KL

DK

Neqi: Toqoraaneq ingerlalluarpoq

Savaaqqanik nersutaatinillu toqoraavik ingerlalluartoq, maskiinallu ajoqusernatik kinguaattoorfiuvallaarsimanngitsut Neqi A/S-imi pisortaq Ole Vestergaard paasissutissiivoq.

Savaaqqat ukioq manna toqorarneqartut siornamut naleqqiullugit oqimaannerupput.
Tusagassiortoq
Saqqummersinneqarpoq

Savaaqqat neqaat tunineqartut 268 tonsiupput, siorna tunineqartut nnertoqatigiingajallugit. Taamaakkaluartoq 2021-mit 2022-miillu suli appasinnerulaarput, ukiuni taakkunani savaaqqat neqaat 293 tons missaanniittut tunineqarmata.

Savaaqqap ataatsip oqimaassusaa 14,4 kg-miit 14,9 kg-mut  qaffariaateqalaarsimasoq toqoraaviup iluatsittutut aamma eqqaavaa.

- 2023-mi anorersuarnerani annaasassaraluit 2024-mi pitsaanerusumik angusaqarnermut ilaatigut matussuserneqarput, nersutinik toqoraavik, KNI A/S-ip ataaniittoq, tusagassiorfinnut taama nalunaaruteqarpoq.

Nersutaatinik tunisaqarneq qaffariangaatsiartoq

Nersussuit neqaannik tunisaqarneq toqoraaviup ukioq manna qaffariangaatsiartoq nalunaarutigaa. Nersutaatit 253-it toqorarneqarput, katillugit 22,8 tonsinik oqimaassuseqarlutik.

- Ukioq manna pilersaarutit malillugit ingerlavugut, naak siorna atortunik ajutoorsimagaluarluta suleqatitta atorfeqavittut, toqoraanerullu nalaani sulisut sulilluarnerannit kinguaattoornissaraluit pinngitsoortinneqarput. Sulisutta saniatigut aamma Norgemiit Sverigemiillu Nordjobb aqqutigalugu arfineq marlunnik nuannaarutigeqisatsinnik suleqateqarpugut, Neqi A/S-imi pisortaq Ole Vestergaard oqarpoq, savaaqqallu nersussuillu neqaat uullillugit suliarileruttorlugit ilanngullugu paasissutissiissutigalugu.

Uulliat allaanerusut

Atuisut nutaanik pisiaqarsinnaanngussasut ilanngullugu paasissutissiissutigineqarpoq.

- Neqaarnianngorniat sisamat peqatigalugit nioqqutissanik nutaanik sulissuteqarpugut, ilaatigut soorlu suppiliassat orsoqannginnerusut, qallersuutissat nutaat, nersussuarnillu uulliat allaanerusut. Piffissami aggersumi nersussuarmik uulliat immikkut nalunaaqusersortalissuagut nersutaatit Dexter aamma Galloway allaanerussutaat malunnartinniarlugit, neqaarniat pisortaat Sofus Hansen oqarpoq.

lammekød kreaturslagtninger inuiaqatigiit erhverv sofus hansen slagteri ole vestergaard

ATORFIIT Se alle jobs

Powered by Labrador CMS