Nassiussinermut akit: Puiaasamik imermik nassitsineq 111 koruunilik
Puiaasaq imermik puilasumeersumik Nunatsinneersumik imalik, Nunatta siunissami Amerikamut qaninnerulernissaanut immaqa aqqutissiuussisinnaassaaq.
- Kimmut toqqaannartumik assartuinermik pilersitsinissaq anguniagaasariaqarpoq, Vivian Motzfeldt Nunanut Allanut Tunngasunut Nassuiaammi allappoq.
Leiff Josefsen
Akisoorujussuuvoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
Washingtonimi sinniisoqarfik USA-mi illoqarfiit pingaarnersaanni nunat avannarliit killiit ilassinninnerannik siorna aaqqissuussimmat, inuit takunnissinnaanerannik paasisaqarfiulluarpoq.
Ilassinninnermi ilaatigut siunertarineqarpoq, kalaallit tunisassiaannik USA-mi pisisartorpassuarnut 300 millionit sinneqartunut ussassaarinissaq.
Taamaattumik sinniisoqarfimmi nerisassanik kusanartunik sassaalliisoqarpoq, Royal Greenlandip raajaatai saattuallu sassaalliutigineqartunut ilaapput. Aammattaaq puilasumit imeq mamarluinnartoq sassaalliutigineqartunut ilaavoq. Nunanut allanut naalakkersuisoqarfimmit oqaatigineqartut naapertorlugit aaqqissuussineq iluatsilluarpoq. Nerisassat sassaalliutigineqartut qaaqqusanit nuannaarutaaqaat. Aammali aaqqissuussineq akisoqaaq.
Timmisartukkut angallannermi attaveqarfissat nutaat
Siunissami qaninnerusumi ungasinnerusumiluunniit Kalaallit Nunaata Amerikallu Avannarliup kangiata akornanni, pingaartumik New Yorkimut immaqalu aamma Torontomut/Montrealimut, takornariartitsisarneq aallaavigalugu timmisartukkut attaveqartoqalissasoq, nunanut allanut tunngasunut politikikkut nassuiaammi allassimavoq.
Tamanna nunanut allanut tunngasunut naalakkersuisup Vivian Motzfeldtip (S) nunanut allanut tunngasunut politiki pillugu nalunaarusiaani 40-nik quppernilimmi sapaatip akunnerani matumani Inatsisartunut saqqummiunneqartumi atuarneqarsinnaavoq.
- Ingerlatseqatigiiffik Greenland Water Bank pisumut atatillugu imermik puilasumeersumik karsinik tallimanik tunissuteqarpoq, Nunatsinni tunisassiarineqartumik, taakkulu ilassinninnermi peqataasunit 250-iusunit ilassilluarneqaqalutik. Karsit imermik puilasumeersumik imallit tallimat Nuummit Reykjavik aqqusaarlugu Royal Arctic Line aamma Eimskip aqqutigalugit nassiunneqarsimapput. Nassiussinerulli akia paasinarsilluni katillugit 75 kg, 11.088 koruuneqartoq imaluunniit puiaasamut ataatsimut 0,5 literimut 111 koruuneqarluni, nalunaarusiami taama allassimavoq.
Nutaamik eqqarsarnissaq
Naalakkersuisut isumaqarput pisimasup takutikkaa „kitaanut attaveqarneq amigaataasoq“ aaqqinneqartariaqartoq.
- Nassiussinermut akit attanneqarsinnaanngillat, tamannalu Kalaallit Nunaata Amerikallu Avannarliup akornanni niuernerup unammillernartorsiorfiuneranut ersiutaavoq. Niuernikkut kimmut attaveqarnerput piviusorsiornerunngilaq, ingammik nassiussat amerlanngitsut pineqartillugit. Taamaattumik Kalaallit Nunaat kimmut toqqaannartumik niuerusuppat nutaamik eqqarsartoqartariaqartoq, nassuiaammi allassimavoq tassanilu Naalakkersuisut pilersaarummik aamma saqqummiussipput:
- Kimmut toqqaannartumik assartuinermik pilersitsineq Nunatsinni politikikkut anguniagaasariaqarpoq, tamannami Nunatta Amerikamut Avannarlermut niuerneranut tunngaviussammat. Nunatta Amerikallu Avannarliup umiarsuakkut toqqaannartumik attaveqalernissaa aaqqiissutissatut pisariaqarpasippoq, taamaalillunimi puiaasap puilasup ernganik imallip Nuummit USA-mut nassiunnera 111 koruuninik akeqannginniassammat, nalunaarusiami inerniliilluni taama allattoqarpoq.
