Nato-p pisortaata inuttut nalunaarutaa Trumpip avammut saqqummiuppaa

USA-p præsidentia, Donald Trump, nammineq oqaatigisamisut Nato-p generalsekretærianit, Mark Rutte-mit, inuttut allagarsiani saqqummiuppaa.

Allakkiaq Trump-ip attaveqaqatigiittarfiani Truth Social-imi assiliartaliussatut saqqummiunneqarpoq.

Tassani Rutte Trumpimut pilluaqqussuteqarpoq "aalajangiisinnaassuseqarluni Iranimi iliuuserisimasaa" pillugu, taannalu "ilumoortumik immikkut ittuusoq" aammalu "uagut allat tamatta sapigarput".

USA-p arfininngornermi Iranimut sakkutuut timmisartui arlallit aallartippai nunap atomi atorlugu nukissiuutai saassutaralugit.

- Tamanna tamatsinnut isumannaannerulersitsivoq, Trump allappoq, ilanngullugulu oqaatigalugu Nato-p ataatsimeersuarnerani Haagimi "suli angusaqarluarfiusussamik" ataatsimeeqataajartulerluni.

Angusaqarluarneq Rutte-p allagai naapertorlugit tassaavoq nunat Nato-mi ilaasortaasut isumaqatigiissutigissagaat bruttonationalproduktip (bnp) fem procentii illersornissamut atorneqassasut.

- Amerikamiut præsidentiisa allat ukiuni qulikkaani arlalinni angusinnaanngisaanik angusaqassaatit. Europa annertuumik tapersersuissaaq, taamaattariaqarmammi, tamannalu illit ataqqinaatigissavar, Rutte allappoq.

Ataatsimeersuarnermut atatillugu nalunaarutigineqarsimavoq Nato-p procentinik tallimanik illuartitsisarnissamik anguniagaa Spanienip akuersaarumanngikkaa.

Spaniap ministeriunerata, Pedro Sánchez-ip, Reuters naapertorlugu sapaammi oqaatigaa, nunap "bnp-ata fem procentiinik annertussusilik illersornissamut aningaasaliissutigissanngikkaa".

Taamaattumik Spaniamiut isumaqarput, Sanchez naapertorlugu, ilaasortat sinnerlugit isumaqatigiissuteqarlutik, aningaasartuutissaminnut anguniagaq 2,1 procentimik bnp-mik inissinneqassasoq.

Spaniamiut isumaqarput tamanna naammassasoq, aalajangersimasumik nukittorsaanissamut anguniakkap matussusernissaanut, nunat Nato-mut ilaasortaasut illersornissamut ministeriisa juunip tallimaani ataatsimiinneranni isumaqatigiissutigisaat innersuussutigalugu.

- Spaniamiut isumaqarput, 2,1 procentimik nukittorsaanissamut anguniagaq naammattoq. Nato isumaqarpoq, 3,5 procentimik pisariaqartitsisoqassasoq Mark Rutte Haagimi ataasinngornermi tusagassiortunik katersortitsinermi oqarpoq, taamaalillunilu unammilligassaq nassuerutigalugu.

1,5 procentit sinneruttut 5 procentimik anguniakkamut, soorlu cyberforsvarimut aamma infrastrukturimut aningaasartuutinut, nunat arlallit siusinnerusukkut atuisimasut.

Reuters naapertorlugu Nato-p pisortaata marlunngornermi naqissuserpaa, Trumpilu akunnerminni oqaloqatigiinnertik Trumpip tamanut saqqummiussimammagu ajornartorsiutiginngikkini.

Taassuma ilanngullugu oqaatigaa, allakkap imaa pissusissamisuuginnartoq.