NATO-mi Rutte siulersuisuutillugu allannguisoqarnissaa Kremlip ilimaginngilaa
Nato nutaamik generalsekretæreqaleraluartoq sammivik attatiinnarneqassasoq, Ruslandimi aqutsisut oqarput.
Rutte arlaleriarluni præsident Putinimik ataatsimeeqateqartarsimasoq, Kremlimi oqaaseqartartoq, Dmitry Peskov, oqarpoq. Tamannali ikinngutigiilernermik isumaqanngitsoq oqarpoq. (Toqqorsivimmit assi).
Maxim Shemetov/Reuters
Naak marlunngormat Hollandimiup Mark Ruttep Norgemiu Jens Stoltenberg illersornissamut peqatigiissortami generalsekretæriugallartoq taarseraluaraa, Nato-mi allannguisoqarnissaa Kremlimit ilimagineqanngilaq.
- NATO-p politikkini aalajangiusimajuassagaa naatsorsuutigaarput, Ruslandimi aqutsisut oqaaseqartartuat, Dmitrij Peskov, Tass naapertorlugu oqarpoq.
Ruttep siulersuisuunerani Nato-p politikkianut nutaamik pingaarutilimmillu pisoqassanngitsoq, Ruslandimi tusagassiuutit arlallit issuarlugit Peskov oqarpoq.
Ruslandip isumannaatsuuneranut Nato navianartorsiortitsisoq, Ruslandip arlaleriarluni oqaatigisareerpaa.
Ukrainep Nato-mut ilaasortanngornissaa pinngitsoortinniarlugu februaarip 22-ani 2022-mi Ruslandip saassukkaa, Ruslandip præsidentia Vladimir Putin taassumalu qullersai aamma oqarsimapput.
Sorsunnersuup nillertup kingorna Europap kangiani nunat NATO-mut ilaasortanngorput, Ruslandilu NATO-mit, Ruslandip killeqarfianut qanilliartuinnartumit, isumannaatsuunerminik navianartorsiortinneqarnini arlaleriarluni mianersoqqussutigisarpaa.
NATO-p Ruslandimik illersuiniarluni pilersaaruteqarneragaanini ilumuunnginnerarpaa.
Nunat kangianiittut Nato-mut ilaasortanngortut tassaasut nunaat demokratii tunngavigalugu namminneq aalajangiisinnaatitaasut, Killerni illersornissamut iligiinnit oqaatigineqarpoq.
Rutte Hollandimi naalakkersuisunut siulittaasuugallarami Putin arlaleriarluni naapissimagaa, Peskov oqarpoq.
Ruttep Moskvallu pitsaasumik piviusorsiortumillu attaveqatigiilersinnaanissaat neriuutigineqartoq, Peskov oqarpoq.
- Taavali paasinarsivoq Hollandi isumakkeerfigineqarsinnaanngitsumik inissisimaffeqartoq. Inissisimaffik nunatsinnut attaveqarnissamut periarfissiinngiivissoq, Dmitrij Peskov oqarpoq.
/ritzau/dpa
