik misissuerusupput

Peqqissutsimut Naalakkersuisoq, Agathe Fontain (IA) akissuteqaammini nassuiaavoq, peqqissutsimut suliassaqarfimmi napparsimasut inatsisit naapertorlugit paasissutissanik siunnersorneqarnissamullu periarfissaannik qulakkeerinnittuusut neqeroorutaareerlutillu periarfissaareersut. 

- Tassani pineqarput napparsimasunut ilitsersuisarneq, Sana Social, peqqinnissaqarfimmi naammagittaalliuteqarsinnaaneq kiisalu arlaannaannulluunniit attuumassuteqanngitsumik peqqinneq pillugu siunnersuisoqatigiinnik pilersitsinissamik suliaqarneq. Nunatsinni Peqqinnissaqarfik 2016-imili napparsimasunut siunnersuinermik neqerooruteqartalerpoq, innuttaasunut qanittumik arlaannaannulluunniit attuumassuteqanngitsumik sullissiviusoq, napparsimasut ilaqutaasullu paasissutissanik ikiorneqarnissamillu ujartukkaminnik aallerfigisinnaasaat. Napparsimasunut siunnersuisup napparsimasut qanigisaasalu peqqinnissaqarfiup iluani pisinnaatitaaffiinik ilitsersuineq siunnersuinerlu suliassaasa pingaarnerit ilagaat.

Naalli Naalakkersuisoq periarfissaareersunik nassuiaateqaraluarluni, taanna innersuussinngilaq Siumup siunnersuutaa itigartinneqassasoq, siunnersuummulli allannguutissatut siunnersuummik aamma taanna saqqummiussivoq:

"UPA 2025 sioqqullugu aaqqissuussinernut pilersinneqareersimasunut atatillugu napparsimasut illersuisuata sunik suliaqarnissaanut akisussaaffeqarnissaanullu tunngatillugu Naalakkersuisut innersuussutinik saqqummiusseqqullugit peqquneqarnissaannut Inatsisartut aalajangiiffigisassaattut siunnersuut."

Partiit imminnut isumaqatigiissuteqarsinnaanerat qanoq inerneqassanersoq paasinarsissaaq, siunnersuut aappassaaneerneqarpat maajip 23-ani.