Narsarsuarmi soraarsitsiortornissaq Greenland Airportsimit nalunaarutigineqartoq
Greenland Airportsimi Narsarsuarmi sulisut ataatsikkut soraarsinneqarnissaannik nalunaarummik tunineqarput. Mittarfiup qulimiguulinnut mittarfinngornissaa tamatumunnga pissutaavoq.
Toqqorsivimmit: Leiff Josefsen
Qaqortumi mittarfissaq 2026-mi ammarneqassaaq, tassungalu atatillugu Narsarsuarmi mittarfiup qulimiguulimmut mittarfinngortinneqarnissalluni. Politikerit 2022-mi tamanna aalajangerpaat, allannguutillu atuutilernissaat maanna qallivoq.
Narsarsuarmi Mittarfik qulimiguulinnut mittarfinngornissaata malitsigisaanik mittarfimmi ingerlatsineq aamma Narsarsuaq Hotelip ingerlanneqarnera maannakkutut ingerlasinnaajunnaassasoq Greenland Airportsip sisamanngornermi nalunaarutigaa.
- Tassunga atatillugu Greenland Airports ajoraluartumik Narsarsuarmi sulisunut kalluarneqartussanut ataatsimoortumik soraarsitsinissamut ilimasaarummik tunniussisariaqarsimavoq, Greenland Airportsimit allapput.
Allanngortoqarnerata malitsigisaanik nalornissuteqarneq ernumassuteqarnerlu paasilluarsineqarsinnaasoq suliffeqarfimmit allapput. Greenland Airportsimi kalluarneqartussat qanimut ingerlaavartumillu oqaloqatigineqarlutillu sapinngisamik pitsaanerpaamik tapersersorniarlugit nutaanillu periarfissarsitinniarlugit sulissutigineqarluni.
Atorfinnut qinnuteqarnissamik ikiorneqarsinnaasut
Qaqortumi Ilulissanilu mittarfissani, Greenland Airportsimit 2026-mi ammarneqartussanit, atorfininnissaq periarfissaasinnaavoq:
- Narsarsuarmi sulisut Greenland Airportsimiiginnarnissamik soqutiginnittut mittarfittaassani – imaluunniit suliffeqarfiup ataani sumiiffinni allani - atorfinnut qinnuteqarnissamut ikiorneqassapput, Greenland Airportsimit allapput.
Sulisut Greenland Airportsip avataani allamik suliffissarsiorusuttut tapersersornissaannik neqeroorfigineqarput qutsavigineqarlutillu:
- Greenland Airportsip Narsarsuarmi sulisut – mittarfimmi aammalu akunnittarfimmi - ukiorpassuarni annertuumik sulisimanerannut, tatiginartuusimanerannut pikkorissuseqarlutillu sulisimanerannut qamannga pisumik qutsavigerusuppai.
