Naya Sophia Lyberth Agathe Fontainimut unammillerpoq

Inuit Ataqatigiit partiata ataatsimeersuarnera, pisortatigoortumik sapaatiuppat ingerlanneqartussaq sioqqullugu sassartoq alla maanna saqqummerpoq.

Taanna tassaavoq Nuummi Inuit Ataqatigiit siulersuisuunerni ilaasortaq kiisalu Kommuneqarfik Sermersuumi kommunalbestyrelsemi ilaasortaq, Naya Sophia Lyberth. Partiip aaqqissuisuussaanermut siulittaasup tulliatut sassarpoq.

Agathe Fontain, aamma peqqissutsimut Naalakkersuisuusoq, ullumikkut aaqqissuisuussaanermut siulittaasup tulliuvoq. Taanna qinigassanngorteqqinnissaminut aalajangissaguni, taamaalilluni unammineqartussanngorpoq.

Partiip iluani ingerlariaqqinnissamik nukittorsaaniarneq

Naya Sophie Lyberth partiip Nuummi immikkoortortaqarfiani ilaasortaqatini peqatigalugit partiip qullersaasa sulinerup ingerlanneqarnera maluginiarsimavaat:

- Isumaqarpunga ullumikkumut sanilliullugu suli annertunerusumik immikkoortortaqarfinnik oqaloqateqartarnissarput pisariaqartoq, partiillu iluani ingerlariaqqinnissamik nukittorsaanissarput pingaaruteqarpoq, kisianni suli pingaarnerusumik immikkoortortaqarfiit qanimut peqataatinnissaat pisariaqarpoq, Lyberth oqarpoq nangillunilu:

- Ilisimavarput politikkikkut sulianik ingerlatsinerit sukkasoorujussuarmik pisarsinnaasut, ilaatigullu ima sukkatigisinnaasarput allaat immikkoortortaqarfiit ilaasortallu peqataatinneqartutut sunniuteqaqataasutullu misigisimanerat annikillisinnaasarluni. Oqaloqatigiinnermik aaqqissuussinikkut aamma ingerlaavartumik ilisimatitsinikkut qulakkeersinnaavarput tunuliaqutattavut peqatigalugu aamma politikkikkut ingerlatsinerit paaseqatigiissutiginissaat. Taamaaliornikkullu nunatsinni politikkikkut suliaqarnerput nukittorsassavarput aamma tamatumunnga qulakkeerinnittuarnissara kissaatigaara  aaqqissuussaanermi siulittaasup tulliatut sulineq aqqutigalugu.

Partiip iluani nukittorsaarusuppoq

Naya Sophia Lyberth isumaqarpoq partiip anguniagaasa suliniutigisartagaasalu ersarissuuneri pitsaasuusut, taamaattorli oqaloqatigiinnerup amigaateqarnera pissutigalugu nalorninartoqarsinnaasoq, pingaartumik politikkikkut aalajangigassat annertuut pineqartillugit.

-Immikkoortortaqarfiit attaveqaqatigiinnikkut minitaasutut misigisimasinnaasarput, tamanna ajuusaarnaraluartumik paaseqatigiinnissamut ajornartorsiortitsisinnaavoq aamma tamatuma nassatarisaanik tamatta immikkut oqalulersoortarsinnaavugut, tamanna pinngitsoortissinnaavarput immikkoortortaqarfiit ilisimaarigunikku tatigalugulu kattuffimmit politikkikkut suliaqarnermi peqataatinneqarluarnerisigut. Taamaattumik partiimi pissuserissaarneq tamanut atuuttariaqarpoq, immikkoortortaqarfinni kattuffimmilu.

Taassuma Avannaani Tasiusamiit siunnersuutigineqartoq assersuutitut oqaatigaa, immikkoortortaqarfiup kissaatigaa immikkoortortaqarfiit avinngarusimasumiittut partiip siulersuisuunerini immikkut inissaqartinneqalissasut.

- Kattuffiup tungaanit immikkoortortaqarfiit qanimut pitsaasumillu attaviginerisigut qulakkeersimaneqassaaq tusarneqarlutillu peqataatinneqartutut inissisimanissaat, matumanilu siunnersuutigineqartup ersersippaa pisariaqartikkipput attaveqaqatigiinnitta nukittorsarneqarnissaa, tassami siulersuisuni immikkut inissaqartitaanissamik noqqaasoqarpoq, tamannalu pinngitsoortissinnaavarput kattuffiup aaqqissuussaanikkut ataqatigiissumik aalaakkaasumillu ingerlanneqarneratigut.

Siulersuisuunerit sulinerat ersarissumik ingerlanneqassaaq

Alla Naya Sophia Lyberthip sulissutigerusutaa tassaavoq, siulersuisut ataatsimiinneri aalajangiinerilu immikkoortortaqarfinnut ilisimatitsissutigineqartarnerisa annertusarneqarnissaa:

- Sinerissami immikkoortortaqarfiit siulersuisut suliaannut tunngatillugu qularuteqassanngillat, ataavartumik ilisimatinneqartassapput siulersuisuunerit suliaat aalajangiussaallu pillugit, soorunami kattuffik malittarisassavut malillugit sulissaaq, kisianni aamma isumaqarpunga immikkoortortaqarfinnut ingerlaavartumik paasissutissiisoqartassasoq, taamaalilluni ersarissumik oqaloqatigiinnerup ingerlanissaa qulakkeerinneqataaffigerusuppara, angorusukkakku immikkoortortaqarfiit kattuffillu aaqqissuussaanikkut politikkikkullu naammagisimaarinninneq annertusarneqarnissaa, Naya Sophia Lyberth Inuit Ataqatigiit aaqqissuussaanermut siulittaasup tulliatut sassartoq Sermitsiamut oqarpoq.