Neriuppunga naalakkersuisunngortut allatut isumaqassasut

Qalerallit pillugit maanna oqaluttuarisaanermi pissanganarnerpaamik pisoqalerpoq, aalisarnermut inatsimmi pisassiissutit niuerutigineqarsinnaasut pillugit nalunaarutip nutaap atuutilernerata kingorna.

Kalaallit Nunaanni aalisarnermik ingerlatsiviit namminersortut annersaat Polar Seafood Greenland umiarsuaatileqatigiiffillu Sigguk peqatigalugu Namminersorlutik Oqartussat eqqartuussivimmut suliassanngortippaat, taamaalillutillu oqartussaasut sakkortuumik saassullugit.

Tassa ingerlatseqatigiiffiit Nunatsinni Eqqartuussivimmut saqitsaannermik suliassanngortitsivoq. Polar Seafoodip Sigguullu qaleralinniutaasa Kitaani avataani pisassaasa pingajorarterutaat 2025-mi annaasussanngornerat pissutaavoq.

Naalakkersuisut januaarip 14-iani 2025-mi aalajangiinerat ingerlatseqatigiiffiit eqqartuussivik ikiortigalugu suliareqqitassanngortikkusuppaat.

Naalakkersuisut nutaat qaleralittassiissutit agguataarneqarnerat suliareqqissagaat Naalakkersuisullu 2024/25-mi ukiut nikinnerisa kingorna aalajangernerat allanngussasoq Sigguup pisortaa piginneqataasoq Frans Heilmann neriuppoq. Suliffeqarfiit ukioq manna qaleralittassatik 1.700 tonsit missaat annaannginnissaat anguniarpaat.

- Neriuppunga naalakkersuisunngortussat allatut isumaqassasut. Pisassiissutit ikiliartortiinnarneqarsinnaanngimmata taama isumaqarpunga. Pisassiissutit allanngorarunnaarnissaat angorusupparput, Frans Heilmann Sermitsiamut oqarpoq.

Polar Seafoodimi pisortaaneq Miki Brøns assingusumik oqarpoq. Tusagassiuutinut nalunaarummi ima allappoq:

- Pisassiissutit suli agguaanneqarsimanngillat, taamaammat aalisarnermullu inuiaqatigiinnullu pitsaanerusumik isumaqatigiinniartoqaqqilernissaanut aaqqiissuteqartoqarnissaanullu suli periarfissaqarpoq. Politikerit isumartik allanngortikkumaaraat neriuutigaara, ernumassuteqarnivummi tusaaniarneqarumallugit eqqartuussivimmut saaffiginninnittariaqaratta pissutsit aalisarnermut nunamullu alianartuupput, Polar Seafoodimi pisortaq piginneqataasorlu Miki Brøns oqarpoq.

Sigguup piginneqataanerpaartaa Polar Seafood ingerlatseqatigiiffiup affaa sinnilaarlugu pigivaa, piginneqatigiillu mikinerusut 15-it sinnera pigalugu. Piginneqataasuni minnerni Frans Heilmann annerpaamik piginneqataassuseqarpoq.

Suliaq Nunatta eqqartuussisuuneqarfiani suliaritikkusukkaa

Ingerlatseqatigiiffiit Naalakkersuisut Namminersorlutik Oqartussallu Nunatsinni Eqqartuussivimmut Nuummiittumut suliassanngortitsinerat Sermitsiap takuaa. Eqqartuussivimmut suliassanngortitsisut suliaq Nunatta Eqqartuussisuuneqarfiani, Kalaallit Nunaanni eqqartuussivinni qullersaasumi, suliarineqassasoq piumasaraat.

Naalakkersuisut aalajangernerat nalunaarullu nutaaq tunngavigalugu, ingerlatseqatigiiffiit Kitaata avataani ukioq manna qaleralittassaasa ukiut siuliinut sanilliullugit pingajorarterutaat annaassavaat. Eqqartuussivimmi suliassanngortitsisut qaleralittassiissutit agguataarnerisa allanngortinneqarnissaanik piumasaraat. Nunatta Eqqartuussisuuneqarfiani taperserneqarnissamik imaluunniit naammassineqarnissaanik noqqaassutiginnittut suliassanngortitsinerminni allassimavoq.

Eqqartuussivimmut suliassanngortitsineq 32-nik qupperneqarpoq, taakkualu Danmarkimi eqqartuussissuserisoqarfiit annersaannit Københavnimiittumi Gorissen Federspielimit, eqqartuussissuserisumit Jacob Skude Rasmussenimit atsiorneqarsimapput. Taanna Nunatsinni Eqqartuussivimmut sapaatip-akunnera ataaseq matuma siornatigut tunniunneqarpoq.

