Nepalimi nunap sisoornerata kingorna bussit kuummut nakkarmata inuit 60-it maqaasineqarput
Nepalip qeqqani nunap sisoornerata kinguneranik bussit marluk kuummut nakkarput. Maanna ilaasut maqaasineqarput.
Nepalimi monsunip nalaani ajutoornissaq aarlerinarnerulertarpoq, siallernerata malitsigisaanik nuna sisoorsinnaammat qarsutsineqarsinnaallunilu. (Toqqorsivimmit assi).
Prakash Mathema/Ritzau Scanpix
Nepalimi nunap sisoornerata kingorna inuit ikinnerpaamik 60-it maqaasineqarput.
Bussit marluk aqqusinikkut ingerlasut nunap sisoorneranit Chitwanimi kuummut nakkarput.
Taama nunap immikkoortuani oqartussaasut nutaarsiassaqartitsivimmut AFP-mut ilisimatitsipput.
Aniguisimasunik ujaasineq annaassiniarnerlu maanna aallartinneqarput, Khimanada Bhusal, Chitwanimi atorfilik, oqarpoq.
Suli nassaartoqanngilaq.
Angallatini ikinnerpaamik 66-it ilaasut pisortap oqaatigaa, pingasulli immamut nakkartinnatik bussinit qimagussimapput.
Maanna pingasut taakku napparsimmavimmi katsorsarneqarput.
- (Tammaaneqartut) qassiunersut ilisimaqqissaanngilarput, ilaasunimmi amerlanerusunik bussit ikisaqarsimasinnaammata, atorfilik oqarpoq.
Ajutoorneq pivoq aqqusinermi motorvejimi, illoqarfiit pingaarnersaannit Kathmandumit 100 kilometerit missaanni ungasitsigisumiittumi.
Bussit kuussuarmut Trishulimut nakkarput.
Nepalip qeqqatigut kuussuaq ingerlaartuuvoq, taassumalu ilaa kuussuakkut rafterfigineqartorujussuusarpoq.
Nunap ministeriunerata Pushpa Kamal Dahal-ip inoqatinut attaveqaqatigiittarfitsigut X-ikkut pisoq aliasuutigingaarpaa.
- Ilaasut ujaqqullugit annanniaqqullugillu oqartussaasut tamaasa kajumissaarpakka, allappoq.
Nepalimi aqquserngit ajorneri, biilinik aserfallatsaaliuisoqartannginnera mianersuaalliorlunilu biilertoqartarnera pissutigalugit ajutoornerit toqussutaasinnaasut Nepalimi nalinginnaapput.
Aasaanerani ajutoornissamut aarlerinaat annertusisarpoq, juunip qiteqqunneraniit septembarip aallartinneranut monsuneraangat siallertarnera pissutigalugu, tassami nuna sisoorsinnaavoq qarsutsinerujussuarlu pisinnaalluni.
/ritzau/
