NATO-p aaqqissuussaanera Trumpip nutaanngilinerareerlugu: Maanna mumingalluinnarpoq

NATO nunat ilaasortami illersornissamut aningaasartuuteqarneroreerneranni aaqqissuussaanermigut illorraap tungaanukartoq, Donald Trump isumaqarpoq.

Donald Trumpip NATO-p Mark Rutte præsidentip illorsuani ataasinngornermi tikeraartigaa.
Saqqummersinneqarpoq

Nunat killiit illersoqatigiiffiannut NATO-mut tunngatillugu isummani allanngortoq, USA-p præsidentiata, Donald Trumpip, tuluit TV-qarfianit BBC-mit apersorneqarnermini oqaatigaa.

Nunat killiit illersoqatigiiffiat aaqqissuussaanermigut nutaanngilivallaalersimasutut præsidentip taanikuuaa, isumaali maanna allaalluni.

- Aap. NATO nunat ilaasortami nammineq akiliisalernerat pissutaalluni aaqqissuussaanermigut nutaanngilivallaarunnaarluni maanna muminganiileriartorpoq, Donald Trump BBC-mut oqarpoq.

Europami nunat NATO-mi ilaasortat illersornissamut aningaasartuuteqarnerunissaminnut Trumpimit qangali kimigiiserfigineqartareerlutik taamaaliortaleriartorput.

Nunat NATO-mut ilaasortat naalagaaffimmik tunisaasa ataatsimut nalingisa 5 procentiinik illersornissamut sillimaniarnermullu aningaasartuuteqartalernissamut juunimi isumaqatigiipput. Tamanna Trumpip taamaalioqqusereernerani pivoq.

Illersoqatigiiginnarnissaq nunat minnerit nunanit anginernit saassunneqassagaluarunik imminnut illersorsinnaanissaannut pingaaruteqartoq suli upperigini, USA-p præsidentiata BBC-mit apersorneqarnermini ilanngullugu oqaatigaa.

Trumpip NATO-p qullersaa pukkitsormiu Mark Rutte præsidentip illorsuani Washington D.C-miittumi ataatsimeeqatigaa.

Ukraine Ruslandimit saassunneqartilluni imminut illersorluarsinnaaneroqqullugu USA silaannakkut illersornissamut sakkussianik, ilaatigut qaartartunik igeriuttakkanik Patriotitut ittunik, NATO-p aningaasalersugaanik Ukrainemut nassiussiumaartoq, taakkua ataatsimiinnerminni ilaatigut oqaatigaat.

- Sakkussiat taakkua dollarinik milliardilikkuutaanik naleqartuusut NATO-mut nassiunneqartussat USA-mit pisiarineqassapput. Taakkualu sorsuffinnut nassiussorneqalertorumaarput, Trump taama oqartoq AFP paasissutissiivoq. 

Ruslandip præsidentiata, Vladimir Putinip, iliuusikippallaarnera naammaginngikkini, USA-p præsidentiata BBC-mit marlunngornermi apersorneqarnermi uteqqippaa. Trumpip Putin Ukrainemi sorsunnermik unitsitseqqunikuua.

- Oqaloqatiilluarpugut. Ima oqarfigaara: "Tusarluarnaq". Isumaqaraluarpungalu paaseqatigiilluta, Kyivimili illu tamatuma kingornatigut aseruatiterpaa, Donald Trump Putin pillugu oqarpoq. 

Rusland ullut 50-it qaangiutsinnagit sakkuaakkunnaarallarnissamik isumaqatigiissuteqanngippat, nioqqutissanut nunamit tassannga eqqussuussanut akitsuusersuinissi pillaatitullu iliuuseqarnissi, Trumpip russit præsidentiannut ataasinngornermi sioorasaarutigaa.

/ritzau/

Powered by Labrador CMS