- Taama iliuuseqartariaqarsimanerput ajuusaarutigaarput, Frans Heilmann nassuerpoq.

Aalisagartassiissutit arsaarinnissutigineqarnissaannut sapaatip-akunneri arlaqanngitsut sioqqullugit nalunaarutigineraat Namminersorlutik Oqartussat aaqqissutissamik ataatsimoorussillutik aaqqiinissaq suliffeqarfiit orniginartinnerugaluarpaat.

Polar Seafoodip Sigguullu Namminersorlutik Oqartussat taamalu Naalakkersuisut eqqartuussivimmut suliassanngortinnerat Namminersorlutik Oqartussanut nuannerpallaanngilaq. Eqqartuussineq Inatsisartunut qinersinissaq ullualunnik sioqqullugu aallartippoq.

Namminersorlutik Oqartussat unnerluussut tigusimaneraat apeqqutiginiarlugu aalisarnermut piniarnermullu naalakkersuisoqarfimmi pisortaq Emanuel Rosing Sermitsiap aperiniaraluarpaa, iluatsinngitsumillu.

Pigisanik unioqqutitsilluni arsaarinninneq

Qaleralittassiissutit pingajorarterutaannik annaasaqarneq pigisanik unioqqutitsilluni pinngitsaaliilluni arsaarinninnerusoq aamma inatsit tunngaviusoq unioqqutillugu iliornerusoq Polar Seafood aamma Sigguk isumaqarput.

Unnerluussuserisoq naapertorlugu Sigguk ukioq manna qaleralittassaminik 1.000 tonsinik annaasaqassasoq, Polar Seafoodilu 786 tonsinik annaasaqartussanngorluni. Kilisaatini inuttat 20 procentit angullugit akissarsiakinnerulernissaannik kinguneqassaaq.

Naalakkersuisut 2025-mut qaleralittassiissutit agguaanneqarneranni januaarip 14-ani aalajangernerannut aamma Namminersorlutik Oqartussat ataasiakkaanut pisassiissutit niuerutigineqarsinnaasut pillugit nalunaarutaannut februaarip sisamaaneersumit, aalisarnermut inatsimmut nutaamut attuumassuteqartunut, pissutaavoq.

Polar Seafood aamma Sigguk sinnerlugit eqqartuussissuserisoq Jacob Skude Rasmussen, eqqartuussissuserisut suliffeqarfiannit Gorissen Federspielimeersoq, Naalakkersuisut Polar Seafoodimut aamma Siggummut 2025-mi qaleralittassiissutinik agguaassinerisa suliarineqaqqittariaqarnerannik suliassanngortitsivoq.

- Polar Seafood Greenland A/S-imut tunngatillugu ataasiakkaanut pisassiissutinik niuerutigineqarsinnaasunik aaqqissuussineq Namminersorlutik Oqartussat nalunaarutaanni nr. 11-mi 4. februar 2025-meersumi § 8-mi atuutinngitsoq Namminersorlutik Oqartussat pisussaaffilerneqarput akuereqqullugit, allassimavoq.

Aningaasatigut annaasat annertuut

Eqqartuussissuserisoq pingaarnertut suliassanngortitsinerup saniatigut pingaarnersiunermi tulliuttumik allamik aamma suliassanngortitsivoq:

“Namminersorlutik Oqartussat aalisarneq pillugu nalunaarutaanni nr. 11-mi, 4. februar 2025-meersumi, § 8-p Polar Seafood Greenland A/S-imut atuutinnginnera pissutigalugu Namminersorlutik Oqartussat pisussaaffilerneqarput Polar Seafood Greenland A/S-ip aamma Sigguk A/S-ip annaasaqarnerminnik tamakkiisumik taarsiiffigineqassasut.”

Qaleralittassiissutinik Namminersorlutik Oqartussanit arsaarneqarnertik pissutigalugu annaasaqaatit taarsiivigeqqullugit suliffeqarfiit kingusinnerusukkut taamaasillutik suliassanngortitsisinnaalissapput.

“Aningaasatigut annaasassat kalluisussaapput, tassa Polar Seafood Greenlandip aamma Sigguup aalisagartassakinnerulernerisa kingunerisaanik suliffeqarfiit umiarsuaataannut nutaanik aningaasaliisinnaajunnaarnerannik kinguneqassaaq”, Ingerlatseqatigiiffiit eqqartuussivimmi suliassanngortitsisut sinnerlugit eqqartuussissuserisoq Jacob Skude Rasmussen allappoq.

Aammattaaq Polar Seafoodip Aasianni tunisassiorfia ingerlaannarsinnaajunnaassaaq, siunissami qalerallit tunisat ikinnerunissaat pissutigalugu ingerlatsineq imminut akilersinnaajunnaassammat.